ନୂଆଦିଲ୍ଲୀ: ୭୦୦ ମେଗାହର୍ଜ ବ୍ୟାଣ୍ଡରେ ରେଲଓ୍ବେକୁ ୫ ମେଗାହର୍ଜ ସ୍ପେକ୍ଟ୍ରମ ପ୍ରଦାନ ସଂକ୍ରାନ୍ତ ପ୍ରସ୍ତାବକୁ କେନ୍ଦ୍ର କ୍ୟାବିନେଟ ପକ୍ଷରୁ ବୁଧବାର ମଞ୍ଜୁରୀ ପ୍ରଦାନ କରାଯାଇଛି। ଏଭଳି ପଦକ୍ଷେପ ଦ୍ୱାରା ଭାରତୀୟ ରେଳପଥ ଏହାର ଯୋଗାଯୋଗ ଏବଂ ସିଗ୍ନାଲ ସିଷ୍ଟମକୁ ଉନ୍ନତୀକରଣ କରିବା ଦିଗରେ ସହାୟକ ହେବ ବୋଲି କେନ୍ଦ୍ର ମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି। ରେଳ ପରିବହନ ସେବାରେ ଯାତ୍ରୀଙ୍କ ସୁରକ୍ଷା ଦିଗରେ ଏହା ବିଶେଷଭାବେ ଯୋଗଦାନ ରଖିବ ବୋଲି ସେ ମତ ପ୍ରକାଶ କରିଛନ୍ତି। ଏଭଳି ସ୍ପେକ୍ଟ୍ରମ ପାଇବା ଦ୍ୱାରା ରେଲଓ୍ବେ ଏଲ୍ଟିଇ ଭିତ୍ତିକ ମୋବାଇଲ ଟ୍ରେନ୍ ରେଡିଓ କମ୍ୟୁନିକେଶନ ଏହାର ବିଭିନ୍ନ ରୁଟ୍ରେ ବ୍ୟବହାର କରିପାରିବ। ଏଭଳି ପ୍ରକଳ୍ପଗୁଡ଼ିକରେ ପ୍ରାୟ ୨୫ ହଜାର କୋଟି ଟଙ୍କା ବିନିଯୋଗ କରାଯିବା କାର୍ଯ୍ୟକ୍ରମ ରହିଛି। ଆଗାମୀ ୫ ବର୍ଷରେ ଏହି ପ୍ରକଳ୍ପକୁ ଶେଷ କରିବାକୁ ଯୋଜନା ରଖାଯାଇଛି ବୋଲି ରେଲଓ୍ବେ ପକ୍ଷରୁ ସୂଚନା ରହିଛି। ରେଲଓ୍ବେ ବର୍ତ୍ତମାନ ଏହାର ଯୋଗାଯୋଗ ନେଟ୍ଓ୍ବର୍କ ପାଇଁ ଅପ୍ଟିକାଲ ଫାଇବର ବ୍ୟବହାର କରୁଛି। ନୂଆ ସ୍ପେକ୍ଟ୍ରମ ପାଇବା ପରେ ହାଇସ୍ପିଡ୍ ରେଡିଓ ରିୟଲ ଟାଇମ୍ ଭିତ୍ତିରେ ଲାଭ କରିବ। ଉଭୟ ଯୋଗାଯୋଗ ଏବଂ ସିଗ୍ନାଲ ନେଟ୍ଓ୍ବର୍କ ଏହା ଦ୍ୱାରା ଦୃଢ଼ ହୋଇପାରିବ ବୋଲି ଆଶା କରାଯାଉଛି।