ନୂଆଦିଲ୍ଲୀ,୧୨।୫: ଭାରତୀୟ ଜନତା ପାର୍ଟି(ଭାଜପା)ର ବରିଷ୍ଠ ନେତା ତଥା ସ୍ବରାଷ୍ଟ୍ରନ୍ତ୍ରୀ ଅମିତ ଶାହା ରବିବାର କହିଛନ୍ତି ଯେ ପାକିସ୍ତାନ ଅଧିକୃତ କାଶ୍ମୀର ଭାରତର ଅଟେ ଏବଂ ଆମେ ଏହାକୁ ରଖିବୁ। କୌଶାମ୍ବି ଲୋକ ସଭା ନିର୍ବାଚନମଣ୍ଡଳୀରୁ ଭାଜପା ପ୍ରାର୍ଥୀ ତଥା ଏମପି ବିନୋଦ ସୋନକରଙ୍କ ସମର୍ଥନରେ ଏଠାରେ ଆୟୋଜିତ ଏକ ନିର୍ବାଚନ ରାଲିକୁ ସମ୍ବୋଧିତ କରିବାବେଳେ ଶାହା ଏହା କହିଛନ୍ତି।
ଶାହା ବ୍ୟଙ୍ଗାତ୍ମକ ଭାବରେ କହିଛନ୍ତି ଯେ ମଣି ଶଙ୍କର ଆୟାର ଏବଂ ଫାରୁକ ଅବଦୁଲ୍ଲାଙ୍କ ପରି କଂଗ୍ରେସ ଦଳର ନେତାମାନେ କହିଛନ୍ତି ଯେ ପରମାଣୁ ବୋମା ଥିବାରୁ ପାକିସ୍ତାନକୁ ସମ୍ମାନ ଦିଅ। ସେ କହିଛନ୍ତି, ଆଜି ମୁଁ କୌଶାମ୍ବିର ଲୋକଙ୍କୁ ପଚାରିବାକୁ ଆସିଛି ଯେ ଏହି ପାକିସ୍ତାନ ଯେଉଁ କଶ୍ମୀର ଦଖଲ କରିଛି ତାହା ଭାରତର କି ନୁହେଁ।
ଭିଡ ଭିତରେ ବି ଜନତାଙ୍କ ସକରାତ୍ମକ ପ୍ରତିକ୍ରିୟା ପାଇବା ପରେ ସ୍ବରାଷ୍ଟ୍ରମନ୍ତ୍ରୀ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଟାର୍ଗେଟ କରି କହିଛନ୍ତି ଯେ ରାହୁଲ ବାବା, ଯଦି ଆପଣ ପରମାଣୁ ବୋମାକୁ ଭୟ କରିବାକୁ ଚାହାଁନ୍ତି ତେବେ ଭୟ କରନ୍ତୁ, ଆମେ ଭୟ କରୁନାହୁଁ, ପାକିସ୍ତାନ ଅକ୍ତିଆର କରିଥିବା କଶ୍ମୀର ଭାରତର ଅଟେ ଏବଂ ଆମେ ଏହାକୁ ନେବୁ। ଶାହା କହିଛନ୍ତି ଯେ କଂଗ୍ରେସ ସବୁବେଳେ ବାବା ସାହେବଙ୍କୁ ଅପମାନିତ କରିଥିଲା। ଭାରତ ରତ୍ନ ଦେଇ ନ ଥିଲା। ପ୍ରଧାନମନ୍ତ୍ରୀ ମୋଦି ୧୪ ଏପ୍ରିଲକୁ ଜାତୀୟ ସମନ୍ବୟ ଦିବସ ଭାବେ ଘୋଷଣା କରିଛନ୍ତି। ବାବା ସାହେବଙ୍କ ସହ ଜଡିତ ପାଞ୍ଚଟି ସ୍ଥାନକୁ ମିଶାଇ ଏକ ତୀର୍ଥସ୍ଥାନ ସୃଷ୍ଟି କରାଯାଇଥିଲା।