ନୂଆଦିଲ୍ଲୀ,୨୨।୧୨: ଭାରତୀୟ ରେଳପଥ କ୍ୟାଟରିଂ ଆଣ୍ଡ ଟୁରିଜମ୍ କର୍ପୋରେଶନ (ଆଇଆର୍ସିଟିସି) ଲିମିଟେଡ୍ ପକ୍ଷରୁ ଏକ ୮ ଦିନିଆ ରେଳ ଟୁର୍ ଓ ଅନ୍ୟାନ୍ୟ ସେବା ଓ ସୁବିଧା ସମ୍ପର୍କରେ ଘୋଷଣା କରାଯାଇଛି। ବିଶେଷକରି ରେଳ ମନ୍ତ୍ରଣାଳୟ ଅଧୀନରେ କାର୍ଯ୍ୟ କରୁଥିବା ଆଇଆର୍ସିଟିସି ଲିମିଟେଡ୍ ଘରୋଇ ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ ଭାରତ ସରକାରଙ୍କ ‘ଦେଖୋ ଆପ୍ନା ଦେଶ’ ପଦକ୍ଷେପ ଅନୁଯାୟୀ ଏକ ସ୍ବତନ୍ତ୍ର ଟ୍ରେନ୍ ଯାତ୍ରା (ଶ୍ରୀଜଗନ୍ନାଥ ଯାତ୍ରା) ଭାରତ ଗୌରବ ପର୍ଯ୍ୟଟନ ଟ୍ରେନ୍ ଚଳାଇବାକୁ ଯାଉଛି। ଏପରିକି ଭାରତ ଗୌରବ ଟୁରିଷ୍ଟ ଟ୍ରେନ୍ ଉତ୍ତରପ୍ରଦେଶ, ବିହାର, ଝାଡ଼ଖଣ୍ଡ ଏବଂ ଓଡ଼ିଶା ଭଳି ରାଜ୍ୟର କେତେକ ପ୍ରମୁଖ ତୀର୍ଥକ୍ଷେତ୍ର ଏବଂ ଐତିହ୍ୟ ସ୍ଥଳକୁ ଅନ୍ତର୍ଭୁକ୍ତ କରିବ ବୋଲି ଜଣାପଡ଼ିଛି। ସେହିଭଳି ଅତ୍ୟାଧୁନିକ ଏସି ରେକ୍ ସହ ଉକ୍ତ ଟୁରିଷ୍ଟ ଟ୍ରେନ୍ ୨୦୨୩ ଜାନୁୟାରୀ ୨୫ରେ ଦିଲ୍ଲୀ ସଫଦରଜଙ୍ଗ ରେଳ ଷ୍ଟେଶନରୁ ଯାତ୍ରା ଆରମ୍ଭକରି ୨୦୨୩ ଫେବୃୟାରୀ ୧ରେ ଉକ୍ତ ଯାତ୍ରା ଶେଷ କରିବ। ଏହି ସମୟ ମଧ୍ୟରେ ତୀର୍ଥଯାତ୍ରୀମାନେ ପୁରୀର ଜଗନ୍ନାଥ ମନ୍ଦିର ବ୍ୟତୀତ ବାରାଣସୀ, ବୈଦ୍ୟନାଥ ଏବଂ ଗୟା ପରିଦର୍ଶନର କାର୍ଯ୍ୟକ୍ରମ ରହିଛି। ସେହିପରି ଉକ୍ତ ଟ୍ରେନ୍ରେ ପର୍ଯ୍ୟଟକମାନେ ଗାଜିଆବାଦ, ଆଲିଗଡ଼ ତୁଣ୍ଡଲା, ଇଟାୱା, କାନପୁର ଏବଂ ଲକ୍ଷ୍ନୌ ଷ୍ଟେଶନରେ ବୋର୍ଡିଂ (ଚଢ଼ିବା-ଓହ୍ଲାଇବା)ର ବିକଳ୍ପ ମଧ୍ୟ ପାଇବେ। ଏପରିକି ୭ ରାତ୍ରି ୮ ଦିନର ଟୁରିଷ୍ଟ ଟ୍ରେନ୍ ଯାତ୍ରା ପ୍ରାଚୀନ ପବିତ୍ର ସହର ବାରାଣସୀରୁ ଆରମ୍ଭ କରି ଗୟାରେ ଶେଷ କରି ଫେବୃୟାରୀ ୧ରେ ଦିଲ୍ଲୀକୁ ଫେରିବ।
ଅପରପକ୍ଷରେ ଏହି ସମ୍ପୂର୍ଣ୍ଣ ଶୀତତାପ ନିୟନ୍ତ୍ରିତ ପର୍ଯ୍ୟଟନ ଟ୍ରେନ୍ରେ ୧୧ଟି ତୃତୀୟ ଏସି କୋଚ୍, ଗୋଟିଏ ପ୍ୟାଣ୍ଟ୍ରି କାର୍ ଏବଂ ଦୁଇଟି ଏସ୍ଏଲ୍ଆର୍ ଉପଲବ୍ଧ। ଉଲ୍ଲେଖଯୋଗ୍ୟ, ଭାରତ ଗୌରବ ଟ୍ରେନ୍ ଯୋଜନା ଅଧୀନରେ ରେଳ ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ ଭାରତୀୟ ରେଳ ପ୍ରାୟ ୩୩% ରିହାତି ପ୍ରଦାନ କରୁଛି। ପ୍ରତ୍ୟେକ ବ୍ୟକ୍ତିଙ୍କ ପାଇଁ ୧୭,୫୦୦ ଟଙ୍କାରୁ ପ୍ୟାକେଜ ଆରମ୍ଭ ହେଉଛି।ଲୋକମାନେ ବହୁଳ ଭାବେ ଉକ୍ତ ପ୍ୟାକେଜର ଲାଭ ଉଠାଇବାପାଇଁ ଆଇଆର୍ସିଟିସି ପେଟିଏମ୍ ଏବଂ ରେଜରପେ ପେମେଣ୍ଟ ଗେଟ୍ୱେ ସହ ନିବନ୍ଧନ ହୋଇଛି। ) ପେମେଣ୍ଟ କରିବାକୁ ଉପଭୋକ୍ତା ୩, ୬, ୯, ୧୨, ୧୮ କିମ୍ବା ୨୪ ମାସର ଇଏମ୍ଆଇ ବିକଳ୍ପ ପାଇବେ। ) ଏହି ଇଏମ୍ଆଇ ଡେବିଟ୍-କ୍ରେଡିଟ୍ କାର୍ଡ ମାଧ୍ୟମରେ ପ୍ରଦାନ କରାଯାଇପାରିବ।) ଅଧିକ ବିବରଣୀ ପାଇଁ ଆଇଆର୍ସିଟିସି ୱେବ୍ସାଇଟ୍ www.irctctourism.com ପରିଦର୍ଶନ କରିପାରିବେ କିମ୍ବା ଆଇଆର୍ସିଟିସି ମୋବାଇଲ ନମ୍ବର ୮୨୮୭୯୩୦୭୪୯ ଏବଂ ୮୨୮୭୯୩୦୭୧୨ ସହ ଯୋଗାଯୋଗ ମଧ୍ୟ କରିପାରିବେ ବୋଲି ରେଳ ମନ୍ତ୍ରଣାଳୟ ପକ୍ଷରୁ କୁହାଯାଇଛି।