ବର୍ଷାଦିନେ ଫ୍ଲୁ ଏବଂ ବ୍ୟାକ୍ଟେରିଆର ସଂକ୍ରମଣ ବହୁତ ବଢ଼ି ଯାଇଥାଏ। ତେଣୁ ଏହି ଋତୁରେ ଖାଦ୍ୟପେୟର ଭଲଭାବେ ଯତ୍ନ ନେବା ଜରୁରୀ। ସଂକ୍ରମଣରୁ ରକ୍ଷା ପାଇବା ପାଇଁ ଏହି ଋତୁରେ କେଉଁ ଖାଦ୍ୟ ଉପରେ
ଗୁରୁତ୍ୱ ଦେବାକୁ ହେବ ଜାଣି ରଖନ୍ତୁ…
ଲେମନ ଗ୍ରାସ୍
ଲେମନ ଗ୍ରାସର ତେଲ ରୋଗ ପ୍ରତିରୋଧକ ଶକ୍ତି ବା ଇମ୍ୟୁନିଟି ପାଓ୍ବାର ବଢାଇବାରେ ବେଶ୍ ଫଳପ୍ରଦ ହୋଇଥାଏ। ଜ୍ୱର, ଥଣ୍ଡା, କାଶ ଆଦି ହେଲେ ଏହାର ବ୍ୟବହାର କରାଯାଇଥାଏ।
ଅଦା
ପ୍ରତିଦିନ ଅଦା ଖାଇବା ଦ୍ୱାରା ଇମ୍ୟୁନିଟି ବଢ଼ିଥାଏ। ଏହା ଏକ ଔଷଧ ଭଳି କାମ କରିଥାଏ। ଏଥିରେ ମାଇକ୍ରୋବିୟଲ ଓ ଆଣ୍ଟିଫଙ୍ଗାଲ ତତ୍ତ୍ୱ ରହିଛି। ଏହାକୁ ତରକାରି ବ୍ୟତୀତ ଜୁସ୍, ସୁପ୍ ଓ ଚଟଣିରେ ବ୍ୟବହାର କରିହେବ।
ହଳଦୀ
ଏଥିରେ ଆଣ୍ଟି ଅକ୍ସିଡାଣ୍ଟ ଥିବାରୁ ଶରୀରର ରୋଗପ୍ରତିରୋଧକ ଶକ୍ତି ବୃଦ୍ଧି କରିବାରେ ସହାୟକ ହୁଏ। ୧ ଚାମଚ ଗୋଲମରିଚ ଗୁଣ୍ଡ ସହ ୧ ଚାମଚ ହଳଦୀ ଗୁଣ୍ଡ ଓ ୧ ଚାମଚ ସୁଣ୍ଠି ବା ଅଦା ଗୁଣ୍ଡକୁ ଏକ କପ୍ ପାଣିରେ ପକାଇ ଫୁଟାନ୍ତୁ। ପାଣି ଅଧା ହୋଇଗଲେ ଏହାକୁ ଥଣ୍ଡା କରି ପିଅନ୍ତୁ।
ତୁଳସୀ
ଏଥିରେ ଆଣ୍ଟି ବାୟୋଟିକ୍ ଗୁଣ ଥିବାରୁ ଏହା ଭାଇରସ୍ ସହିତ ଲଢିବା ପାଇଁ ଶକ୍ତି ଯୋଗାଇ ଥାଏ। ତେଣୁ ଏକ ଚାମଚ ଲବଙ୍ଗ ଗୁଣ୍ଡ ସହିତ କିଛି ତୁଳସୀ ପତ୍ର ପକାଇ ସିଝାନ୍ତୁ। ଏହାକୁ ଛାଣି ପ୍ରତି ଘଣ୍ଟାରେ ଥରେ ଲେଖାଏଁ ପିଅନ୍ତୁ, ଆରାମ ଲାଗିବ।
ଧନିଆ
ଭାଇରାଲ୍ ଜ୍ୱର ଭଲ କରିବା ପାଇଁ ଧନିଆ ଚା’ ଔଷଧ ଭଳି କାମ କରିଥାଏ। ବର୍ଷାଦିନେ ଏହାକୁ ସବୁଦିନ ପିଇଲେ ଦେହ ସୁସ୍ଥ ରହିବ।
