ସମ୍ବଲପୁର,୮ା୭(ଶୁଭାଶିଷ ପାଢ଼ୀ): ଦେଶରେ ରେଳ ଏକ ପ୍ରମୁଖ ସେବା ଭାବେ ପରିଗଣିତ ହୋଇଥାଏ। ପରିବହନର ଅନ୍ୟାନ୍ୟ ମାଧ୍ୟମଠାରୁ ଅପେକ୍ଷାକୃତ ଭାବେ ଏହା ଶସ୍ତା ହୋଇଥିବାରୁ ଯାତ୍ରୀମାନେ ତାହାର ସୁବିଧା ନେଇଥାନ୍ତି। ହେଲେ କିଛିବର୍ଷ ହେବ ରେଲଓ୍ବେ ତା’ର କେତେକ ଭାଗକୁ ଧୀରେ ଧୀରେ ଘରୋଇକରଣ କରିବାକୁ ବସିଛି। ଏହାକୁ ନେଇ ପୂର୍ବରୁ ବିରୋଧ ହୋଇଆସୁଥିଲା। ଏପରି କି ବିଭିନ୍ନ ରାଜନୈତିକ ଦଳ ସମାଲୋଚନା କରିଥିଲେ। ଷ୍ଟେଶନ ପରିଚାଳନା, ଠିକା କର୍ମଚାରୀ, ଯାତ୍ରୀଙ୍କୁ ଖାଦ୍ୟପାନୀୟ ଯୋଗାଇଦେବା ଭଳି ଅନେକ ଭାଗର ଘରୋଇକରଣ ହୋଇସାରିଛି। ଫଳରେ ଏହାର ବୋଝ ଯାତ୍ରୀଙ୍କ ଉପରେ ପଡୁଛି। ପ୍ରଥମ ଓ ଦ୍ୱିତୀୟ ଶ୍ରେଣୀ ଯାତ୍ରୀଙ୍କ ପାଇଁ ଥିବା ପ୍ରତୀକ୍ଷାଳୟରେ ପ୍ରିପେଡ୍ ସେବା ଲାଗୁ କରିଦିଆଯାଇଛି। ସମ୍ବଲପୁର ରେଳ ମଣ୍ଡଳ ଅଧୀନ ଟିଟିଲାଗଡ଼ ଓ ସମ୍ବଲପୁର ଷ୍ଟେଶନରେ ଜୁନ୍ ଶେଷ ସପ୍ତାହରୁ ଏହା ଲାଗୁ ହୋଇଛି। ଏହାକୁ ନେଇ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି।
ପୂର୍ବରୁ ଟ୍ରେନ୍ ବିଳମ୍ବ ହେଲେ ଯାତ୍ରୀମାନେ ପରିବାର ସହ ପ୍ରତୀକ୍ଷାଳୟରେ ଟ୍ରେନ୍କୁ ଅପେକ୍ଷା କରୁଥିଲେ। ଶୀତତାପ ନିୟନ୍ତ୍ରିତ କୋଠରି ଥିବାବେଳେ ସମସ୍ତ ସୁବିଧା ରହିଥିଲା। ବିଶେଷକରି ମହିଳା ଯାତ୍ରୀମାନେ ସୁରକ୍ଷିତ ମଣୁଥିଲେ। ଟ୍ରେନ୍ ଆସିବା ପରେ ଗନ୍ତବ୍ୟସ୍ଥଳକୁ ଯାଉଥିଲେ। ଏବେ ଉକ୍ତ ପ୍ରତୀକ୍ଷାଳୟ ଘରୋଇ ଏଜେନ୍ସିକୁ ଦିଆଯାଉଛି। ଟିକେଟ ଥିବା ଯାତ୍ରୀମାନେ ପ୍ରତୀକ୍ଷାଳୟରେ ଅପେକ୍ଷା କଲେ ସମୟ ଅନୁସାରେ ଟଙ୍କା ଦେବାକୁ ପଡୁଛି। ପ୍ରଥମ ଘଣ୍ଟାରେ ୨୦ ଟଙ୍କା ସହ ଜିଏସ୍ଟି ଓ ତା’ ପର ଯେତିକି ଘଣ୍ଟା ରହିବେ ଘଣ୍ଟା ପ୍ରତି ୧୫ ଟଙ୍କା ଲେଖାଏ ଦେବାକୁ ପଡ଼ୁଛି। ସେହିପରି ୫ରୁ ୧୨ବର୍ଷର ଶିଶୁମାନଙ୍କ ପାଇଁ ପ୍ରଥମ ଘଣ୍ଟାରେ ୧୦ ଟଙ୍କା ରହିଥିବା ବେଳେ ଅଧିକ ସମୟ ଲାଗି ଘଣ୍ଟା ପ୍ରତି ୧୦ ଟଙ୍କା ରହିଛି।
