ଦୁବାଇ, ୨୦।୧୦: ଚଳିତ ଆଇପିଏଲ୍ର ୩୮ତମ ମୁକାବିଲାରେ ମଙ୍ଗଳବାର କିଙ୍ଗ୍ସ ଇଲେଭେନ ପଞ୍ଜାବର ମୁକାବିଲା ଦିଲ୍ଲୀ କ୍ୟାପିଟାଲ୍ସ ସହ ହେବ। ସ୍ଥାନୀୟ ଦୁବାଇ ଇଣ୍ଟରନ୍ୟାଶନାଲ କ୍ରିକେଟ୍ ଷ୍ଟାଡିୟମରେ ଖେଳାଯିବାକୁ ଥିବା ଏହି ମ୍ୟାଚ୍ରେ ଦିଲ୍ଲୀ ପଲା ଭାରୀ ରହିବ। ଦିଲ୍ଲୀ ବର୍ତ୍ତମାନ ସୁଦ୍ଧା ୯ ମ୍ୟାଚ୍ ଖେଳି ୭ ବିଜୟ ଓ ୨ ପରାଜୟ ସହ ୧୪ ପଏଣ୍ଟ ପାଇ ଟେବୁଲ ତାଲିକାର ସର୍ବାଗ୍ରେ ରହିଛି। ଅପରପକ୍ଷରେ ପଞ୍ଜାବ ୯ ମ୍ୟାଚ୍ରୁ ୩ ବିଜୟ ଓ ୬ ପରାଜୟ ସହ ୬ ପଏଣ୍ଟ ପାଇ ଟେବୁଲର ୭ମ ସ୍ଥାନରେ ରହିଛି। ପଞ୍ଜାବର ୩ଟି ଯାକ ବିଜୟରେ ଅଧିନାୟକ ଲୋକେଶ ରାହୁଲ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପାଇବାର ସୌଭାଗ୍ୟ ଲାଭ କରିଛନ୍ତି। ରାହୁଲ ବର୍ତ୍ତମାନ ସୁଦ୍ଧା ଚଳିତ ସିଜନରେ ୭୫ ଆଭରେଜରେ ୫୨୫ ରନ୍ ସଂଗ୍ରହ କରିସାରିଛନ୍ତି। ଟୁର୍ନାମେଣ୍ଟରେ ସର୍ବାଧିକ ରନ୍ ସଂଗ୍ରହକାରୀ ବ୍ୟାଟ୍ସମ୍ୟାନ ତାଲିକାର ସେ ସର୍ବାଗ୍ରେ ରହିବା ସହିତ ଅରେଞ୍ଜ କ୍ୟାପ୍ର ଅଧିକାରୀ ରହିଛନ୍ତି।
ଦିଲ୍ଲୀ ଓ ପଞ୍ଜାବ ମଧ୍ୟରେ ଚଳିତ ସିଜନରେ ଅନୁଷ୍ଠିତ ପ୍ରଥମ ମ୍ୟାଚ୍ ଟାଇରେ ଶେଷ ହୋଇଥିଲା। ସେପ୍ଟେମ୍ବର ୨୦ରେ ଦୁବାଇରେ ଅନୁଷ୍ଠିତ ଏହି ମୁକାବିଲାରେ ପ୍ରଥମେ ବ୍ୟାଟିଂ କରି ଶ୍ରେୟାସ ଆୟାରଙ୍କ ନେତୃତ୍ୱାଧୀନ ଦିଲ୍ଲୀ କ୍ୟାପିଟାଲ୍ସ ୮ ଉଇକେଟ୍ ହରାଇ ୧୫୭ ରନ୍ ସଂଗ୍ରହ କରିଥିଲା। ଜବାବରେ ପଞ୍ଜାବ (୧୫୭/୮) ମଧ୍ୟ ନିର୍ଦ୍ଧାରିତ ଓଭରରେ ସମାନ ସଂଖ୍ୟକ ସ୍କୋର କରିପାରିଥିଲା। ତେବେ ସୁପର୍ ଓଭରରେ କିନ୍ତୁ ଦିଲ୍ଲୀ ବାଜିମାତ୍ କରିନେଇଥିଲା। ସେହିଭଳି ଗତ ରବିବାର ମଧ୍ୟ ଐତିହାସିକ ମୁକାବିଲାରେ ପଞ୍ଜାବ ୨ୟ ସୁପର୍ ଓଭରରେ ମୁମ୍ବାଇ ଇଣ୍ଡିଆନ୍ସକୁ ହରାଇଥିଲା। ତେଣୁ କ୍ରିକେଟ୍ପ୍ରେମୀ ମଙ୍ଗଳବାର ଆଉ ଏକ ରୋମାଞ୍ଚକ ମ୍ୟାଚ୍ ଆଶା ରଖିଛନ୍ତି।