ନୂଆଦିଲ୍ଲୀ, ୨।୯(ପି.ଟି.): ଦିଲ୍ଲୀରେ ଗୋଟିଏ ଦିନରେ ୧୧୨.୧ ମିଲିମିଟର ବର୍ଷା ରେକର୍ଡ କରାଯାଇଛି। ଗତ ୧୯ ବର୍ଷ ମଧ୍ୟରେ ସେପ୍ଟେମ୍ବର ମାସର ଗୋଟିଏ ଦିନରେ ଏହା ସର୍ବାଧିକ ବୃଷ୍ଟିପାତ ବୋଲି ଭାରତୀୟ ପାଣିପାଗ ବିଭାଗ ପକ୍ଷରୁ କୁହାଯାଇଛି। ଏହା ପୂର୍ବରୁ ୨୦୦୨ ସେପ୍ଟେମ୍ବର ୧୩ରେ ୧୨୬.୮ ମିଲିମିଟର ବର୍ଷା ହୋଇଥିଲା। ୧୯୬୩ ସେପ୍ଟେମ୍ବର ୧୬ରେ ହୋଇଥିବା ୧୭୨.୬ ମିଲିମିଟର ବର୍ଷା ହେଉଛି ସର୍ବକାଳୀନ ରେକର୍ଡ।
ମଙ୍ଗଳବାରଠାରୁ ବୁଧବାର ସକାଳ ୮ଟା ୩୦ ମଧ୍ୟରେ ସଫଦରଜଙ୍ଗ ଅଞ୍ଚଳରେ ୧୧୨.୧ ମି.ମି. ବର୍ଷା ହୋଇଥିବାବେଳେ ଲୋଧିରୋଡ, ରିଜ୍, ପାଲାମ, ଆୟାନଗରରେ ଯଥାକ୍ରମେ ୧୨୦.୨, ୮୧.୬. ୭୧.୧ ଏବଂ ୬୮.୨ ମିଲିମିଟର ବର୍ଷା ହୋଇଛି। ପ୍ରବଳ ବର୍ଷା ଯୋଗୁ ଦିଲ୍ଲୀର ଅନେକ ଅଞ୍ଚଳ ବୁଡ଼ିଯାଇଛି। ରାସ୍ତାରେ ଆଣ୍ଠୁଏ ଉଚ୍ଚର ପାଣି ଚାଲୁଥିବାରୁ ଆଇଟିଓ, ଆଇପି ଇଷ୍ଟେଟ୍ ଫ୍ଲାଏଓଭର ନିକଟବର୍ତ୍ତୀ ରିଙ୍ଗ ରୋଡ, ଧଉଳା କୁଆଁ ଏବଂ ରୋହତକ ରୋଡ୍ ଆଦି ବିଭିନ୍ନ ସ୍ଥାନରେ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଛି। ମାତ୍ର ୩ ଘଣ୍ଟା ମଧ୍ୟରେ ୭୫.୬ ମିଲିମିଟର ବର୍ଷା ହୋଇଥିଲା।