ନୂଆଦିଲ୍ଲୀ,୩୦।୩: ଦିଲ୍ଲୀ-ଏନ୍ସିଆର ଅଞ୍ଚଳରେ ଗୁରୁବାର ପୁଣି ଥରେ ବଜ୍ରପାତ ସହିତ ବର୍ଷା ହୋଇଛି। ବୁଧବାର ରାଜଧାନୀ ଏବଂ ଏହାର ଆଖପାଖ ଅଞ୍ଚଳରେ ମଧ୍ୟ ବର୍ଷା ହୋଇଥିଲା। ବୁଧବାର ଦିଲ୍ଲୀରେ ଘଣ୍ଟା ପ୍ରତି ୪୦ କିଲୋମିଟର ବେଗରେ ପବନ ବୋହିଥିଲା। ଆସନ୍ତା ୩ରୁ ୪ଦିନ ମଧ୍ୟରେ ରାଜଧାନୀ ମେଘୁଆ ରହିବା ସହ ହାଲୁକା ବର୍ଷା ଏବଂ ବଜ୍ରପାତ ହେବାର ସମ୍ଭାବନା ରହିଛି ବୋଲି ପାଣିପାଗ ବିଭାଗ ସୂଚନା ଦେଇଛି। ଆସନ୍ତା ୩ଦିନ ମଧ୍ୟରେ ସର୍ବାଧିକ ତାପମାତ୍ରା ୩ରୁ ୪ଡିଗ୍ରୀ ସେଲ୍ସିୟସ ହ୍ରାସ ପାଇବ ବୋଲି ଆଶା କରାଯାଉଛି। ଅନ୍ୟପଟେ ଦିଲ୍ଲୀର ଖରାପ ପାଗ ଯୋଗୁ ଗୁରୁବାର ସନ୍ଧ୍ୟାରେ ଦିଲ୍ଲୀ ବିମାନବନ୍ଦରରୁ ୧୭ଟି ବିମାନ ଉଡାଣକୁ ଡାଇଭର୍ଟ କରାଯାଇଛି। ଏହି ବିମାନଗୁଡ଼ିକୁ ଲକ୍ଷ୍ନୌ, ଜୟପୁର ଏବଂ ଡେରାଡୁନକୁ ଡାଇଭର୍ଟ କରାଯାଇଛି ବୋଲି ଜଣେ ଅଧିକାରୀ କହିଛନ୍ତି। ୧୭ବିମାନ ଉଡାଣରୁ ୮-୮ଟି ଲକ୍ଷ୍ନୌ ଏବଂ ଜୟପୁରକୁ ଯାଇଥିବା ବେଳେ ଗୋଟିଏ ବିମାନ ଡେରାଡୁନକୁ ପଠାଯାଇଛି ବୋଲି ସେ କହିଛନ୍ତି।
