ନୂଆଦିଲ୍ଲୀ,୨୨।୯: କଂଗ୍ରେସ ଅଧ୍ୟକ୍ଷ ପଦ ପାଇଁ ନାମାଙ୍କନ ପ୍ରକ୍ରିୟା ସେପ୍ଟେମ୍ବର ୨୪ରୁ ଆରମ୍ଭ ହେବାକୁ ଯାଉଛି। ଏହା ପୂର୍ବରୁ ଦଳର ନେତା ରାହୁଲ ଗାନ୍ଧୀ ଅଧ୍ୟକ୍ଷ ପଦ ଦୌଡ଼ରେ ଜଡିତ ନେତାମାନଙ୍କୁ ଉପଦେଶ ଦେଇଛନ୍ତି। ଭାରତ ଯୋଡୋ ଯାତ୍ରାରେ ଥିବା ରାହୁଲ ଗୁରୁବାର କହିଛନ୍ତି, କଂଗ୍ରେସର ଅଧ୍ୟକ୍ଷ ହେବା କେବଳ ଏକ ପଦବୀ ନୁହେଁ ବରଂ ଏହା ବିଶ୍ୱାସର ପ୍ରତୀକ। ଏହା ଭାରତର ଦର୍ଶନକୁ ପ୍ରତିପାଦିତ କରେ। ଯେଉଁମାନେ କଂଗ୍ରେସ ଅଧ୍ୟକ୍ଷ ନିର୍ବାଚନ ପାଇଁ ପ୍ରତିଦ୍ୱନ୍ଦ୍ୱିତା କରୁଛନ୍ତି ସେମାନଙ୍କ ପାଇଁ ମୋର ପରାମର୍ଶ ହେଉଛି ଆପଣ ଯେଉଁ ପଦବୀ ପାଇବାକୁ ଯାଉଛନ୍ତି ତାହା ଐତିହାସିକ। ଏହା କେବଳ ଏକ ସଂଗଠନର ପଦବୀ ନୁହେଁ ବରଂ ଏକ ଆଦର୍ଶଗତ ପଦବୀ, ଯାହା ଏକ ବିଶ୍ୱାସକୁ ପ୍ରତିପାଦିତ କରେ।
ରାହୁଲ ଆହୁରି ମଧ୍ୟ କହିଛନ୍ତି, ଆମେ ସମସ୍ତେ ରାଜସ୍ଥାନର ଉଦୟପୁରରେ ଗୋଟିଏ ପ୍ରତିଜ୍ଞା କରିଥିଲୁ, ତାହା ହେଉଛି ଗୋଟିଏ ବ୍ୟକ୍ତି ଓ ଗୋଟିଏ ପୋଷ୍ଟ। ଆମର ଆଶା ସମସ୍ତେ ଏହି ନିୟମ ପାଳନ କରିବେ।
କଂଗ୍ରେସ ଅଧ୍ୟକ୍ଷ ଦୌଡରେ ସର୍ବାଗ୍ରେ ଥିବା ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ‘ଡବଲ ରୋଲ’ ସର୍ତ୍ତକୁ ଏହା ରାହୁଲଙ୍କ କଡ଼ା ଜବାବ ବୋଲି କୁହାଯାଉଛି। ଗୋଟିଏ ଦିନ ପୂର୍ବରୁ ଗେହଲଟ କହିଥିଲେ, ଅଧ୍ୟକ୍ଷ ଭାବେ ନିର୍ବାଚିତ ହେଲେ ମଧ୍ୟ ସେ ରାଜସ୍ଥାନ ମୁଖ୍ୟମନ୍ତ୍ରୀ ପଦ ଛାଡିବେ ନାହିଁ।
ସୂଚନାଯୋଗ୍ୟ, ଗୁରୁବାର କଂଗ୍ରେସ ଅଧ୍ୟକ୍ଷ ନିର୍ବାଚନ ପାଇଁ ବିଜ୍ଞପ୍ତି ଜାରି ହୋଇଛି। ବିଜ୍ଞପ୍ତି ଅନୁଯାୟୀ, ଯେକୌଣସି ନେତା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ସେପ୍ଟେମ୍ବର ୨୪ ରୁ ୨୦ ପର୍ଯ୍ୟନ୍ତ ନାମାଙ୍କନପତ୍ର ଦାଖଲ କରିପାରିବେ। ନାମାଙ୍କନ ପ୍ରତ୍ୟାହାରର ଶେଷ ତାରିଖ ଅକ୍ଟୋବର ୮ ହେବ। ଅଧ୍ୟକ୍ଷ ପଦ ପାଇଁ ଏକରୁ ଅଧିକ ପ୍ରାର୍ଥୀ ଥିଲେ ଅକ୍ଟୋବର ୧୭ରେ ସମସ୍ତ ରାଜ୍ୟରେ ନିର୍ବାଚନ ଅନୁଷ୍ଠିତ ହେବ। ଏହି ସମୟରେ ରାଜ୍ୟ କଂଗ୍ରେସର ପ୍ରତିନିଧୀମାନେ ଭୋଟ ଦେବେ। ଭୋଟ ଗଣନା ଅକ୍ଟୋବର ୧୯ରେ ହୋଇ ଫଳାଫଳ ଘୋଷଣା କରାଯିବ। ବର୍ତ୍ତମାନ ପର୍ଯ୍ୟନ୍ତ ଅଧ୍ୟକ୍ଷ ପଦ ଦୌଡରେ ଅଶୋକ ଗେହଲୋଟ, ଶଶି ଥରୁର, ଦିଗବିଜୟ ସିଂଙ୍କ ଭଳି ନେତାଙ୍କ ନାମ ଚର୍ଚ୍ଚା ହେଉଛି।
