ନୂଆଦିଲ୍ଲୀ,୬।୨: ଭାରତୀୟ ଦଳ ତା’ର ପ୍ରାଧାନ୍ୟ ବଜାୟ ରଖି ରେକର୍ଡ ୫ମ ଥର ପାଇଁ ଜିତିଛି ୧୯ ବର୍ଷରୁ କମ୍ ବିଶ୍ୱକପ୍। ପୂରା ଟୁର୍ନାମେଣ୍ଟରେ ଅନେକ ଖେଳାଳିଙ୍କ ବ୍ୟକ୍ତିଗତ ପ୍ରଦର୍ଶନ ଯୋଗୁ ଟିମ୍ ଇଣ୍ଡିଆ ଅପରାଜେୟ ରହିଥିଲା। କିନ୍ତୁ ଟୁର୍ନାମେଣ୍ଟର ସବୁଠୁ ଗୁରୁତ୍ୱପୂର୍ଣ୍ଣ ମ୍ୟାଚ୍ ତଥା ଫାଇନାଲରେ ଭାରତୀୟ ଦଳ ପାଇଁ ହିରୋ ସାଜିଥିଲେ ରାଜ ଅଙ୍ଗଦ ବାଓ୍ବା। ଏହି ଅଲରାଉଣ୍ଡର ଉଭୟ ବ୍ୟାଟ ଓ ବଲରେ ଇଂଲଣ୍ଡ ବିପକ୍ଷ ବିଶ୍ୱକପ୍ ଫାଇନାଲରେ ପ୍ରଦର୍ଶନ କରିଥିଲେ, ଯାହା ଫଳରେ ତାଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର ମିଳିଥିଲା।
ରାଜ ହେଉଛନ୍ତି ତାର୍ଲୋଚନ ସିଂ ବାଓ୍ବାଙ୍କ ନାତି। ସେ ୧୯୪୮ ଅଲିମ୍ପିକ୍ ସ୍ବର୍ଣ୍ଣ ପଦକ ଜିତିଥିବା ଭାରତୀୟ ହକି ଦଳର ସଦସ୍ୟ ଥିଲେ। କୌତୁହଳର କଥା ହେଉଛି, ଗ୍ରେଟ୍ ବ୍ରିଟେନ ବିପକ୍ଷ ଫାଇନାଲରେ ଗୋଲ ସ୍କୋର କରିଥିଲେ ତାର୍ଲୋଚନ। ଏହା ଭାରତୀୟ ହକି ଦଳ ପାଇଁ ଥିଲା କ୍ରମାଗତ ଚତୁର୍ଥ ଅଲିମ୍ପିକ୍ ସ୍ବର୍ଣ୍ଣ ପଦକ। ଅଜାଙ୍କ ଭଳି ନାତ ମଧ୍ୟ ଦେଶକୁ ବିଶ୍ୱ ସ୍ତରରେ ସଫଳତା ଆଣି ଦେଇଛନ୍ତି। ଉଭୟଙ୍କ ମଧ୍ୟରେ ପ୍ରାର୍ଥକ୍ୟ ହେଲା ଜଣେ କ୍ରିକେଟର ଥିଲେ, ଅନ୍ୟ ଜଣେ ହକି ଖେଳାଳି ଥିଲେ।
ଶନିବାର ଆଣ୍ଟିଗୁଆଠାରେ ଖେଳାଯାଇଥିବା ଫାଇନାଲରେ ରାଜା ୫ ଉଇକେଟ ସଫଳତା ହାତେଇଥିଲେ। ଆଇସିସି ଟୁର୍ନାମେଣ୍ଟ ଫାଇନାଲରେ ଏଭଳି ସଫଳତା ହାସଲ କରିବାରେ ସେ ପ୍ରଥମ ଭାରତୀୟ। ତା’ ପରେ ବ୍ୟାଟିଂରେ ୫୪ ବଲରେ ୩୫ ରନ୍ର ଇନିଂସ ଖେଳିଥିଲେ। ଭାରତୀୟ ଦଳ ପାଇଁ ବାଓ୍ବା ପୂରା ଟୁର୍ନାମେଣ୍ଟରେ ସର୍ବାଧିକ ରନ୍ କରିଥିବା ଖେଳାଳିଙ୍କ ମଧ୍ୟରେ ଦ୍ୱିତୀୟ ସ୍ଥାନରେ ଥିବା ବେଳେ ସବୁଠୁ ଅଧିକ ଉଇକେଟ ନେବାରେ ସେ ତୃତୀୟ ସ୍ଥାନରେ ରହିଥିଲେ।