ନୂଆଦିଲ୍ଲୀ,୧୬।୧୦: ରବି ଶାସ୍ତ୍ରୀଙ୍କ ପରେ ରାହୁଲ ଦ୍ରାବିଡ୍ ଟିମ୍ ଇଣ୍ଡିଆର୍ ନୂତନ ମୁଖ୍ୟ ପ୍ରଶିକ୍ଷକ ହେବା ପ୍ରାୟ ନିଶ୍ଚିତ। ଦ୍ରାବିଡ ଏହା ପୂର୍ବରୁ ଅନେକ ଥର ହେଡ୍ କୋଚ୍ ହେବାର ଅଫର୍କୁ ପ୍ରତ୍ୟାଖ୍ୟାନ କରିଥିଲେ। ହେଲେ କ୍ରିକେଟ ବୋର୍ଡ ଅଫ୍ ଇଣ୍ଡିଆ(ବିସିସିଆଇ)ର ଉଦ୍ୟମ ପରେ ସେ ଏବେ ରାଜି ହୋଇଥିବା କୁହାଯାଉଛି। ଯୁବ ଖେଳାଳିଙ୍କ ଆଗମନ ଯୋଗୁ ଭାରତୀୟ ଦଳରେ ପରିବର୍ତ୍ତନ ଦେଖାଦେଇଛି। ସେମାନେ ଦ୍ରାବିଡଙ୍କ ସହ କାମ କରିଛନ୍ତି। ଏଣୁ ଖେଳାଳିମାନେ ଦ୍ରାବିଡଙ୍କ ପଥରେ ଚାଲି ନୂଆ ଉପଲବ୍ଧି ହାସଲ କରିବେ ବୋଲି ଆଶା କରାଯାଉଛି।
ଶୁକ୍ରବାର ସୌରଭ ଗାଙ୍ଗୁଲି ଏବଂ ଜୟ ଶାହାଙ୍କ ସହ ଦ୍ରାବିଡଙ୍କର ଏକ ବୈଠକ ହୋଇଥିଲା। ବୈଠକ ପରେ ଦ୍ରାବିଡ ମୁଖ୍ୟ କୋଚ୍ ପଦ ସମ୍ଭାଳିବା ନେଇ ସହମତି ପ୍ରକାଶ କରିଛନ୍ତି। ଟି-୨୦ ବିଶ୍ୱକପ୍ ପରେ ସେ ଏହି ଦାୟିତ୍ୱ ନେବେ। ଦୁଇ ବର୍ଷ ଯାଏ ସେ ଏହାକୁ ପରିଚାଳନା କରିବେ। ଅପରପକ୍ଷେ ପରାସ ମହମ୍ବ୍ରେକୁ ବୋଲିଂ କୋଚ୍ ଦାୟିତ୍ୱ ମିଳିବାର ସମ୍ଭାବନା ରହିଛି। ସେ ଭରତ ଅରୁଣଙ୍କ ସ୍ଥାନ ନେବେ। ତେବେ ଉଭୟଙ୍କ ନିଯୁକ୍ତି ନେଇ ବିସିସିଆଇ ପକ୍ଷରୁ ଆଧିକାରୀକ ବିଜ୍ଞପ୍ତି ପ୍ରକାଶ ପାଇନାହିଁ। ସେହିଭଳି ଫିଲ୍ଡିଂ କୋଚ୍ ଆର୍ ଶ୍ରୀଧରଙ୍କ ବଦଳି ନେଇ ନିଷ୍ପତ୍ତି ନିଆଯାଇନାହିଁ। ଏଥିସହ ବିକ୍ରମ ରାଠୋର ଦଳର ବ୍ୟାଟିଂ କୋଚ୍ ଭାବେ କାର୍ଯ୍ୟ ଜାରି ରଖିବେ।
କହିରଖୁଛୁ,ଭାରତୀୟ ଦଳର ମୁଖ୍ୟ ପ୍ରଶକ୍ଷକ ରବି ଶାସ୍ତ୍ରୀ, ବୋଲିଂ ପ୍ରଶିକ୍ଷକ ଭରତ ଅରୁଣ ଏବଂ ଫିଲ୍ଡିଂ କୋଚ୍ ଆର୍ ଶ୍ରୀଧରଙ୍କ କାର୍ଯ୍ୟକାଳ ଶେଷ ହେବାକୁ ଯାଉଛି। ଟି-୨୦ ବିଶ୍ୱକପ୍ ପରେ ଏହି ୩ଜଣ ଇସ୍ତଫା ଦେବେ। ଦ୍ରାବିଡ ବର୍ତ୍ତମାନ ଜାତୀୟ କ୍ରିକେଟ ଏକାଡେମୀ(ଏନ୍ସିଏ)ର ମୁଖ୍ୟ ଅଛନ୍ତି। ସେ ଏହି ପଦରୁ ଇସ୍ତଫା ଦେବେ। ଗତ ଜୁଲାଇରେ ଶ୍ରୀଲଙ୍କା ଗସ୍ତ ସମୟରେ ଦ୍ରାବିଡ ହେଡ୍ କୋଚ୍ ଭାବେ ଦାୟିତ୍ୱ ଗ୍ରହଣ କରିଥିଲେ। ଭାରତୀୟ ଦଳ ଶ୍ରୀଲଙ୍କାରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ ଜିତିଥିବା ବେଳେ ଟି-୨୦ ସିରିଜରେ ପରାଜିତ ହୋଇଥିଲା।