ନୂଆଦିଲ୍ଲୀ,୨୪।୧୨: କଂଗ୍ରେସ ନେତା ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରା ଶନିବାର ଦିଲ୍ଲୀରେ ପହଞ୍ଚିଛି। ଏହି ସମୟରେ ରାହୁଲ ଗାନ୍ଧୀ ତାଙ୍କ ମା’ ସୋନିଆ ଗାନ୍ଧୀଙ୍କ ସହ ଏକ ଫଟୋ ଟୁଇଟ୍ରରେ ଶେୟାର କରି ଲେଖିଛନ୍ତି, ମା’ଙ୍କଠାରୁ ଯେଉଁ ପ୍ରେମ ପାଇଛି, ତାହାକୁ ମୁଁ ଦେଶରେ ବାଣ୍ଟୁଛି। ଶନିବାର ସକାଳେ ଭାରତ ଯୋଡୋ ଯାତ୍ରା ଦିଲ୍ଲୀରେ ପହଞ୍ଚିବା ପରେ ହଜାର ହଜାର ଲୋକ ରାହୁଲ ଗାନ୍ଧୀଙ୍କ ସହ ପଦଯାତ୍ରାରେ ସାମିଲ ହୋଇଥିଲେ। ଏଥିରେ ଜୟରାମ ରମେଶଙ୍କ ସହ ପୱନ ଖେରା, ରଣଦୀପ ସୁରଜେୱାଲା, ଭୁପିନ୍ଦର ସିଂ ହୁଡା ଏବଂ କୁମାରୀ ସେଲଜାଙ୍କ ସମେତ ବହୁ ବରିଷ୍ଠ କଂଗ୍ରେସ ନେତା ଯୋଗ ଦେଇଥିଲେ। ଏଥିସହ କଂଗ୍ରେସ ନେତ୍ରୀ ସୋନିଆ ଗାନ୍ଧୀ ଏବଂ କଂଗ୍ରେସର ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ ଏହି ପଦଯାତ୍ରାରେ ସାମିଲ ହୋଇଥିଲେ।