ଅହମ୍ମଦାବାଦ୍,୧୦।୭: ଭାରତୀୟ ଜନତା ପାର୍ଟି ସଭାପତି ଜେପି ନଡ୍ଡା କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ ରାହୁଲ ଏକ ’ପ୍ରେମ ଦୋକାନ’ ନୁହେଁ ବରଂ ‘ଘୃଣାର ମେଗା ମଲ୍’ ଚଳାଉଛନ୍ତି। ଏଥି ସହ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ଘୃଣା ବ୍ୟାପିଥିବା ଅଭିଯୋଗ କରିଛନ୍ତି।
ମୋଦି ସରକାରଙ୍କ ନଅ ବର୍ଷ ପୂରିବା ପରେ ନଡ୍ଡା ପଞ୍ଚମହଲ ଜିଲାର ଗୋଡ୍ରା ସହରରେ ଏକ ରାଲିରେ ସମ୍ବୋଧିତ କରିଥିଲେ। ବିରୋଧୀ ଦଳଗୁଡିକ ପରିବାରକେନ୍ଦ୍ରିକ ଦଳରେ ପରିଣତ ହୋଇଥିବା ସେ ଅଭିଯୋଗ କରିଛନ୍ତି। ନଡ୍ଡା କହିଛନ୍ତି, ବିରୋଧୀ ଲୋକଙ୍କ କଲ୍ୟାଣ ପାଇଁ ଚିନ୍ତିତ ନୁହଁନ୍ତି। ସେମାନେ କେବଳ ନିଜ ପରିବାରକୁ ବଞ୍ଚାଇବାକୁ ଚେଷ୍ଟା କରୁଛନ୍ତି। ଯେତେବେଳେ ବି ପ୍ରଧାନମନ୍ତ୍ରୀ ମୋଦିଙ୍କୁ ବିଶ୍ୱ ସ୍ତରରେ ପ୍ରଶଂସା କରାଯାଏ, ସେତେବେଳେ କଂଗ୍ରେସ ଲୋକମାନେ ଚିନ୍ତିତ ହୁଅନ୍ତି। ପ୍ରଧାନମନ୍ତ୍ରୀଙ୍କୁ ବିରୋଧ କରିବାକୁ ଚେଷ୍ଟା କରୁଥିବାବେଳେ କଂଗ୍ରେସ ନେତାମାନେ ଦେଶକୁ ବିରୋଧ କରିବା ଆରମ୍ଭ କରି ଦେଇଛନ୍ତି। ରାହୁଲ ଗାନ୍ଧୀ ବ୍ରିଟେନ ଯାଇ ଗଣତନ୍ତ୍ର ବିପଦରେ ଅଛନ୍ତି ବୋଲି କହିଥିଲେ। ତାଙ୍କ ଜେଜେମା ତଥା ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ୧୯୭୫ରେ ଦେଶରେ ଜରୁରୀକାଳୀନ ପରିସ୍ଥିତି ଲଗାଇ ୧.୫ ଲକ୍ଷ ଲୋକଙ୍କୁ ଜେଲରେ ରଖିଥିଲେ। ବର୍ତ୍ତମାନ ସେମାନେ ଗଣତନ୍ତ୍ର ବିଷୟରେ କହୁଛନ୍ତି।
କଂଗ୍ରେସ ନେତାମାନଙ୍କୁ ନିମ୍ନ ସ୍ତରୀୟ ରାଜନୀତିରେ ଲିପ୍ତ ଥିବା ଅଭିଯୋଗ କରି ନଡ୍ଡା କହିଛନ୍ତି, ସେମାନେ ପ୍ରଧାନମନ୍ତ୍ରୀ ମୋଦିଙ୍କୁ ବଦନାମ କରିବା ପାଇଁ ଆପତ୍ତିଜନକ ଶବ୍ଦ ବ୍ୟବହାର କରିଛନ୍ତି। ପ୍ରଧାନମନ୍ତ୍ରୀ ଭାରତର୧୪୦ କୋଟି ନାଗରିକଙ୍କ ସେବା କରୁଛନ୍ତି। କଂଗ୍ରେସ ‘ପ୍ରେମର ଦୋକାନ’ ନୁହେଁ ବରଂ ‘ଘୃଣାର ମେଗା ମଲ୍’ ଚଳାଉଛି।
