କଟକ ଅଫିସ,୩।୧୦: ଗତ ଦୁଇଦିନ ଧରି ଲଘୁଚାପ ବର୍ଷାରେ କଟକ ସହରର ସ୍ଥିତି ସଙ୍ଗିନ ହୋଇପଡ଼ିଛି। ଡ୍ରେନଗୁଡିକ ଜାମ୍ ହୋଇପଡିଥିବାରୁ ବର୍ଷାଜଳ ଠିକ ଭାବେ ନିଷ୍କାସନ ହୋଇ ନ ପାରି ରାସ୍ତାକୁ ଉଦ୍ବୃତ୍ତ ହୋଇଆସିବା ସହ କେତେଜଣଙ୍କ ଘରେ ପଶିଥିଲା। ରାସ୍ତାରେ ଆଣ୍ଡୁଏ ଉଚ୍ଚର ପାଣି ଚାଲିବାରୁ ଲୋକେ ଯାତାୟାତ ଲାଗି ହଇରାଣ ହୋଇଛନ୍ତି। ଖଟବିନ ସାହି, ମହମ୍ମଦିଆ ବଜାର, ରାଣୀହାଟ, ରାଜାବଗିଚା ଲେବର କଲୋନୀ, ଅରୁଣୋଦେୟ ନଗର ଆଦି ସ୍ଥାନରେ ଏକପ୍ରକାର ଜଳବନ୍ଦୀ ଅବସ୍ଥା ଦେଖିବାକୁ ମିଳିଛି। ଶୁକ୍ରବାର ବର୍ଷାରେ ସିଡିଏ ଅଞ୍ଚଳରେ ଜଳବନ୍ଦୀ ଅବସ୍ଥା ସୃଷ୍ଟି ହୋଇଛି। ପୂର୍ବରୁ ଡ୍ରେନ ଜାମ ଥିବା ନେଇ ଅଞ୍ଚଳବାସୀ ସିଏମ୍ସିରେ ଅଭିଯୋଗ କରିଥିଲେ। ମାତ୍ର କର୍ତ୍ତୃପକ୍ଷ ଏହା ଜନସ୍ବାସ୍ଥ୍ୟ ବିଭାଗ କାର୍ଯ୍ୟ କହି ଚୁପ ବସିପଡ଼ିିଥିଲା। ଏବେ ଏଭଳି ସମସ୍ୟା ନେଇ ସ୍ଥାନୀୟ ବାସିନ୍ଦା ଅସନ୍ତୋଷ ପ୍ରକାଶ କରିଛନ୍ତି। ଦୀର୍ଘବର୍ଷ ଧରି ସହରକୁ ଜଳବନ୍ଦୀ ସମସ୍ୟାକୁ ଦୂର କରିବା ପାଇଁ ଜାଇକା କାମ ଚାଲିଛି ଯେ କେବେ ଶେଷ ହେବ ତାହା ବୁଝାପଡୁନାହିଁ। ସେହିପରି ଡ୍ରେନଗୁଡ଼ିିକ ସଫେଇ କରାଯାଇ ନ ଥିବାରୁ ଏବେ ଲୋକେ ପରିଣାମ ଭୋଗୁଛନ୍ତି ବୋଲି ସହରର କେତେଜଣ ବ୍ୟକ୍ତି କହିଛନ୍ତି।
