ରାଜସ୍ଥାନ,୧୬।୧୧: ରାଜସ୍ଥାନ ବିଧାନସଭା ନିର୍ବାଚନ ପ୍ରଚାର ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ। ସେ କହିଛନ୍ତି କରୋନା ମହାମାରୀ ସମୟରେ ଲୋକେ ମରୁଥିବା ବେଳେ ପ୍ରଧାନମନ୍ତ୍ରୀ ଥାଳି ବଜାଉଥିଲେ ଏବଂ ମୋବାଇଲ ଲାଇଟ ଜଳାଉଥିଲେ। ଏହା ସହିତ ପ୍ରଧାନମନ୍ତ୍ରୀ ଦେଶର କୋଟିପତି ମାନଙ୍କ ପାଇଁ କାମ କରୁଥିବା ସେ ଅଭିଯୋଗ କରିଛନ୍ତି।
ରାଜସ୍ଥାନର ଚାରୁରେ ଏକ ଜନସଭାକୁ ସମ୍ବୋଧିତ କରି ରାହୁଲ କହିଛନ୍ତି, ଏଠାରେ କଂଗ୍ରେସ ଗରିବଙ୍କର ସରକାର ଚଳାଉଛି, ଆମେ ସେମାନଙ୍କର ସୁରକ୍ଷା ପ୍ରତି ଧ୍ୟାନ ଦେଇଛୁ। ଅନ୍ୟପଟେ ନରେନ୍ଦ୍ର ମୋଦି ଜିଏସଟି ଲାଗୁ କରିଥିଲେ, ଆଉ ଦେଶରେ ପ୍ରଥମ ଥର ଚାଷୀଙ୍କୁ କର ଦେବାକୁ ପଡିଥିଲା। ସେହିପରି ସେ ନୋଟବନ୍ଦୀ କରି କ୍ଷୁଦ୍ର ବ୍ୟବସାୟୀଙ୍କୁ ଶେଷ କରିଦେଇଥିଲେ।
ରାହୁଲ ଆହୁରି କହିଛନ୍ତି ଯେ ଆଜି ପ୍ରଧାନମନ୍ତ୍ରୀ ମୋଦୀଙ୍କ ଗ୍ୟାରେଣ୍ଟିରେ ଲୋକମାନେ ହସୁଛନ୍ତି। ସେ ୧୫ ଲକ୍ଷ ଟଙ୍କା ଦେବାକୁ ପ୍ରତିଶୃତି ଦେଇଥିଲେ। ଲୋକମାନେ ଏହା ପାଇଛନ୍ତି କି? ମୋଦୀଙ୍କ ଗ୍ୟାରେଣ୍ଟି ଅର୍ଥ ଆଦାନୀଙ୍କ ଗ୍ୟାରେଣ୍ଟି ଏବଂ କଂଗ୍ରେସ ସରକାର ଅର୍ଥ କୃଷକ ଏବଂ ଶ୍ରମିକ ସରକାର ବୋଲି ସେ କହିଛନ୍ତି।