ଏ ସମ୍ପର୍କରେ ପୂର୍ବତନ ଲୋକ ସଭା ସଦସ୍ୟ ତଥା ରେଳପଥ ଯାତ୍ରୀ ସୁବିଧା କମିଟି ପ୍ରାକ୍ତନ ଉପଦେଷ୍ଟା ଭବାନୀ ଶଙ୍କର ହୋତା କହିଛନ୍ତି, ଆଜି ଦିନରେ ରେଳ ବିଭାଗ ଦୁର୍ଭାଗ୍ୟଜନକ ସ୍ଥିତିରେ ଚାଲୁଛି। ଘରୋଇକରଣ କରାଯିବା ଏକ ବଡ଼ ସମସ୍ୟା ଭାବେ ଉଭାହୋଇଛି। ଏହା ସମସ୍ତ ଶ୍ରେଣୀର ଯାତ୍ରୀଙ୍କ ଉପରେ ବୋଝ ହୋଇଛି। ଜଣେ ଯାତ୍ରୀ ଟିକେଟ କାଟିବା ପରେ ସର୍ବନିମ୍ନ ସେବା ଯୋଗାଇଦେବା ରେଳ ବିଭାଗର ଦାୟିତ୍ୱ। ହେଲେ ଶୋଷଣ କରାଯାଉଛି। ପାନୀୟ ଜଳ, ବିଶ୍ରାମ ଗୃହ, ଶୌଚାଳୟ, ଯାତ୍ରୀଙ୍କ ଧନଜୀବନ ସୁରକ୍ଷା ଦେବା ନିୟମ ମଧ୍ୟ ରହିଛି। ପ୍ରଥମ ଓ ଦ୍ୱିତୀୟ ଶ୍ରେଣୀ ଯାତ୍ରୀଙ୍କ ପାଇଁ ପ୍ରତୀକ୍ଷାଳୟରେ ଅଧିକ ସୁବିଧା ଉପଲବ୍ଧ ରହୁଥିଲା। ହେଲେ ଏବେ ପ୍ରିପେଡ୍ ସେବା ଲାଗୁକରି ଘରୋଇ ଏଜେନ୍ସି ଜରିଆରେ ଯାତ୍ରୀଙ୍କୁ ଲୁଟ୍ କରାଯାଉଛି। ଏହା ବନ୍ଦ ହେବା ଉଚିତ ବୋଲି ସେ କହିଥିଲେ। ଯାତ୍ରୀ ଡା. ସଞ୍ଜୀବ କୁମାର ମିଶ୍ର କହିଛନ୍ତି, ୫ଦିନ ତଳେ ଭୁବନେଶ୍ୱର ଯିବା ପାଇଁ ସମ୍ବଲପୁର ଷ୍ଟେଶନ ପ୍ରତୀକ୍ଷାଳୟକୁ ଯାଇଥିଲି। ସେଠାରେ ପ୍ରିପେଡ ସେବା ଲାଗୁ ହୋଇଥିବା କର୍ମଚାରୀଙ୍କଠାରୁ ଜାଣିଥିଲି। କର୍ମଚାରୀମାନେ ଘଣ୍ଟା ପ୍ରତି ଟଙ୍କା ଦେବାକୁ ପଡିବ ବୋଲି କହିଥିଲେ। ପରେ ଅସନ୍ତୋଷ ବ୍ୟକ୍ତ କରି ଫେରିଆସିଥିଲି। ଏହି ବ୍ୟବସ୍ଥା ଗ୍ରାହକମାନଙ୍କୁ ଶୋଷଣ କରିବା ଭଳି ହୋଇଛି। ସେବା ଯୋଗାଇବା ବଦଳରେ ବ୍ୟବସାୟ କରାଯାଉଛି ବୋଲି ସେ କହିଥିଲେ। ସମ୍ବଲପୁର ରେଳମଣ୍ଡଳ କର୍ତ୍ତୃପକ୍ଷ ସୂଚନା ଦେଇ କହିଛନ୍ତି, ଏହି ପ୍ରିପେଡ୍ ସେବା ସମଗ୍ର ଦେଶରେ ପର୍ଯ୍ୟାୟକ୍ରମେ ଲାଗୁ କରାଯାଉଛି। ସମ୍ବଲପୁର ଓ ଟିଟିଲାଗଡ଼ ଷ୍ଟେଶନରେ ଏହା ଲାଗୁ ହୋଇଥିବାବେଳେ ଅନ୍ୟାନ୍ୟ ଷ୍ଟେଶନରେ ଏହି ବ୍ୟବସ୍ଥା କରାଯିବ। ଘରୋଇ ଏଜେନ୍ସିକୁ ଦିଆଯାଇଥିଲେ ମଧ୍ୟ ଯାତ୍ରୀମାନଙ୍କୁ ଉଚ୍ଚମାନର ସୁବିଧା ଯୋଗାଇ ଦିଆଯିବ। ଏହା ମଧ୍ୟରେ ଖବରକାଗଜ, ବସିବା ପାଇଁ ଆରାମଦାୟକ ବ୍ୟବସ୍ଥା ସହ ଅନ୍ୟାନ୍ୟ ସୁବିଧା ରହିଛି ବୋଲି ସେ ସୂଚନା ଦେଇଥିଲେ।