ଥିରୁଭାନନ୍ତପୁରମ୍, ୨୨ା୧୦: ହାଥ୍ରସରେ ପୀଡ଼ିତା ପରିବାରକୁ ଭେଟିବା ଲାଗି ଯିବା ବାଟରେ ଉତ୍ତରପ୍ରଦେଶ ପୋଲିସ କେରଳର ଖବରଦାତା ସିଦ୍ଦିକ କାପ୍ପାନଙ୍କ ସହ ଅନ୍ୟ ୩ ଜଣଙ୍କୁ ଗିରଫ କରିଥିଲା। ଇସ୍ଲାମିକ୍ ଆତଙ୍କବାଦୀ ସଙ୍ଗଠନ ପପୁଲାର ଫ୍ରଣ୍ଟ ଅଫ୍ ଇଣ୍ଡିଆ ଓ ଏହାର ମଥୁରା ଶାଖା ସହ ସମ୍ପର୍କ ରଖିବା ଅଭିଯୋଗରେ ସେମାନଙ୍କୁ ଗିରଫ କରାଯାଇଥିଲା। ଏହାକୁ ନେଇ ବୁଧବାର ସିଦ୍ଦିକଙ୍କ ସ୍ତ୍ରୀ ରାଇହାନାଥ ଓ୍ବାୟନାଡ୍ ଏମ୍ପି ତଥା କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଭେଟି ଏକ ସ୍ମାରକପତ୍ର ଦେଇଛନ୍ତି। ସିଦ୍ଦିକଙ୍କୁ ବିଭିନ୍ନ ଅଭିଯୋଗରେ ଛନ୍ଦିଦେବାର ଆଶଙ୍କା କରି ସେ ରାହୁଲଙ୍କୁ ନ୍ୟାୟ ଲାଗି ନିବେଦନ କରିଛନ୍ତି। ରାହୁଲ ଗତ ୩ ଦିନ ହେବ କେରଳ ଗସ୍ତରେ ଥିବାବେଳେ କାଲ୍ପେଟ୍ଟା ଗେଷ୍ଟହାଉସ୍ଠାରେ ରାଇହାନାଥ ତାଙ୍କୁ ଭେଟିଥିଲେ। ସିଦ୍ଦିକ କୌଣସି ଭୁଲ୍ କାମ କରିନାହାନ୍ତି ଓ ତାଙ୍କ ସହ ସମ୍ପର୍କ ରକ୍ଷା ହୋଇପାରୁନି ବୋଲି ରାଇହାନାଥ ମିଡିଆକୁ କହିଛନ୍ତି। ପ୍ରକାଶଥାଉ କି, ଅକ୍ଟୋବର ୭ରେ ଦେଶଦ୍ରୋହ ମାମଲାରେ ୪ ଜଣଙ୍କୁ ଗିରଫ କରାଯାଇ ୧୪ ଦିନ ଲାଗି ବିଚାର ବିଭାଗୀୟ ହାଜତକୁ ପଠାଯାଇଥିଲା। ମଥୁରା କୋର୍ଟ ସେମାନଙ୍କ ହାଜତ ମିଆଦକୁ ପୁଣି ବୃଦ୍ଧି କରିଛନ୍ତି।
