ଲୋଇସିଂହା,୧।୧(ଡି.ଏନ୍.ଏ.): ବଲାଙ୍ଗୀର ଜିଲା ଲୋଇସିଂହା ବ୍ଲକ ଭାଲିଆମୁଣ୍ଡାର ଏକ ଗୋଦାମରେ ଜିଲା ଯୋଗାଣ ବିଭାଗ ଚଢାଉ କରି ବେଆଇନ ଗଚ୍ଛିତ ୪୩୯ ବସ୍ତା ଧାନକୁ ଜବତ କରିଛି । ଏହାପରେ ବ୍ଲକ ଅଞ୍ଚଳରେ ବେଆଇନ ଧାନ ବେପାର କରି ମୁନାଫା ଉଠାଇଥିବା ବେପାରୀଙ୍କ ମଧ୍ୟରେ ଛନକା ପଶିଛି। ଯୋଗୀସର୍ଡା ପାକ୍ସ ଅଧୀନ ବାଦିବାହାଲ ପଞ୍ଚାୟତ ଭାଲିଆମୁଣ୍ଡାଠାରେ ଆଗଲାପାଲି ଗ୍ରାମର ସଞ୍ଜୟ ସାହୁଙ୍କ ଏକ ଗୋଦାମ ରହିଛି। ସେଠାରେ ଶତାଧିକ ବସ୍ତା ଧାନ ବେଆଇନ ଚାଲାଣ ଉଦ୍ଦେଶ୍ୟରେ ଗଚ୍ଛିତ ଥିବା ଚଢାଉ ବେଳେ ଅତିରକ୍ତ ଜିଲା ଯୋଗାଣ ଅଧିକାରୀ ଓ ଅନ୍ୟାନ୍ୟ ଅଧିକାରୀ ଜାଣିବାକୁ ପାଇଥିଲେ। ସେଥିରୁ ୪୩୯ ବସ୍ତା ଧାନକୁ ଜବତ ଦେଖାଇଥିଲେ।
ବ୍ଲକର ଲୋଇସିଂହା, ବୁର୍ଡା, ଯୋଗୀସର୍ଡା, କନ୍ଦାଜୁରୀ, କୁଶଙ୍ଗ, କୁଶମେଲ ଗଡଶଙ୍କର ଡୁଙ୍ଗରିପାଲି, ରେଙ୍ଗାଲି, ବାଦିମୁଣ୍ଡା ଓ ସରଗାଡ ପାକ୍ସ ରହିଛି। ସମସ୍ତ ପାକ୍ସରେ ଧାନବିକ୍ରି ପାଇଁ ୪୭୯୨ ଚାଷୀ ପଞ୍ଜୀକୃତ ହୋଇଛନ୍ତି। ହେଲେ ବିବିଧ ସମସ୍ୟା ଯୋଗୁ କେତେକ ଚାଷୀ ନାମ ପଞ୍ଜୀକରଣ କରିପାରି ନାହାନ୍ତି। ସେମାନଙ୍କ ଧାନକୁ ବେପାରୀ ଅଣ୍ଡରରେଟରେ କିଣି କୌଶଳ କରି ପାକ୍ସରେ ବିକ୍ରି କରି ମୁନାଫା ଉଠାଇଥାନ୍ତି। ଯୋଗାଣ ବିଭାଗର ସ୍ଥାଣୁତାରୁ ଧାନବେପାରୀ ଏବେ ସକ୍ରିୟ ହୋଇ ପଡିଛନ୍ତି। ସେମାନଙ୍କୁ ପାକ୍ସ ଓ ମିଲର୍ସ ସହଯୋଗ କରି ଆସୁଛନ୍ତି। ଭାଲିଆମୁଣ୍ଡାରେ ଯୋଗାଣ ଓ ରାଜସ୍ବ ବିଭାଗ ଚଢାଉ କରି ବେଆଇନ ଗଚ୍ଛିତ ଧାନ ଜବତ କରିଛି। ଏହାପରେ ବେପାରୀ ଛାନିଆ ହେବା ସହ ବିଭିନ୍ନ ସର୍ତକତା ଅବଲମ୍ବନ କରିଥିବା ଜଣାପଡିଛି। ଘରେ ଧାନ ନ ରଖି ସମ୍ପକୀୟ କିମ୍ବା ପଡୋଶୀ ଘରେ ଧାନ ଓ ମାପ ମେଶିନ ରଖି କାରବାର ଚଳାଉଛନ୍ତି।