ନିରାକାରପୁର,୯।୬(ଡି.ଏନ୍.ଏ.): ଖୋର୍ଦ୍ଧା ଜିଲା ନୂଆଗଡ ପଞ୍ଚାୟତ ମୂଳୀଝର ହାତୀଆ ପାହାଡ଼ ପାଦ ଦେଶରେ ଅବସ୍ଥିତ ଓଡ଼ିଶା ପ୍ରସିଦ୍ଧ ମା’ ଉଗ୍ରତାରାଙ୍କ ପୀଠରେ ଚଳିତବର୍ଷ ରଜ ମହୋତ୍ସବ ପର୍ବ ପାଳନ କରାଯିବ। ଏଥିପାଇଁ ମନ୍ଦିର ସମେତ ଏହାର ଚତୁଃପାର୍ଶ୍ୱ ସଫା କରାଯିବା ସହିତ ରଙ୍ଗ ଦିଆଯାଉଥିବା ଦେଖିବାକୁ ମିଳିଛି। ଏଠାରେ ସାତ ଦିନ ଧରି ରଜ ମହୋତ୍ସବ ପାଳିତ ହେଉଥିବାବେଳେ ଦୀର୍ଘ ମାସେ ଧରି ଏଠାରେ ବିଭିନ୍ନ ସାମଗ୍ରୀ ବିକ୍ରି କରାଯାଇଥାଏ। କୃଷି ଭିତ୍ତିକ ସାମଗ୍ରୀ, ବିଭିନ୍ନ କାଠ ଓ ପଥର ସାମଗ୍ରୀ, ଏପରିକି ବିଭିନ୍ନ ଘର କରଣା ସାମଗ୍ରୀ ବିକ୍ରି ହୋଇଥାଏ। ବହୁ ଦୂରାନ୍ତରୁ ଏଠାକୁ ବେପାରୀମାନେ ଆସିଥାନ୍ତି। ସେହିପରି ଯାତ୍ରା ମହୋତ୍ସବ ଦେଖିବାକୁ ଜିଲା ସମେତ ଜିଲା ବାହାରୁ ଲୋକଙ୍କ ସମାଗମ ହୋଇଥାଏ। କୋଭିଡ୍ କଟକଣା ଯୋଗୁ ୨ବର୍ଷ ହେବ ରଜ ମହୋତ୍ସବ ବନ୍ଦ ରହିଥିଲା। ଚଳିତ ବର୍ଷ କଟକଣା କୋହଳ ହେବା ପରେ ଏହି ମହୋତ୍ସବରେ ବହୁ ଲୋକଙ୍କ ସମାଗମ ହେବ ବୋଲି ପୂଜକ ମନୋରଞ୍ଜନ ସାମନ୍ତରାୟ କହିଛନ୍ତି।
