ପାଟନା, ୨୮।୬- ବିହାରରେ ଗତ ଦୁଇଦିନ ଧରି ଲଗାଣ ବର୍ଷା ଯୋଗୁ ରାଜଧାନୀ ପାଟନାରେ ସ୍ଥିତି ବେହାଲ ହୋଇପଡ଼ିଛି। ସହର ତଳିଆ ଅଞ୍ଚଳ ଜଳାର୍ଣ୍ଣବ ହୋଇଯାଇଥିବାବେଳେ ରାଜ୍ୟ ସରାକାରଙ୍କ ସଡ଼କ ନିର୍ମାଣ ମନ୍ତ୍ରୀ ନନ୍ଦକିଶୋର ଯାଦବଙ୍କ ବାସଭବନରେ ପାଣି ପଶିଯାଇଥିବା ଜଣାପଡ଼ିଛି। ମନ୍ତ୍ରୀଙ୍କ ଘରେ ପାଣି ପଶିଥିବାର ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଖରାପ ରାସ୍ତା ନିର୍ମାଣ ସାଙ୍ଗକୁ ଜଳ ନିଷ୍କାସନ ପାଇଁ ସୁବନ୍ଦୋବସ୍ତ ହୋଇ ନ ଥିବାରୁ ଏଭଳି ଘଟିଲା ବୋଲି କିଛି ଲୋକ ସୋସିଆଲ ମିଡିଆରେ ପ୍ରତିକ୍ରିୟା ରଖିଛନ୍ତି। ସେହିଭଳି ରାଜେଡି ନେତା ତେଜସ୍ବୀ ଯାଦବ ନୀତିଶ କୁମାର ସରକାରଙ୍କୁ ଘେରିଛନ୍ତି। ବନ୍ଧ କାମ ଅଧାରେ ବନ୍ଦ ରହିଥିବାରୁ ଉତ୍ତର ବିହାର ବିପଦରେ ରହିଛି ବୋଲି ସେ କହିଛନ୍ତି।
