ନୂଆଦିଲ୍ଲୀ, ୧୮।୮-ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପୂର୍ବରୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ଏ ସମ୍ପର୍କରେ କିଛି ଜଣାଇ ନ ଥିଲେ ସୁରେଶ ରାଇନା। ଅବସର ନେବା ପୂର୍ବରୁ ଖେଳାଳିମାନେ ବିସିସିଆଇକୁ ପ୍ରଥମେ ସୂଚନା ଦେବା ନିୟମ ରହିଛି, ଯାହାକି ଆଇକନିକ୍ ମହେନ୍ଦ୍ର ସିଂ ଧୋନୀ କରିଥିଲେ। ଏ ସମ୍ପର୍କରେ ସେ ପ୍ରୋଟୋକଲ ଭାଙ୍ଗି ଥିବାରୁ ସମ୍ଭବତଃ ରବିବାର ବିସିସିଆଇ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇ ନ ଥିଲା। ଏପରିକି ବିସିସିଆଇ ସଭାପତି ସୌରଭ ଗାଙ୍ଗୁଲି ଓ ସମ୍ପାଦକ ଜୟ ଶାହା ଧୋନୀଙ୍କ ଅବସର ସମ୍ପର୍କରେ ଯାହାକିଛି ଟୁଇଟ୍ କରିଥିଲେ। ବିସିସିଆଇ ଓ୍ବେସାଇଟ୍ରେ କେବଳ ଧୋନୀଙ୍କ ଅବସର ସମ୍ପର୍କରେ ସୂଚନା ରହିଥିଲା। ଫଳରେ କ୍ରିକେଟ ପ୍ରଶଂସକଙ୍କ ମନରେ ଦ୍ୱନ୍ଦ୍ୱ ସୃଷ୍ଟି ହୋଇଥିଲା। ସାଧାରଣରେ ଘୋଷଣା କରିବାର ଗୋଟିଏ ଦିନପରେ ବିସିସିଆଇକୁ ଅବସର ସମ୍ପର୍କରେ ଅବଗତ କରାଇଛନ୍ତି ଏହି ବାମହାତୀ ବ୍ୟାଟ୍ସମ୍ୟାନ। ବିସିସିଆଇ ପକ୍ଷରୁ ସୋମବାର ଏହା ପ୍ରକାଶ କରାଯିବା ସହିତ ସୀମିତ ଓଭର ଫର୍ମାଟରେ ଏହି ଅଲରାଉଣ୍ଡରଙ୍କ ପ୍ରଦର୍ଶନକୁ ପ୍ରଶଂସା କରାଯାଇଛି। ଅଗଷ୍ଟ ୧୫ରେ ଧୋନୀ ଅବସର ଘୋଷଣା କରିବାର କିଛି ମିନିଟ ପରେ ନିଜ ମେଣ୍ଟରଙ୍କ ପଦାଙ୍କ ଅନୁସରଣ କରି ଅନେକଙ୍କୁ ବିସ୍ମିତ କରିଥିଲେ ୩୩ ବର୍ଷୀୟ ରାଇନା। ନିଜ ୧୩ ବର୍ଷର ଅନ୍ତର୍ଜାତୀୟ କ୍ରିକେଟରେ ଭାରତ ପାଇଁ ସେ ୧୮ ଟେଷ୍ଟ, ୨୨୬ ଦିନିକିଆ ଓ ୭୮ଟି ଟି୨୦ ମ୍ୟାଚ ଖେଳିଛନ୍ତି। ସ୍ବଳ୍ପ ସମୟ ପାଇଁ ରାଇନା ଭାରତୀୟ ଦଳର ନେତୃତ୍ୱ ନେବାର ସୌଭାଗ୍ୟ ମଧ୍ୟ ପାଇଛନ୍ତି। ତାଙ୍କ ନେତୃତ୍ୱରେ ଭାରତ ଦିନିକିଆରେ ଓ୍ବେଷ୍ଟଇଣ୍ଡିଜ ବିପକ୍ଷରେ ୩-୨ ଓ ବାଂଲାଦେଶ ବିପକ୍ଷରେ ୨-୦ରେ ସିରିଜ ବିଜୟୀ ହୋଇଥିଲା। ସେହିପରି ଜିମ୍ବାଓ୍ବେ ବିପକ୍ଷରେ ଭାରତ ଏକ ଟି୨୦ ସିରିଜକୁ ୨-୦ରେ ଜିତିଥିଲା। ଟେଷ୍ଟ କ୍ୟାରିୟରର ପ୍ରଥମ ମ୍ୟାଚରେ ଶତକ ହାସଲ କରି ନିଜ ପ୍ରତିଭା ଦେଖାଇଥିଲେ ରାଇନା। ପ୍ରଥମ ଭାରତୀୟ ଭାବେ ସେ କ୍ରିକେଟର ତିନୋଟି ଯାକ ଫର୍ମାଟରେ ଶତକ ହାସଲ କରିଥିଲେ। ଭାରତ ବାହାରେ ସେ ଶତକ ହାସଲ କରି ନିଜ ଦକ୍ଷତାର ପ୍ରମାଣ ଦେଇଥିଲେ।
ବିସିସିଆଇ ସଭାପତି ସୌରଭ ଗାଙ୍ଗୁଲି ବାମହାତୀ ରାଇନାଙ୍କ ପ୍ରଶଂସାରେ ଶତମୁଖ ହୋଇଛନ୍ତି। ”ଭାରତୀୟ ଦିନିକିଆ କ୍ରିକେଟରେ ରାଇନା ଅନ୍ୟତମ ପ୍ରମୁଖ ପ୍ରଦର୍ଶନକାରୀ ଥିଲେ। ବ୍ୟାଟିଂ ଅର୍ଡରର ନିମ୍ନଭାଗରେ ଆସିଥିଲେ ହେଁ କେତେକ ମ୍ୟାଚ ବିଜୟୀ ଇନିଂସ ଖେଳି ସେ ନିଜ ଦକ୍ଷତାର ପରିଚୟ ଦେଇଛନ୍ତି। ରାଇନା, ଯୁବରାଜ ସିଂ ଓ ଧୋନୀଙ୍କ ଉପସ୍ଥିତିରେ ଭାରତୀୟ ମିଡଲ ଅର୍ଡର ଶକ୍ତିଶାଳୀ ହୋଇଥିଲା। ମୁଁ ତାଙ୍କୁ ଏବଂ ତାଙ୍କ ପରିବାରକୁ ଶୁଭେଚ୍ଛା ଜଣାଉଛି“ ବୋଲି ଗାଙ୍ଗୁଲି ପ୍ରକାଶ କରିଛନ୍ତି। ବିସିସିଆଇ ସମ୍ପାଦକ ଜୟ ଶାହା ମଧ୍ୟ ସମାନ ମତବ୍ୟକ୍ତ କରିଛନ୍ତି। ”ରାଇନା ଜଣେ କୁଶଳୀ ଟି୨୦ ବ୍ୟାଟ୍ସମ୍ୟାନ। ବାମହାତୀ ବ୍ୟାଟ୍ସମ୍ୟାନଭାବେ ସେ କ୍ରିକେଟ ପଡ଼ିଆରେ ଶକ୍ତିଶାଳୀ ଶଟ୍ ମାଧ୍ୟମରେ ନିଜ ଦକ୍ଷତା ଦେଖାଇଥିଲେ। ୨୦୧୧ ବିଶ୍ୱକପ କ୍ୱାର୍ଟର ଫାଇନାଲରେ ଅଷ୍ଟ୍ରେଲିଆ ବିପକ୍ଷରେ ଇନିଂସ ତାଙ୍କ କ୍ୟାରିୟରକୁ ରୁଦ୍ଧିମନ୍ତ କରିଛି। କ୍ୟାରିୟରର ଦ୍ୱିତୀୟ ଇନିଂସ ପାଇଁ ଶୁଭକାମନା“ ବୋଲି ଶାହା କହିଛନ୍ତି। ରାଇନା ୨୦୧୮ରେ ଶେଷଥର ପାଇଁ ଭାରତ ପକ୍ଷରୁ ଖେଳିଥିଲେ।
