ଲେଫ୍ରିପଡ଼ା/କୁତ୍ରା,୧୫।୮(ଡି.ଏନ୍.ଏ.): ରାଜ୍ୟରେ ଲଘୁଚାପଜନିତ ବର୍ଷା ଲାଗି ରହିଥିବା ବେଳେ ସୁନ୍ଦରଗଡ଼ ଜିଲା ଲେଫ୍ରିପଡା ଓ କୁତ୍ରା ବ୍ଲକ ଅଞ୍ଚଳରେ ରବିବାର ବର୍ଷା ବିତ୍ପାତ ଦେଖିବାକୁ ମିଳିଛି। ଉଭୟ ବ୍ଲକରେ ଲୋକଙ୍କ ମାଟିଘର ଭାଙ୍ଗିଯାଇଛି। ପୂର୍ବରୁ ଲେଫ୍ରିପଡା ବ୍ଲକରେ ଅଭାବୀ ବର୍ଷା ହେବାରୁ ଚାଷ କାର୍ଯ୍ୟ ବହୁତ ମାତ୍ରାରେ ବାଧାପ୍ରାପ୍ତ ହୋଇଛି। ଦୀର୍ଘ ତିନି ଦିନରୁ ଊର୍ଦ୍ଧ୍ୱ ଅଳ୍ପ ପରିମାଣରେ ବର୍ଷା ଜାରି ହେଉଥିଲେ ମଧ୍ୟ ଶନିବାରଠାରୁ ବର୍ଷା ପରିମାଣ ବଢିଥିଲା। ଶନିବାର ରାତି ସାରା ବର୍ଷା ଲାଗି ରହିଥିବାରୁ ଅଞ୍ଚଳର ପ୍ରାୟ ସମସ୍ତ କୂଅ, ପୋଖରୀ, ସମେତ ଜଳାଶୟରେ ପାଣି ଭର୍ତି ହୋଇଛି। ବର୍ଷା ଯୋଗୁ ବିଲ ବାଡ଼ିରେ ମଧ୍ୟ ପାଣି ଭର୍ତ୍ତି ହୋଇଥିବାବେଳେ ଚଳିତବର୍ଷ ଲେଫ୍ରିପଡା ବ୍ଲକରେ ପ୍ରବାହିତ ହୋଇଥିବା ଇଛା ନଦୀରେ ପ୍ରଥମ କରି ବନ୍ୟା ଜଳ ପ୍ରବାହିତ ହୋଇଛି। କ୍ରମାଗତ ଭାବେ ବର୍ଷା ଲାଗିରହିଥିବାରୁ ବହୁ ସଂଖ୍ୟାରେ କଚାଘର ଭାଙ୍ଗିଯିବାରୁ ପ୍ରଭାବିତ ପରିବାର ବହୁ କଷ୍ଟରେ ରହିଥିବା ଦେଖିବାକୁ ମିଳିଛି। ଏଥିରେ ସର୍ଗିପାଲି ଚକୁଳିର ତ୍ରିଲୋଚନ ସୁନାନୀ, ଶିଶିର ସମର୍ଥ, ସାବିତ୍ରୀ ଅର୍ଗଲ, ଚିନ୍ମୟ ଓରାମଙ୍କର ଘର ଭାଙ୍ଗି ଯାଇଥିବାବେଳେ ଏହି ଭଳି ଭାବେ ବହୁ ସଂଖ୍ୟାରେ ବିଭିନ୍ନ ପଞ୍ଚାୟତର ଗ୍ରାମରେ ଘର ଭାଙ୍ଗି ଥିବା ଜଣାପଡିଛି। ଚଳିତବର୍ଷ ପାଣି ଅଭାବରୁ ଚାଷ କାର୍ଯ୍ୟ ବହୁ ମାତ୍ରାରେ ପ୍ରଭାବିତ ହୋଇଥିବାବେଳେ ବର୍ତ୍ତମାନ ଲଗାଣ ଲଘୁଚାପ ଜନିତ ବର୍ଷାରେ ଘର ଭାଙ୍ଗିବା ଘଟଣା ଜନସାଧାରଣଙ୍କ ପାଇଁ ଆର୍ଥିକ ସ୍ଥିତି ଚିନ୍ତା ବଢ଼ାଇ ଦେଇଛି। ତେଣୁ ଏହି ଦିଗରେ ବର୍ଷା ଯୋଗୁ ପ୍ରଭାବିତ ପରିବାରଙ୍କୁ ଚିହ୍ନଟ କରାଯାଇ ସ୍ଥାନୀୟ ପ୍ରଶାସନ ପଦକ୍ଷେପ ନେବା ପାଇଁ ଅଞ୍ଚଳବାସୀଙ୍କ ପକ୍ଷରୁ ଦାବି ହେଉଛି। ସେହିପରି କୁତ୍ରା ବ୍ଲକ ଅନ୍ତର୍ଗତ ନୂଆଗାଁ ପଞ୍ଚାୟତ ଏଲଗା କଣ୍ଟାଝାର ଗ୍ରାମର ମୁକୁନ୍ଦ ନାଏକଙ୍କ ଘର ଧସି ଯାଇଛି। ତେବେ ଅଳ୍ପକେ ଘର ଲୋକ ଦୁର୍ଘଟଣାରୁ ବର୍ତ୍ତି ଯାଇଛନ୍ତି। କାହାରି କୌଣସି କ୍ଷତି ଘଟି ନାହିଁ। ଘର ଭିତରେ ମୁକୁନ୍ଦ ନାଏକ ଏବଂ ତାଙ୍କ ସ୍ତ୍ରୀ ଶୋଇଥିଲେ। ପ୍ରବଳ ବର୍ଷା ହେବାରୁ ଶୋଇଥିବା ଘରର ପଛପଟ କାନ୍ଥ ଧସି ଯାଇଛି। ଏହି ଘଟଣା ନେଇ କୁତ୍ରା ତହସିଲଦାର ରବିନ୍ଦ୍ର କୁମାର ସେଠୀଙ୍କ ପାଖକୁ ଖବର ଆସିବା ପରେ ତାଙ୍କ ଟିମ୍ ପଠାଇ ଘର ପରିଦର୍ଶନ କରି ଏହାର କ୍ଷୟକ୍ଷତି ଆକଳନ କରି ଏହାର କ୍ଷତିପୂରଣ ପ୍ରଦାନ କରାଯିବ ବୋଲି କହିଛନ୍ତି।
