ହାଇଦ୍ରାବାଦ,୧୯।୧୦: ତେଲଙ୍ଗାନା ବିଧାନସଭା ନିର୍ବାଚନ ପାଇଁ ସମସ୍ତ ଦଳ ପ୍ରଚାର ଆରମ୍ଭ କରିଛନ୍ତି। ଏହି ସମୟରେ କଂଗ୍ରେସ ଏମପି ରାହୁଲ ଗାନ୍ଧୀ ତେଲଙ୍ଗାନାର ସିଙ୍ଗରେନି କୋଇଲା ଖଣି (SCCL) ରେ କାର୍ଯ୍ୟ କରୁଥିବା କର୍ମଚାରୀଙ୍କୁ ଭେଟିଥିଲେ।
କଂଗ୍ରେସ ପକ୍ଷରୁ ଏମପି ରାହୁଲ ଗାନ୍ଧୀ ଏବଂ ଏସସିସିଏଲରେ କାର୍ଯ୍ୟ କରୁଥିବା କର୍ମଚାରୀଙ୍କ ଫଟୋ ସୋସିଆଲ ମିଡିଆ ଏକ୍ସରେ ଶେୟାର କରିଛି। ଏହି ଫଟୋରେ କଂଗ୍ରେସ ନେତା କର୍ମଚାରୀଙ୍କ ସହ କଥାବାର୍ତ୍ତା କରୁଥିବା ଏବଂ ଫଟୋଗ୍ରାଫି କରୁଥିବା ଦେଖିବାକୁ ମିଳିଛି।
ତେଲଙ୍ଗାନାରେ ନିର୍ବାଚନ ପ୍ରଚାର ରୋଡ ଶୋ ସମୟରେ କଂଗ୍ରେସ ଏମପି ରାହୁଲ ଗାନ୍ଧୀ ଭାଜପା ଓ ପ୍ରଧାନମନ୍ତ୍ରୀ ମୋଦିଙ୍କ ଉପରେ ଖୁବ ବର୍ଷିଛନ୍ତି।
ସେ କହିଛନ୍ତି, ନରେନ୍ଦ୍ର ମୋଦି ଆସି ଆପଣଙ୍କୁ କହିବେ ଯେ ମୁଁ ପ୍ରତ୍ୟେକ ବ୍ୟାଙ୍କ ଆକାଉଣ୍ଟରେ ୧୫ ଲକ୍ଷ ଟଙ୍କା ରଖିବି। ମୁଁ ବିମୁଦ୍ରୀକରଣ ମାଧ୍ୟମରେ କଳା ଟଙ୍କା ବିରୋଧରେ ଲଢିବି। ସେ ଆସି କହିବେ ଯେ ଜିଏସଟି ଗରିବ ଲୋକଙ୍କୁ ଉପକୃତ କରିବ। ଅନ୍ୟପକ୍ଷରେ, ତେଲେଙ୍ଗାନାର ମୁଖ୍ୟମନ୍ତ୍ରୀ କହିଛନ୍ତି ଯେ ମୁଁ ପ୍ରତ୍ୟେକ ଗରିବ ଲୋକଙ୍କୁ ୩ ଏକର ଜମି ଦେବି। ଏହି ଲୋକମାନେ ଗୋଟିଏ ପରେ ଗୋଟିଏ ମିଛ କୁହନ୍ତି, କିନ୍ତୁ ମୁଁ ଆପଣଙ୍କୁ ମିଛ କହିବାକୁ ଆସି ନାହିଁ। ତେବେ ତେଲଙ୍ଗାନରେ କଂଗ୍ରେସକୁ ମଜଭୁତ କରିବାକୁ ରାହୁଲ ତାଙ୍କର ପ୍ରୟାସ ଜାରି ରଖିଛନ୍ତି।