କୋକସରା, ୨।୧୧(ଡି.ଏନ.ଏ.)- କଳାହାଣ୍ଡି ଜିଲା କୋକସରା ବ୍ଲକରେ ଅଦିନିଆ ବର୍ଷା ଉଜାଡିଦେଲା ଚାଷୀଙ୍କ ସ୍ବପ୍ନ। ବର୍ଷାରେ ଶହଶହ ଏକର ଧାନ ଫସଲ କ୍ଷତିହୋଇ ଗଜା ହୋଇଯିବାରୁ ନାହିଁ ନ ଥିବା ସମସ୍ୟା ଭୋଗୁଛନ୍ତି ଚାଷୀ। ହେଲେ ବ୍ଲକର ମକା ଚାଷୀ ବି ଏଥିରୁ ବାଦ୍ ପଡିନାହାନ୍ତି। ଅଦିନିଆ ବର୍ଷା ଯୋଗୁ ଶତାଧିକ ଏକର ଚାଷ ଜମିର ମକା ବି ନଷ୍ଟ ହୋଇଯାଇଛି। ସତେ ଯେମିତି ଚାଷୀ ପିଛା ଗୋଡାଇଛି ସମସ୍ୟା। ଧାରକରଜ କରି ଚାଷୀମାନେ ଶହଶହ ଏକର ଚାଷ ଜମିରେ ମକା ଚାଷ କରିଥିଲେ। ଆଶାବାନ୍ଧି ଥିଲେ, ଏଥିରୁ ଦ୍ୱି ପଇସା ପାଇ ନିଜ ପରିବାର ପ୍ରତିପୋଷଣ କରିବା ସହ ଋଣ କରଜ ସୁଝିବେ। ହେଲେ ଶେଷରେ ଲଘୁଚାପ ଜନିତ ବର୍ଷା ଦାଉ ସାଜିଲା। ମଣ୍ଡି ବ୍ୟବସ୍ଥା ନ ଥିବାରୁ ଦଲାଲ ହିଁ ଏକମାତ୍ର ଭରସା। କୋକସରା ବ୍ଲକର ୨୨ଟି ପଞ୍ଚାୟତ ମଧ୍ୟରୁ କିଛି ପଞ୍ଚାୟତରେ ଜଳସେଚନ ଥିବା ବେଳେ ଅଧିକାଂଶ ପଞ୍ଚାୟତରେ ଜଳ ସେଚନ ବ୍ୟବସ୍ଥା ନ ଥିବାରୁ ଚାଷୀମାନେ ଧାନ ଚାଷ କରି ମରୁଡି ସମ୍ମୁଖିନ ହୋଇ ହତାଶ ହେବାରୁ ଶେଷରେ ମକା ଚାଷକୁ ଆପଣାଇ ମକା ଚାଷ କରିଛନ୍ତି। ହେଲେ ଗତ କିଛି ଦିନ ତଳର ଅଦିନିଆ ବର୍ଷା ମକା ଚାଷକୁ ମଧ୍ୟ ନଷ୍ଟ କରି ଦେଇଛି। ବର୍ଷା ପାଣି ଯୋଗୁ ମକାଗୁଡିକ କଳାପଡି ନଷ୍ଟ ହୋଇଛି। କୃଷି ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ କୋକସରା ବ୍ଲକରେ ଚଳିତ ବର୍ଷ ୫୭୬ ହେକ୍ଟର ଜମିରେ ମକା ଚାଷ କରାଯାଇଛି। ସେଥିମଧ୍ୟରୁ କୋତୋମୁଣ୍ଡା, ସାନପୋଡାଗୁଡା, ଭଏଁସାଲପଡା, କୁଲେରଗୁଡା, ଡାଲଗୁମା ଆଦି ଗ୍ରାମର ଚାଷୀମାନେ ମକା ଅମଳ କରି ମଞ୍ଜି ଛଡେଇବା ପାଇଁ ଖୋଲା ଆକାଶ ତଳେ ରଖିଥିଲେ। ହେଲେ ଲଘୁଚାପଜନିତ ବର୍ଷା ଭିଜି ମକାକୁ ନଷ୍ଟ କରିଦେଇଛି। କିଭଳି ମକା ବିକ୍ରି କରିବେ ସେ ନେଇ ଏବେ ଚିନ୍ତାରେ ଚାଷୀ। ବ୍ଲକର ମକା ଚାଷୀଙ୍କ ପାଇଁ ମକା ସୁଖାଇବା ପାଇଁ କୌଣସି ଫଡର ବ୍ୟବସ୍ଥା ନ ଥିବା ଓ ମଣ୍ଡିର ବ୍ୟବସ୍ଥା ନ ଥିବାରୁ ଶାଗ ମାଛ ଦରରେ ବିକ୍ରି କରିବାକୁ ବାଧ୍ୟ ହେଉଛନ୍ତି। ମକା ମଣ୍ଡି ପାଇଁ ଚାଷୀମାନେ ବିଭିନ୍ନ ସମୟରେ ଦାବି କରୁଥିଲେ ହେଁ ସରକାରଙ୍କ ପକ୍ଷରୁ ମଣ୍ଡିର ବ୍ୟବସ୍ଥା କରୁ ନ ଥିବାରୁ ଚାଷୀମାନେ ହତାଶ ହୋଇ କିଏ ବିଜୁ ଏକ୍ସପ୍ରେସ ୱେରେ ତମ୍ବୁ ପକାଇ ଦଲାଲଙ୍କୁ ଅପେକ୍ଷା କରୁଛନ୍ତି ତ କିଏ ନିଜ ବିଲରେ ଖୋଲା ଆକାଶ ତଳେ ରଖି ବିକ୍ରି କରିବା ପାଇଁ ଅନାଇ ବସିଛନ୍ତି। ସେହିପରି ଡାଲଗୁମା ପଞ୍ଚାୟତ ୩୦ ଚାଷୀ ପ୍ରାୟ ୩୦ ଏକର ଜମିରେ ମକା ଚାଷ କରିଥିଲେ। ହେଲେ ଲଘୁଜନିତ ଲଗାଣ ବର୍ଷା ଓ ପବନରେ ମକା ସବୁ ତଳେ ପଡି ଗଜା ହୋଇ ନଷ୍ଟ ହୋଇ ଅସୁବିଧାର ସମ୍ମୁଖିନ ହେଉଥିବା ଜଣାପଡିଛି। କିଏ ଘରୋଇ ଋଣ କରିଛି ତ କିଏ ସରକାରୀ, ବେସରକାରୀ ସଂସ୍ଥା ଠାରୁ ଋଣ କରିଛି। ଏପରି ସ୍ଥଳେ ମକା ବିକ୍ରି ଯିବା ଅସମ୍ଭବ ହୋଇପଡିଛି। ଏବେ ଚାଷୀ ମୁଣ୍ଡରେ ହାତମାରି ଜଗି ରହି ସରକାରୀ ସହାୟତା ଅପେକ୍ଷାକୁ ଜଗି ବସିଛି। ଏନେଇ କୋକସରା ବ୍ଲକ କୃଷି ଅଧିକାରୀ ସୁବ୍ରତ କୁମାର ପାଢ଼ୀଙ୍କୁ ପଚାରିବାରୁ କାଁଭାଁ ଚାଷୀଙ୍କ ମକା ଚାଷରେ ଫଙ୍ଗସ ହୋଇ କଳାପଡି ଯାଇଛି। ହେଲେ ବିଶେଷକ୍ଷତି ହୋଇ ନ ଥିବାବେଳେ ମକା ଚାଷ ଇନସୁରେବୁଲ ନୁହେଁ ବୋଲି କହିଛନ୍ତି।