![](https://www.dharitri.com/wp-content/uploads/2022/02/Untitled-1-241.jpg)
ନୂଆଦିଲ୍ଲୀ,୨୧।୨(ପି.ଟି.): ବିନା ଟିକେଟରେ ରେଳଯାତ୍ରା କରୁଥିବା ଲୋକଙ୍କ ସଂଖ୍ୟା ବୃଦ୍ଧି ପାଉଛି। ୨୦୨୧-୨୨ ଆର୍ଥତ୍କ ବର୍ଷର ପ୍ରଥମ ୯ ମାସରେ ୧.୭୮ କୋଟିରୁ ଊର୍ଦ୍ଧ୍ୱ ଯାତ୍ରୀ ବିନା ଟିକେଟରେ ଏବଂ ଲଗେଜ୍ ବୁକ୍ ନ କରି ଯାତ୍ରା କରୁଥିବାବେଳେ ଧରାପଡ଼ିଛନ୍ତି। କୋଭିଡ୍ ପୂର୍ବରୁ ଅର୍ଥାତ୍ ୨୦୧୯-୨୦ ଆର୍ଥିକ ବର୍ଷ ତୁଳନାରେ ଏହା ୭୯ ପ୍ରତିଶତ ଅଧିକ ବୋଲି ଆର୍ଟିଆଇ ଆବେଦନ ବଳରେ ଜଣାପଡ଼ିଛି। ଏପରିକି ୨୦୨୦-୨୧ରେ କରୋନା ଜନିତ କଟକଣା ଲାଗୁ ହୋଇଥିବାବେଳେ ୨୭ ଲକ୍ଷ ବିନା ଟିକେଟ ଯାତ୍ରୀ ଧରାପଡ଼ିଥିଲେ। ମଧ୍ୟପ୍ରଦେଶର ଚନ୍ଦ୍ରଶେଖର ଗୌର ନାମକ ଆର୍ଟିଆଇ କର୍ମୀଙ୍କ ଆବେଦନ ଉପରେ ରେଲଓ୍ବେ ବୋର୍ଡ ଉପରୋକ୍ତ ତଥ୍ୟ ପ୍ରଦାନ କରିଛି। ଗତବର୍ଷ ଏପ୍ରିଲରୁ ଡିସେମ୍ବର ମଧ୍ୟରେ ୧.୭୮ କୋଟିରୁ ଊର୍ଦ୍ଧ୍ୱ ଲୋକ ବିନା ଟିକେଟ, ଅନୁପଯୁକ୍ତ ଟିକେଟ କିମ୍ବା ଲଗେଜ୍ ବୁକ୍ ନ କରି ଯାତ୍ରା କରୁଥିବାବେଳେ ଧରାପଡ଼ିଥିଲେ। ସେମାନଙ୍କଠାରୁ ୧,୦୧୭.୪୮ କୋଟି ଟଙ୍କା ଜରିମାନା ଆଦାୟ କରାଯାଇଥିଲା। କୋଭିଡ୍ କଟକଣା ହଟିଥିଲେ ମଧ୍ୟ ଅଧିକାଂଶ ଏକ୍ସପ୍ରେସ୍ ଓ ସୁପରଫାଷ୍ଟ ଟ୍ରେନ୍ ପାଇଁ ଅନ୍ଲାଇନ ଟିକେଟ ବୁକ୍ ହେବା ବିନା ଟିକେଟ ଯାତ୍ରା ବଢ଼ିବାର ଅନ୍ୟତମ ମୁଖ୍ୟ କାରଣ ବୋଲି କୁହାଯାଉଛି। ୨୦୧୯-୨୦ ଆର୍ଥିକ ବର୍ଷରେ ୧.୧୦ କୋଟି ବିନା ଟିକେଟ ଯାତ୍ରୀ ଧରାପଡ଼ିଥିଲେ ଓ ସେମାନଙ୍କଠାରୁ ୫୬୧.୭୩ କୋଟି ଟଙ୍କା ଜରିମାନା ଆଦାୟ ହୋଇଥିଲା। ସେହିପରି ୨୦୨୦-୨୧ ଆର୍ଥିକ ବର୍ଷରେ ୨୭.୫୭ ଲକ୍ଷ ଧରାପଡ଼ିଥିଲେ ଓ ସେମାନଙ୍କଠାରୁ ୧୪୩.୮୨ କୋଟି ଟଙ୍କା ଜରିମାନା ଆଦାୟ କରାଯାଇଥିଲା।