ଭୁବନେଶ୍ୱର,୩୦।୭(ବ୍ୟୁରୋ): ଦେଶର ପ୍ରମୁଖ ପର୍ଯ୍ୟଟନସ୍ଥଳୀଗୁଡିକୁ ହସ୍ତଶିଳ୍ପ କ୍ଲଷ୍ଟରରେ ସଂଯୁକ୍ତ କରାଯାଇଛି। ହସ୍ତଶିଳ୍ପ ମନ୍ତ୍ରଣାଳୟ ପକ୍ଷରୁ ‘ପର୍ଯ୍ୟଟନ ସହିତ ବୟନ ଶିଳ୍ପ ସଂଯୋଗୀକରଣ’ କାର୍ଯ୍ୟକ୍ରମ ଅଧୀନରେ ଭିତ୍ତିଭୂମି ସହାୟତା ପ୍ରଦାନ କରାଯାଉଛି। ଏଥିପାଇଁ ଦେଶର ୮ଟି ଗ୍ରାମକୁ ଚୟନ କରାଯାଇଥିବାବେଳେ ଏଥି ମଧ୍ୟରେ ଓଡ଼ିଶାର ଶିଳ୍ପଗ୍ରାମ ରଘୁରାଜପୁର ରହିଛି। ଅନ୍ୟ ଗ୍ରାମଗୁଡ଼ିକ ହେଲା ଆନ୍ଧ୍ର ପ୍ରଦେଶର ତିରୁପତି, ଗୁଜରାଟର ବଦାଜ୍, ଉତ୍ତରପ୍ରଦେଶର ନୈନୀ, କର୍ନାଟକର ଆନେଗୁଣ୍ଡି, ତାମିଲନାଡ଼ୁର ମହାବଳୀପୁରମ୍, ଉତ୍ତର ପ୍ରଦେଶର ତାଜ୍ ଗଞ୍ଜ ଓ ରାଜସ୍ଥାନର ଆମେର। ଏସବୁ ଗ୍ରାମର ସାମଗ୍ରିକ ବିକାଶ ସହ ଶିଳ୍ପ ଓ ପର୍ଯ୍ୟଟନର ପ୍ରଚାର ପ୍ରସାର ଏକସଙ୍ଗେ କରାଯିବ।
ଏହି କାର୍ଯ୍ୟକ୍ରମରେ ସାମିଲ ହୋଇଥିବା ପୁରୀ ଜିଲାର ରଘୁରାଜପୁର ପଟ୍ଟଚିତ୍ର, ହସ୍ତଶିଳ୍ପ ଓ ଐତିହ୍ୟ ଗ୍ରାମ ଭାବେ ସୁଖ୍ୟାତି ଅର୍ଜନ କରିଛି। ଏବେ ଏଠାରେ ପର୍ଯ୍ୟଟନ ସହ ଶିଳ୍ପର ଏକତ୍ର ପ୍ରଚାର ପ୍ରସାର କରାଯିବ। ହସ୍ତଶିଳ୍ପକୁ କାରିଗରଙ୍କ ନିମନ୍ତେ ଏକ ସ୍ଥାୟୀ ତଥା ଲାଭଦାୟକ ଜୀବିକା ନିର୍ବାହର ବିକଳ୍ପ ରୂପରେ ବିକଶିତ କରିବ। ଏହାଦ୍ୱାରା ଦେଶର ସମୃଦ୍ଧ କାରିଗରି ଐତିହ୍ୟର ସୁରକ୍ଷା ହେବ। ଏହି କାର୍ଯ୍ୟକ୍ରମ ମାଧ୍ୟମରେ ସାରା ଦେଶରେ ପ୍ରାୟ ୧,୦୦୦ କାରିଗର ପ୍ରତ୍ୟକ୍ଷ ଲାଭ ପାଇବେ। ଏଥିସହ ପର୍ଯ୍ୟଟକମାନଙ୍କ ସଂଖ୍ୟା ମଧ୍ୟ ବୃଦ୍ଧି ପାଇବ ବୋଲି ପତ୍ର ସୂଚନା କାର୍ଯ୍ୟାଳୟ (ପିଆଇବି) ପକ୍ଷରୁ ସୂଚନା ଦିଆଯାଇଛି।
