ଭୁବନେଶ୍ୱର,୧୫।୬(ବ୍ୟୁରୋ): ଓଡ଼ିଶା ହସ୍ତଶିଳ୍ପ ସଂଗ୍ରହାଳୟ ‘କଳାଭୂମି’ ପକ୍ଷରୁ ମଙ୍ଗଳବାରଠାରୁ ଦୁଇଦିନିଆ ରଜ ମହୋତ୍ସବ ଆରମ୍ଭ ହୋଇଛି। ଏଥିରେ ଶିଳ୍ପକଳା ପ୍ରଦର୍ଶନୀ, ହସ୍ତତନ୍ତ ଓ ହସ୍ତଶିଳ୍ପ ବଜାର, କାଗଜ ମୁଖା ଓ ନଡ଼ା କାରୁକାର୍ଯ୍ୟ, ପାରମ୍ପରିକ ପିଠା, ଫୁଡ କୋର୍ଟ ଆୟୋଜନ ସହ ସାଂସ୍କୃତିକ କାର୍ଯ୍ୟକ୍ରମ ପରିବେଷିତ ହୋଇଥିଲା। ଶିଳ୍ପୀମାନେ ସର୍ବସାଧାରଣଙ୍କୁ ଏହି କାରୁକାର୍ଯ୍ୟର ଶିକ୍ଷା ମଧ୍ୟ ଦେଉଛନ୍ତି। ହସ୍ତତନ୍ତ ଓ ହସ୍ତଶିଳ୍ପର ବିକ୍ରିବଟା ପାଇଁ କ୍ରାଫ୍ଟ ବଜାରର ଉପଲବ୍ଧି ରହିଛି। ଫୁଡ୍ କୋର୍ଟରେ ବିଭିନ୍ନ ପ୍ରକାରର ପିଠା, ମିଠା ଓ ଅନ୍ୟାନ୍ୟ ଖାଦ୍ୟ ଉପଲବ୍ଧ ରହିଛି। ସାରେ ବାଦ୍ୟ ଓ ସଙ୍ଗୀତ ସହ ପାରମ୍ପରିକ ଲୋକନୃତ୍ୟ ପରିବେଷିତ ହୋଇଥିଲା। ବିଶେଷକରି ଓଡ଼ିଶୀ ଓ ସମ୍ବଲପୁରୀ ନୃତ୍ୟ ସାଙ୍ଗକୁ ଲାଇଭ୍ ମ୍ୟୁଜିକ୍ ଦର୍ଶକଙ୍କ ମନ ଜିଣିଥିଲା। ଏହି ଅବସରରେ ଡ. ସୁରେନ୍ଦ୍ର କୁମାର ମିଶ୍ରଙ୍କ ଦ୍ୱାରା ନବକଳେବର ଓ ରଥଯାତ୍ରା ସମ୍ପର୍କିତ ଆଲୋଚନାଚକ୍ର ଆୟୋଜିତ ହୋଇଥିଲା। ପ୍ରଥମ ଦିନରେ ୫୦୦ରୁ ଊର୍ଦ୍ଧ୍ୱ ଲୋକଙ୍କ ଭିଡ଼ ଦେଖିବାକୁ ମିଳିଥିଲା।