ପଦ୍ମପୁର,୨୦ା୮(ଡି.ଏନ.ଏ.): ଭଦ୍ରକ ଜିଲା ଚରମ୍ପା-ଧାମରା ନିର୍ମିତ ରେଳପଥ ପାଇଁ ଜମି ହରାଇଥିବା ସଦର ବ୍ଲକର ଶତାଧିକ ଲୋକ ଶୁକ୍ରବାର ଭଟତିରା-ଇଚ୍ଛାପୁରଠାରେ ରେଳରୋକୋ କରିଥିଲେ। ଧାମରା ବନ୍ଦର କର୍ତ୍ତୃପକ୍ଷଙ୍କ ଚାଷୀମାରଣ ନୀତି ବୋଲି ସେମାନେ ଅଭିଯୋଗ କରିବା ସହ ଜମିହରାଙ୍କ ପରିବାରର ଜଣେ ବ୍ୟକ୍ତିଙ୍କୁ କମ୍ପାନୀରେ ନିଯୁକ୍ତି ଦାବି କରି ଧାରଣାରେ ବସିଥିଲେ। ଏନେଇ ଟ୍ରେନ୍ ଚଳାଚଳ ବ୍ୟାହତ ହୋଇଥିଲା।
ଖବର ପାଇ ବିଡିଓ ମନୋଜ କୁମାର ବେହେରା, ଡିପିସିଏଲ୍ର ସତ୍ୟବ୍ରତ ନାୟକ, ସାବରଙ୍ଗ ଥାନା ଅଧିକାରୀ ମନୋରମା ବାରିକ, ଏସ୍ଆଇ ନିତେଇ ଚରଣ ମହାନ୍ତି, ଯତୀନ୍ଦ୍ର ନାଥ ସିଙ୍କୁ ପ୍ରମୁଖ ପହଞ୍ଚି ଆନ୍ଦୋଳନକାରୀଙ୍କୁ ବୁଝାଶୁଝା କରିଥିଲେ। ବନ୍ଦର କର୍ତ୍ତୃପକ୍ଷ ଆସନ୍ତା ୨୫ ତାରିଖରେ ଜମି ହରାଇଥିବା ଚାଷୀମାନଙ୍କ ସହ ଆଲୋଚନା କରି ସମାଧାନ ପାଇଁ ପ୍ରତିଶ୍ରୁତି ଦେବା ପରେ ସେମାନେ ଧାରଣାରୁ ଉଠିଥିଲେ। ବଣିଆ, କେଦାରପୁର, ବରହମପୁର, ବେନ୍ତାଳ ପଞ୍ଚାୟତର ହେମନ୍ତ କୁମାର ପାଢ଼ୀ, ଅକ୍ଷୟ ଦାସ, ଅଜୟ ସାମଲ, ତପନ ତ୍ରିପାଠୀ, ଉପେନ୍ଦ୍ର ପଲେଇ, ନରହରି ସାହୁ, ନିଶିକାନ୍ତ ପରିଡ଼ା, ପଦ୍ମଲୋଚନ ଦାସ ପ୍ରମୁଖ ଏଥିରେ ସାମିଲ ଥିଲେ।
ସୂଚନାଯୋଗ୍ୟ, ଉକ୍ତ ରେଳପଥ ପାଇଁ ସଦର ବ୍ଲକର ବିଭିନ୍ନ ପଞ୍ଚାୟତର ଶତାଧିକ ଏକର ଚାଷଜମିକୁ ରେଳ ବିଭାଗ ଅଧିଗ୍ରହଣ କରିଥିଲା। ଜମି ହରାଇଥିବା ଲୋକେ ଧାମରା ବନ୍ଦର କମ୍ପାନୀରେ ପରିବାରର ଜଣଙ୍କୁ ନିଯୁକ୍ତି ପାଇଁ କର୍ତ୍ତୃପକ୍ଷଙ୍କ ନିକଟରେ ଦାବି ରଖିଥିଲେ।
