ମୁମ୍ବାଇ, ୨୨।୪: ସମ୍ପ୍ରତି କରୋନାର ଦ୍ୱିତୀୟ ଲହରକୁ ନଜରରେ ରଖି ବିଭିନ୍ନ ରାଜ୍ୟ କଟକଣା ଜାରି କରିଛନ୍ତି। ଏପରି କି କିଛି ରାଜ୍ୟ ଲକ୍ଡାଉନ୍ ଲାଗୁ କରିଛନ୍ତି। କିନ୍ତୁ ଅର୍ଥନୈତିକ କାର୍ଯ୍ୟକଳାପକୁ ବନ୍ଦ କରାଗଲେ ଏହାଦ୍ୱାରା ବ୍ୟବସାୟ ପ୍ରତିଷ୍ଠାନ ସବୁଦିନ ପାଇଁ ବନ୍ଦ ହୋଇଯିବା ସହ ଲକ୍ଷ ଲକ୍ଷ ଲୋକ ଜୀବିକା ହରାଇବେ ବୋଲି ରିଟେଲର୍ସ ଆସୋସିଏଶନ ଅଫ୍ ଇଣ୍ଡିଆ(ଆର୍ଏଆଇ) ପକ୍ଷରୁ କୁହାଯାଇଛି। ଗତ ବର୍ଷ ଭଳି ଏବର୍ଷ ମଧ୍ୟ ରିଟେଲ ଇଣ୍ଡଷ୍ଟ୍ରି ବା ଖୁଚୁରା ବଜାର ସମାନ ପରିସ୍ଥିତି ଦେଇ ଗତି କରୁଛି। ଅଣ ଅତ୍ୟାବଶ୍ୟକ କିମ୍ବା ଅଣ ଖାଦ୍ୟ ବ୍ୟବସାୟ ଏବଂ ମଲ୍ଗୁଡ଼ିକୁ ତୀକ୍ଷ୍ମ ଓ କଟକଣା ମଧ୍ୟରେ ଚାଲୁ ରଖିବାକୁ ଅନୁମତି ଦେବାକୁ ଆର୍ଏଆଇ କହିଛି। ଅଣ ଅତ୍ୟାବଶ୍ୟକ ବା ଅଣ ଖାଦ୍ୟ ଖୁଚୁରା ବ୍ୟବସାୟ କିମ୍ବା ମଲ୍ ବନ୍ଦ କରିଦେବା ଦ୍ୱାରା ସମସ୍ୟାର ସମାଧାନ ହେବ ନାହିଁ। ଗତ ବର୍ଷ ଦୀର୍ଘ ଦିନ ଧରି ଆର୍ଥିକ କାରବାରକୁ ବନ୍ଦ କରିଦେବା ଫଳରେ ବ୍ୟବସାୟରେ ପ୍ରଭୂତ କ୍ଷତି ଘଟିଥିଲା। ଏଥର ଯଦି ସେପରି କରାଯାଏ, ତେବେ ସବୁଦିନ ପାଇଁ ଖୁଚୁରା ବ୍ୟବସାୟ ପ୍ରତିଷ୍ଠାନଗୁଡ଼ିକ ବନ୍ଦ ହୋଇଯିବା ସହ ଲକ୍ଷ ଲକ୍ଷ ଲୋକ ଜୀବିକା ହରାଇବେ ବୋଲି ଆର୍ଏଆଇ ସିଇଓ କୁମାର ରାଜଗୋପାଳନ୍ କହିଛନ୍ତି। ପରିସ୍ଥିତିର ମୁକାବିଲା ପାଇଁ କୋଭିଡ୍ ଗାଇଡ୍ ଲାଇନ ଅନୁସାରେ ସୁରକ୍ଷା ବ୍ୟବସ୍ଥାକୁ ଗୁରୁତ୍ୱ ଦିଆଯିବା ସହ ସାମାଜିକ ଦୂରତା ଓ ସାନିଟାଇଜର ବ୍ୟବହାରକୁ ଯେପରି କଡ଼ାକଡ଼ି ଭାବେ ପାଳନ କରାଯିବ, ତା’ ଉପରେ ଗୁରୁତ୍ୱ ଦେବାକୁ ରାଜଗୋପାଳନ୍ କହିଛନ୍ତି।