ହାଇଦ୍ରାବାଦ୍, ୨।୫ : ଓସମାନିଆ ବିଶ୍ୱବିଦ୍ୟାଳୟରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ପ୍ରବେଶକୁ ମନା କରାଯାଇଛି। ବିଶ୍ୱବିଦ୍ୟାଳୟ କ୍ୟାମ୍ପସରେ ରାହୁଲଙ୍କ ଅଣ-ରାଜନୈତିକ ପରିଦର୍ଶନ ପାଇଁ ଅନୁମତି ଦିଆଯାଇନାହିଁ। ଯଦିଓ ଏହା ବିଷୟରେ ଆନୁଷ୍ଠାନିକ ଭାବେ କିଛି କୁହାଯାଇ ନାହିଁ, କିନ୍ତୁ ବିଶ୍ୱ ବିଦ୍ୟାଳୟର ଏହି ନିଷ୍ପତ୍ତି ତେଲେଙ୍ଗାନାରେ ଏକ ନୂତନ ରାଜନୈତିକ ବିବାଦ ସୃଷ୍ଟି କରିଛି।
ଇଣ୍ଡିଆନ ଏକ୍ସପ୍ରେସ ରିପୋର୍ଟ ଅନୁଯାୟୀ, କାର୍ଯ୍ୟନିର୍ବାହୀ କମିଟିର ଅଭିଯୋଗ ସମ୍ପର୍କରେ ବିଶ୍ୱବିଦ୍ୟାଳୟ ଏହି କାର୍ଯ୍ୟକ୍ରମର ଆୟୋଜକମାନଙ୍କୁ ଲିଖିତ ଆକାରରେ କୌଣସି ସୂ ଚନା ପ୍ରଦାନ କରାଯାଇ ନାହିଁ।
ଏନେଇ କଂଗ୍ରେସ ତେଲେଙ୍ଗାନା ରାଷ୍ଟ୍ରୀୟ ସମିତି ରାଜ୍ୟ ସରକାରଙ୍କୁ ଟାର୍ଗେଟ କରିଛି। ଏଥିସହିତ ରାହୁଲଙ୍କ ଗସ୍ତ ପାଇଁ ବିଶ୍ୱବିଦ୍ୟାଳୟକୁ ନିର୍ଦ୍ଦେଶ ଦେବା ପାଇଁ କିଛି ଛାତ୍ର ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ରବିବାର କଂଗ୍ରେସ ନେତାମାନେ କହିଛନ୍ତି ଯେ ସେମାନେ ଏପ୍ରିଲ ୨୩ ରେ ଏହି କାର୍ଯ୍ୟକ୍ରମ ପାଇଁ ଅନୁମତି ଲୋଡିଥିଲେ। ଏହି କାର୍ଯ୍ୟକ୍ରମଟି ଅଣ-ରାଜନୈତିକ ହେବ ବୋଲି ଅନୁମତି ପ୍ରତ୍ରରେ ଉଲ୍ଲେଖ କରାଯାଇଥିଲା।
ରିପୋର୍ଟ ଅନୁଯାୟୀ, ଜଣେ ଅଧିକାରୀ କହିଛନ୍ତି ଯେ ୨୦୧୭ ମସିହାରୁ କାର୍ଯ୍ୟନିର୍ବାହୀ ପରିଷଦ ଏକ ସଂକଳ୍ପ ଗ୍ରହଣ କରିଥିଲେ ଯେଉଁଥିରେ କ୍ୟାମ୍ପସରେ ରାଜନୈତିକ ବୈଠକ ସମେତ ଅଣ ଏକାଡେମିକ କାର୍ଯ୍ୟକଳାପ ଉପରେ ପ୍ରତିବନ୍ଧକ ଲଗାଯାଇଥିଲା। ଅଧିକାରୀ କହିଛନ୍ତି ଯେ ଜୁନ ୨୦୧୭ ରେ ଏଭଳି ପ୍ରସ୍ତାବ ଗ୍ରହଣ କରାଯାଇଥିଲା। ସେ କହିଛନ୍ତି ଯେ ଏକ ବର୍ଷ ପୂର୍ବେ ହାଇକୋର୍ଟ ରାଜ୍ୟ ସରକାରଙ୍କୁ ବିଶ୍ୱବିଦ୍ୟାଳୟ ପରିସରରେ ରାଜନୈତିକ ଏବଂ ସାଧାରଣ ସଭାକୁ ଅନୁମତି ନଦେବାକୁ ନିର୍ଦ୍ଦେଶ ଦେଇଛନ୍ତି। ସେହି ସମୟ ମଧ୍ୟରେ ରାଜନୈତିକ କାର୍ଯ୍ୟକଳାପ ଯୋଗୁଁ ଲଗାତାର ଅସୁବିଧା ହେତୁ ଏହି ପିଟିଶନ ଦାଖଲ କରାଯାଇଥିଲା।
ବିଶ୍ୱବିଦ୍ୟାଳୟ ଦ୍ୱାରା ନିଆଯାଇଥିବା ଏହି ନିଷ୍ପତ୍ତି ଯୋଗୁ କ୍ୟାମ୍ପସରେ ଉତ୍ତେଜନା ସୃଷ୍ଟି କରିଛି। ଶନିବାର ଦିନ ୟୁୟୁ ଆର୍ଟ କଲେଜରେ ବହୁ ଯୁବ କଂଗ୍ରେସ ନେତା ଓ ସମର୍ଥକ ଏନେଇ ପ୍ରଦର୍ଶନ କରିଥିଲେ। ଏଥି ସହିତ, ଏହାର ଜବାବରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ସହ ଜଡିତ ଛାତ୍ର ସଂଗଠନ ଏବଂ ଟିଆରଏସ ପକ୍ଷରୁ ଏହାର ବିରୋଧୀ ପ୍ରଦର୍ଶନ କରାଯାଇଥିଲା।
ରିପୋର୍ଟ ଅନୁଯାୟୀ, ତେଲେଙ୍ଗାନା ନିରୁଦୟୋଗ ବିଦ୍ୟାର୍ଥୀ ଯୁଗ୍ମ କାର୍ଯ୍ୟ ସମିତିର ମନବତା ରାୟ କହିଛନ୍ତି ଯେ ଏହି ନିଷ୍ପତ୍ତି ବିଷୟରେ ପ୍ରଶାସନ ଲିଖିତ ଭାବେ ଜଣାଇ ନାହାଁନ୍ତି। ସେ କହିଛନ୍ତି, ସୋମବାର ପ୍ରଶାସନ କିଛି ନୂଆ ପଦକ୍ଷେପ ଗ୍ରହଣ କରିବାର ଆଶା ରହିଛି।