ଡେରାବିଶ,୧୬ା୮(ସ୍ବ.ପ୍ର.): କେନ୍ଦ୍ରାପଡ଼ା ଜିଲା ଡେରାବିଶ ବ୍ଲକ ଅଞ୍ଚଳରେ ଶୁକ୍ରବାର ରାତିରୁ ହେଉଥିବା ଲଗାଣ ବର୍ଷା ନାହିଁ ନ ଥିବା କ୍ଷତି ପହଞ୍ଚାଇଛି। ଏହି ବ୍ଲକ ଅଞ୍ଚଳରେ ଚଳିତ ସପ୍ତାହରେ ବିଲରେ ରୁଆ ହୋଇଥିବା ଧାନ ଫସଲ ସମ୍ପୂର୍ଣ୍ଣ ପାଣିରେ ବୁଡ଼ି ରହିଛି। ଏପରିକି ଏହି ବ୍ଲକ ଅଞ୍ଚଳର ଚାଷୀମାନେ ନିଜ ଚାଷଜମିରେ ରୋଇବାକୁ ଥିବା ଧାନ ତଳିକୁ ବିଲରେ ରଖିଥିଲେ। ସେସବୁ ତଳିଗଛ ବର୍ଷାଜଳରେ ସମ୍ପୂର୍ଣ୍ଣ ଭାସିଯାଇଛି। ଫଳରେ ଚାଷୀମାନେ ମୁଣ୍ଡରେ ହାତ ଦେଇ ବସିଛନ୍ତି। ଏପରିକି ଏହି ବ୍ଲକ ଅଧୀନ ଯଅଁରାବାରିମୂଳ, ଇନ୍ଦାଳୋ, ହରିଅଙ୍କ, ବସପୁର ସମେତ ବହୁ ପଞ୍ଚାୟତରେ ବ୍ୟାପକ ପନିପରିବା ଫସଲ ନଷ୍ଟ ହୋଇଥିବାର ଦେଖାଯାଇଛି। ରବିବାର ଅପରାହ୍ନ ଯାଏ ବର୍ଷା ଜଳ ନିଷ୍କାସିତ ନ ହେବାରୁ ଚାଷ ଓ ପନିପରିବା ଫସଲ ସମ୍ପୂର୍ଣ୍ଣ ଉଜୁଡ଼ି ଯିବାର ସମ୍ଭାବନା ରହିଥିବା ଚାଷୀ ଅଜୟ କୁମାର ବଳ, କୃତୀବାସ ଦାସ କହିଛନ୍ତି। ଏ ବିଷୟରେ ବିଡିଓ ଗୋପବନ୍ଧୁ ଭୋସାଗରଙ୍କୁ ଯୋଗାଯୋଗ କରିବାରୁ ସେ କହିଲେ, ବର୍ଷା ଜଳ ନିଷ୍କାସିତ ହେବା ପରେ କ୍ଷୟକ୍ଷତିର ଆକଳନ କରାଯାଇ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ରିପୋର୍ଟ ପ୍ରଦାନ କରାଯିବ।