ନୂଆଦିଲ୍ଲୀ,୨୧।୨: ଇଂଲଣ୍ଡ ବିପକ୍ଷ ଟି୨୦ ସିରିଜ୍ ପାଇଁ ଭାରତର ୧୯ ସଦସ୍ୟ ବିଶିଷ୍ଟ ଟିମ୍ର ଘୋଷଣା କରାଯାଇଛି। ଏଥିରେ ଅନେକ ନୂଆ ମୁହଁ ଦେଖିବାକୁ ମିଳିଛି। ସେଥିରୁ ଜଣେ ହେଲେ ହରିୟାଣାର ଅଲ୍ରାଉଣ୍ଡର ରାହୁଲ ଟେଓ୍ବାଟିଆ। ରାଜସ୍ଥାନ ରୟାଲ୍ସ ପକ୍ଷରୁ ଆଇପିଏଲ୍ ଖେଳିଥିବା ଟେଓ୍ବାଟିଆ ଆଇପିଏଲ୍ର ଗତ ସଂସ୍କରଣରେ ଉଲ୍ଲେଖନୀୟ ପ୍ରଦର୍ଶନ କରି ବାହା ବାଃ ସାଉଁଟିଥିଲେ। ପଞ୍ଜାବ ବିପକ୍ଷରେ ଏକ ଓଭରରେ ୫ ଛକା ମାରି ସେ ଚର୍ଚ୍ଚାକୁ ଆସିଥିଲେ। ଆଇପିଏଲ୍ରେ ନିଜର ପ୍ରଦର୍ଶନର ପୁରସ୍କାର ତାଙ୍କୁ ମିଳିଛି। ତାଙ୍କୁ ଭାରତୀୟ ଟିମ୍ରେ ଚୟନ କରାଯାଇଛି। ଏହାକୁ ନେଇ ସେ ବେଶ୍ ଖୁସି ଅଛନ୍ତି। ବିରାଟ କୋହଲିଙ୍କ ସହ ଡ୍ରେସିଂ ରୁମ୍ ଶେୟାର କରିବାକୁ ସେ ଅପେକ୍ଷା କରି ରହିଥିବା କହିଛନ୍ତି।
ଦଳରେ ନିଜକୁ ଦେଖିବା ପରେ କିଭଳି ଲାଗୁଛି ପ୍ରଶ୍ନରେ ଟେଓ୍ବାଟିଆ କହିଛନ୍ତି, ପ୍ରଥମେ ହରିୟାଣା ଟିମ୍ରେ ଏବଂ ଏବେ ପ୍ଲେଇଂ ଇଲେଭେନ୍ରେ ସ୍ଥାନ ପାଇବା ପରେ ମାନସିକ ରୂପରେ ସେ ଅଧିକ ମଜଭୂତ ହୋଇଛନ୍ତି। ଆତ୍ମବିଶ୍ୱାସ ବଢ଼ିଛି। ଅନ୍ତରାଷ୍ଟ୍ରୀୟ କ୍ରିକେଟର ମହାନ ଖେଳାଳିଙ୍କ ସହ ଡ୍ରେସିଂ ରୁମ୍ ଶେୟାର କରିବାକୁ ନେଇ ସେ ବେଶ୍ ଉତ୍ସାହିତ। ଆଇପିଏଲ୍ରେ ବିରାଟଙ୍କ ବିରୋଧରେ ଖେଳିଥିଲେ। ଏବେ ତାଙ୍କ ସହ ଖେଳିବି। ତାଙ୍କଠାରୁ ଶିଖିବା ଏବଂ ବୁଝିବା ପାଇଁ ସୁଯୋଗ ମିଳିବ ବୋଲି ସେ କହିଛନ୍ତି।