ତିହିଡି,୫।୩(ସଞ୍ଜିତ ବଳ): ଯାଦବମାନେ ସବୁ କ୍ଷେତ୍ରରେ ଅବହେଳିତ। ଏପରିକି ମୌଳିକ ଅଧିକାରରୁ ବଞ୍ଚିତ ହୋଇଥିବା ଅଭିଯୋଗ କରିଆସୁଥିଲେ ମଧ୍ୟ ସେମାନଙ୍କ ଦାବି ପ୍ରତି ସରକାର କର୍ଣ୍ଣପାତ କରୁନାହାନ୍ତି। ଆସନ୍ତା ୭ ତାରିଖରେ ତିହିଡ଼ି କାଳୀପଡ଼ିଆରେ ଅନୁଷ୍ଠିତ ହେବାକୁ ଥିବା ଯାଦବ ଜାଗୃତି ସମାବେଶ ଓ ପଛୁଆବର୍ଗ ବନ୍ଧୁମିଳନ ଉତ୍ସବରେ ପ୍ରତିବାଦର ସ୍ବରକୁ ତୀବ୍ର କରାଯିବ। ଦୀନଦୟାଲ ଭବନରେ ଅନୁଷ୍ଠିତ ଖବରଦାତା ସମ୍ମିଳନୀରେ ଅଲ୍ ଓଡ଼ିଶା ଯାଦବ ମହାସଭା ତିହିଡ଼ି ଶାଖାର କର୍ମକର୍ତ୍ତାମାନେ ଏନେଇ ଚେତାବନୀ ଦେବା ସହ ସମାବେଶକୁ ସଫଳ କରିବାକୁ ଯାଦବମାନଙ୍କୁ ନିବେଦନ କରିଛନ୍ତି।
ସେମାନେ ଦର୍ଶାଇଛନ୍ତି ଯେ, ରାଜ୍ୟରେ ବସବାସ କରୁଥିବା ୯୫ ଲକ୍ଷ ଯାଦବ ପରିବାର ଅହରହ ପରିଶ୍ରମ କରି ମାନବ ସମାଜର ମୌଳିକ ଆବଶ୍ୟକତା ପୂରଣ କରି ଆସୁଛନ୍ତି। ମାତ୍ର ସାମାଜିକ ଓ ରାଜନୈତିକ କ୍ଷେତ୍ରରେ ଅବହେଳିତ ହୋଇଥିଲେ ବି ସରକାରଙ୍କ ପକ୍ଷରୁ ସେମାନଙ୍କ ଦାବି ପୂରଣ ଦିଗରେ ପଦକ୍ଷେପ ନିଆଯାଉ ନାହିଁ। ନ୍ୟାଯ୍ୟ ଦାବି ହାସଲ ପାଇଁ ସେମାନେ ଅବଶ୍ୟକ ପଡ଼ିଲେ ରାଜରାସ୍ତାକୁ ଓହ୍ଲାଇବେ। ମହାସଭାର ବ୍ଲକ ସଭାପତି ନରେନ୍ଦ୍ର ବାରିକ, ଉପଦେଷ୍ଟା ରାମଚନ୍ଦ୍ର ବାରିକ, ଜିଲା ସମ୍ପାଦକ ପ୍ରତାପ ମହାକୁଡ଼, କାର୍ଯ୍ୟକାରୀ ସଭାପତି ନୃସିଂହ ମହାକୁଡ଼, ବ୍ଲକ ଉପସଭାପତି ବଳରାମ କବି, ସମ୍ପାଦକ ଶ୍ରୀଧର ବାରିକ, କୋଷାଧ୍ୟକ୍ଷ ନାରାୟଣ ବାରିକ, ସଂଯୋଜକ ନିରଞ୍ଜନ ବାରିକ, ସଞ୍ଜୟ ବାରିକ, ଶଶିଭୂଷଣ ମହଲା, ଗୟାଧର ବାରିକ ପ୍ରମୁଖ ଖବରଦାତା ସମ୍ମିଳନୀରେ ଉପସ୍ଥିତ ଥିଲେ।