ନୂଆଦିଲ୍ଲୀ,୨୩ ।୭: ପେଗାସସ ମାମଲାକୁ ନେଇ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଦାବି କରିଛନ୍ତି ଯେ ତାଙ୍କ ଫୋନ୍ ଟ୍ୟାପ୍ କରାଯାଇଛି । ସେ କହିଛନ୍ତି ଏହା କେବଳ ମୋ ମାମଲା ନୁହେଁ ବରଂ ଜନତାଙ୍କ ସ୍ୱର ଉପରେ ଆକ୍ରମଣ । ଏହାସହ ସେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ଇସତଫା ଦାବି କରିବା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିଚାର ବିଭାଗୀୟ ତଦନ୍ତ ହେଉ ବୋଲି କହିଛନ୍ତି । ରାହୁଲ ଆହୁରି ମଧ୍ୟ କହିଛନ୍ତି ପେଗାସସ ହେଉଛି ଏକ ଅସ୍ତ୍ର । ଇସ୍ରାଏଲ ସରକାର ଏହାକୁ ଅସ୍ତ୍ର ବୋଲି କହୁଛନ୍ତି । ଏହା ଆତଙ୍କବାଦୀ ଓ ଅପରାଧିଙ୍କ ପାଇଁ ବ୍ୟବହାର କରାଯାଇଥାଏ । ପ୍ରଧାନମନ୍ତ୍ରୀ ଓ ସ୍ୱରାଷ୍ଟ୍ର ମନ୍ତ୍ରୀ ଏହି ଅସ୍ତ୍ରକୁ ହିନ୍ଦୁସ୍ତାନର ସଂସ୍ଥା ଓ ଲୋକତନ୍ତ୍ର ବିରୋଧରେ ପ୍ରୟୋଗ କରିଛନ୍ତି ମୋ ଫୋନ୍ ଟ୍ୟାପ କରାଯାଇଛି । ସୁପ୍ରିମକୋର୍ଟ ଓ ରାଫେଲ ମାମଲାର ଯାଞ୍ଚକୁ ରୋକିବାକୁ ପେଗାସସର ପ୍ରୟୋଗ କରାଯାଇଛି । ତେଣୁ ସ୍ୱରାଷ୍ଟ୍ରମନ୍ତ୍ରୀ ଇସ୍ତଫା ଦେବା ଦରକାର ଓ ପ୍ରଧାନମନ୍ତ୍ରୀଙ୍କ ଉପରେ ବିଚାର ବିଭାଗୀୟ ଯାଞ୍ଚ ହେବା ଜରୁରୀ । କାରଣ ଏମାନେ ହିଁ ଏହାର ଅଥରାଇଜେଶନ ଦେଇପାରିବେ ।