ମେଲବୋର୍ନ,୨୯।୧୨: କାମଚଳା ଅଧିନାୟକ ଅଜିଙ୍କେ ରାହାନେଙ୍କ ନେତୃତ୍ୱରେ ଟିମ ଇଣ୍ଡିଆ ବକ୍ସିଂ ଡେ ଟେଷ୍ଟ ମ୍ୟାଚରେ ଅଷ୍ଟ୍ରେଲିଆକୁ ୮ ଉଇକେଟରେ ପରାସ୍ତ କରିଛି। ପ୍ରଥମ ଇନିଂସରେ ଶତକ ହାସଲ କରି ରାହାନେ ମ୍ୟାନ୍ ଅଫ ଦି ମ୍ୟାଚ ବିବେଚିତ ହୋଇଛନ୍ତି। ତାଙ୍କୁ ଐତିହାସିକ ମୁଲାଗ ପଦକ ଦେଇ ଅଷ୍ଟ୍ରେଲିଆ କ୍ରିକେଟ୍ ବୋର୍ଡ ସମ୍ମାନିତ କରିଥିଲା। ଦ୍ୱିତୀୟ ଟେଷ୍ଟ ମ୍ୟାଚ ଆରମ୍ଭ ପୂର୍ବରୁ ମଧ୍ୟ ମ୍ୟାନ୍ ଅଫ ଦି ମ୍ୟାଚ୍ ମୁଲାଗ ପଦକ ପ୍ରଦାନ କରାଯିବ ବୋଲି ବୋର୍ଡ ଘୋଷଣା କରିଥିଲା। ପ୍ରଥମ ଇନିଂସରେ ରାହାନେ ୧୧୨ ରନ ସଂଗ୍ରହ କରିଥିବାବେଳେ ଦ୍ୱିତୀୟ ଇନିଂସରେ ସେ ୨୭ ରନରେ ଅପରାଜିତ ରହିଥିଲେ। ଭାରତୀୟ ବୋଲରମାନେ ଅଷ୍ଟ୍ରେଲିଆର ଦ୍ୱିତୀୟ ଇନିଂସକୁ ୨୦୦ରନରେ ସୀମିତ ରଖିଥିଲେ। ଭାରତ ଜିତିବା ପାଇଁ ୭୦ ରନର ଲକ୍ଷ୍ୟ ପାଇଥିଲା, ଯାହା ସହଜରେ ହାସଲ କରିଥିଲା ଦଳ। ଏହି ବିଜୟ ସହିତ ଦଳ ଚାରି ମ୍ୟାଚ ବିଶିଷ୍ଟ ସିରିଜରେ ୧-୧ ଟି ବରାବର ହୋଇଛି।
ଜନି ମୁଲାଗ ବିଦେଶ ଗସ୍ତରେ ଯାଇଥିବା ଅଷ୍ଟ୍ରେଲୀୟ ଦଳର ପ୍ରଥମ ଅଧିନାୟକ ଥିଲେ। ୧୮୬୮ ମସିହାରେ ମୁଲାଗଙ୍କ ନେତୃତ୍ୱରେ ଦଳ ଇଂଲଣ୍ଡ ଗସ୍ତ କରିଥିଲା। ମୁଲାଗ ଜଣେ ଅଲରାଉଣ୍ଡର ଥିଲେ। ମୁଲାଗଙ୍କ ପ୍ରକୃତ ନାମ ଉନାରିମିନ ଥିଲା ଏବଂ ସେ ୧୮୬୮ରେ ସ୍ଥାନୀୟ ଦଳର ନେତୃତ୍ୱ ନେଇଥିଲେ। ଏହି ଗସ୍ତରେ ସେ ୪୭ଟି ମଧ୍ୟରୁ ୪୫ଟି ମ୍ୟାଚ ଖେଳିଥିଲେ ଏବଂ ହାରାହାରି ୨୩ଟି ଇନିଂସରେ ୧୬୯୮ ରନ ସ୍କୋର କରିଥିଲେ। ଏଥି ସହିତ ସେ ୧୮୭୭ ଓଭର ବୋଲିଂ ମଧ୍ୟ କରିଥିଲେ। ସେଥିମଧ୍ୟରୁ ସେ ୮୩୧ ଓଭର ବୋଲିଂ କରିଥିଲେ। ସେ ହାରାହାରି ୧୦ ରେ ୨୫୭ ଉଇକେଟ ନେଇଥିଲେ। ତାଙ୍କ କ୍ୟାରିୟରରେ ସେ ଉଇକେଟ କିପର ଦାୟିତ୍ୱ ତୁଲାଇ ୪ଟି ଷ୍ଟମ୍ପିଂ କରିଥିଲେ। ମୁଲାଗ ୧୮୬୬ମସିହାରେ ମେଲବୋର୍ନ କ୍ରିକେଟ ଗ୍ରାଉଣ୍ଡରେ ବକ୍ସିଂ ଡେ’ ଟେଷ୍ଟ ମ୍ୟାଚ ମଧ୍ୟ ଖେଳିଥିଲେ।