ନୂଆଦିଲ୍ଲୀ,୭।୯: କରୋନା ଭାଇରସ ହେଉ ଅବା ଦେଶର ଜିଡିପିକୁ ନେଇ କଂଗ୍ରେସ ନେତା ରାହୁଲ ଗାନ୍ଧୀ ବାରମ୍ବାର କେନ୍ଦ୍ର ସରକାର ତଥା ପ୍ରଧାନମନ୍ତ୍ରୀ ମୋଦିଙ୍କ ଉପରେ ବର୍ଷୁଛନ୍ତି। ସୋମବାର ପୁଣିଥରେ ରାହୁଲ କହିଛନ୍ତି ଦେଶ ସବୁ ଭୁଲ୍ ରାସ୍ତାରେ ଆଗକୁ ବଢୁଛି। ରାହୁଲ ଟୁଇଟ୍ କରି କହିଛନ୍ତି ଦେଶକୁ ସଙ୍କଟ ମୁହଁକୁ ଠେଲିଦେବା ପରେ ମୋଦି ଏହାର ସମାଧାନ ଖୋଜିବା ପରିବର୍ତ୍ତେ ନିଜେ ଯେମିତି ଓଟପକ୍ଷୀ ପାଲଟି ଯାଉଛନ୍ତି। ସୂଚନାଯୋଗ୍ୟ, ଏବେ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ୪୨ ଲକ୍ଷ ଅତିକ୍ରମ କରି ସାରିଥିବା ବେଳେ ଗତ ୨୪ ଘଣ୍ଟାରେ ୯୦,୦୮୨ ନୂଆ ସଂକ୍ରମିତ ସମସ୍ତଙ୍କ ଚିନ୍ତା ବଢାଇ ଦେଇଛି। ଏହା ପୂର୍ବରୁ ରବିବାର ରାହୁଲ କହିଥିଲେ ବସ୍ତୁ ଓ ସେବା କର(ଜିଏସ୍ଟି) କୌଣସି କର ପ୍ରଣାଳୀ ନୁହେଁ ବରଂ ଦେଶର କ୍ଷୁଦ୍ର ଓ ମଧ୍ୟମ ବ୍ୟବସାୟୀଙ୍କ ପ୍ରତି ଏକ ଲାଠି ପାହାର ସଦୃଶ। ତେଣୁ ଏହା ବିରୋଧରେ ସ୍ବର ଉତ୍ତୋଳନ କରିବାକୁ ରାହୁଲ ସମସ୍ତ ଜନସାଧାରଣଙ୍କୁ ଆହ୍ବାନ ଦେଇଥିଲେ। ଏହା ପୂର୍ବରୁ ରାହୁଲ ଜିଏସ୍ଟିକୁ ଗବ୍ବର ସିଂ ଟ୍ୟାକ୍ସ ବୋଲି ମଧ୍ୟ କହି ମୋଦିଙ୍କୁ ଟାର୍ଗେଟ କରିଥିଲେ।