ଲକ୍ଷ୍ନୌ, ୧।୮: ଏକଦା ଭାରତୀୟ ସୀମିତ ଓଭର କ୍ରିକେଟ୍ ଦଳର ନିର୍ଭରଯୋଗ୍ୟ ମଧ୍ୟକ୍ରମ ବ୍ୟାଟ୍ସମ୍ୟାନ ରହିଥିବା ସୁରେଶ ରାଇନା ଖରାପ ଫର୍ମ ଲାଗି କିଛିବର୍ଷ ହେବ ଦଳରୁ ବାଦ୍ ପଡ଼ିଛନ୍ତି। ଏହାସତ୍ତ୍ୱେ ରାଇନା ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ରେ ବେଶ୍ ସକ୍ରିୟ ରହିଛନ୍ତି। ରନ୍ ସଂଗ୍ରହ କରିବାର କ୍ଷୁଧା ରାଇନାଙ୍କ ଏବେ ମଧ୍ୟ କମି ନାହିଁ। ସେପ୍ଟେମ୍ବର ୧୯ରୁ ଆରମ୍ଭ ହେବାକୁ ଥିବା ଆଇପିଏଲ୍ର ତ୍ରୟୋଦଶ ସଂସ୍କରଣରେ ଦମ୍ଦାର ପ୍ରଦର୍ଶନ କରି ପୁଣିଥରେ ଜାତୀୟ ଦଳକୁ ପ୍ରତ୍ୟାବର୍ତ୍ତନ କରିବା ଲାଗି ଏହି ଉତ୍ତର ପ୍ରଦେଶ କ୍ରିକେଟର୍ ଏବେ କଠିନ ଅଭ୍ୟାସ ଜାରି ରଖିଛନ୍ତି। ତେବେ ଜଣେ ଖୋଲ ହୃଦୟର ବ୍ୟକ୍ତି ଭାବେ ଜଣାଶୁଣା ରାଇନା ଏହି ଅବସରରେ ମୌସୁମୀକୁ ବେଶ୍ ମନଭରି ଉପଭୋଗ କରୁଛନ୍ତି। ଯାହା ରାଇନା ସୋସିଆଲ୍ ମିଡିଆ ଇନ୍ଷ୍ଟାଗ୍ରାମରେ ଶେୟାର କରିଥିବା ଏକ ଭିଡିଓରୁ ଜଣାପଡ଼ିଛି।
ଶନିବାର ରାଇନା ତାଙ୍କ ଇନ୍ଷ୍ଟାଗ୍ରାମ୍ ପୃଷ୍ଠାରେ ଏକ ଭିଡିଓ ଶେୟାର କରିଛନ୍ତି। ଯେଉଁଥିରେ ସେ ବର୍ଷାକୁ ଉପଭୋଗ କରୁଥିବା ଦେଖିବାକୁ ମିଳିଛି। ବିଶେଷ କରି ରାଇନା ନିଜ ଗାର୍ଡେନରେ ପବନରେ ପରିପୂର୍ଣ୍ଣ ପ୍ଲାଷ୍ଟିକର ଏକ ଛୋଟିଆ ସୁଇମିଂ ପୁଲ୍ରେ ବସିଛନ୍ତି। ଏହି ସମୟରେ ବର୍ଷା ଜୋର୍ରେ ପକାଉଥିଲେ ମଧ୍ୟ ରାଜକୀୟ ଢ଼ଙ୍ଗରେ ବସିରହି ରାଇନା ବର୍ଷାର ପୁରା ମଜା ଉଠାଉଛନ୍ତି। ଏହି ଭିଡିଓକୁ ଅନେକ ଦର୍ଶକ ପସନ୍ଦ କରିଥିବା ଜଣାପଡ଼ିଛି।