ଅନୁଗୋଳ ଅଫିସ, ୧୭ା୩: ଆସନ୍ତା ଏପ୍ରିଲ ୧ ତାରିଖରେ ଅନୁଗୋଳ ଜିଲା ପ୍ରତିଷ୍ଠା ଦିବସ। ଜିଲାକୁ ୩୦ ବର୍ଷ ପୂରଣ ହେଉଥିବାରୁ ଜିଲା ପ୍ରଶାସନ ପକ୍ଷରୁ ବିଭିନ୍ନ ସୌନ୍ଦର୍ଯ୍ୟକରଣ କାର୍ଯ୍ୟ ହାତକୁ ନିଆଯାଇଛି। ଏପରି କି ଅନୁଗୋଳର ଶେଷ ରାଜା ସୋମନାଥ ସିଂହ ଜଗଦ୍ଦେବଙ୍କ ପ୍ରତିମୂର୍ତ୍ତି ଥିବା ରାଜା ଛକକୁ ନୂଆ ରୂପ ଦେବାକୁ କାର୍ଯ୍ୟ ଆରମ୍ଭ ହୋଇଛି। ଏଠାରେ ଥିବା ରାଜାଙ୍କ ପ୍ରତିମୂର୍ତ୍ତି ଉପରେ ଛାତ ନିର୍ମାଣ କରାଯିବ। ରାଜାଙ୍କ ପ୍ରତିମୂର୍ତ୍ତିକୁ ଆଲୋକମାଳାରେ ସଜ୍ଜିତ କରାଯିବ। ଦୀର୍ଘଦିନ ହେବ ଏ ନେଇ ସହରବାସୀ, ବୁଦ୍ଧିଜୀବୀ ଦାବି କରିଆସୁଥିବା ବେଳେ ତାହାକୁ ଗୁରୁତ୍ୱ ଦେଇଛି ପ୍ରଶାସନ। ଓଡ଼ିଶା ଦିବସ ସହ ଜିଲା ପ୍ରତିଷ୍ଠା ଦିବସରେ ଏହା ଉଦ୍ଘାଟନ ହେବ ବୋଲି ପୌର ପ୍ରଶାସନ ପକ୍ଷରୁ ସୂଚନା ମିଳିଛି।
ରାଜା ସୋମନାଥ ସିଂହ ଜଗଦ୍ଦେବ ଅନୁଗୋଳର, ସ୍ବାଭିମାନ, ଗର୍ବ ଓ ଗୌରବ ହୋଇଥିବାରୁ ତାଙ୍କ ପ୍ରତିମୂର୍ତ୍ତି ପ୍ରତି ଉଚିତ ସମ୍ମାନ ଜଣାଇବାକୁ ବୁଦ୍ଧିଜୀବୀ ଦୀର୍ଘଦିନ ତଳୁ ଦାବି କରି ଆସୁଥିଲେ। ତେଣୁ ରାଜାଙ୍କ ପ୍ରତିମୂର୍ତ୍ତି ଉପରେ ଛାତ ସାଙ୍ଗକୁ ପାଦତଳେ ପାଣି ଫୁଆରା (ମିନି ୱାଟର ଫାଉଣ୍ଟେନ୍) କରାଯିବ। ଉକ୍ତ ସ୍ଥାନକୁ ରଙ୍ଗବେରଙ୍ଗର ଆଲୋକମାଳାରେ ସୁସଜ୍ଜିତ କରାଯିବ। ଏଥିସହ ସୁରକ୍ଷା ବାଡ଼ ନିର୍ମାଣ କରାଯାଇ ତାଲା ପକାଯିବ। ଫଳରେ ପୂର୍ବପରି ଆଉ କେହି ମାନସିକ ବିକାରଗ୍ରସ୍ତ ପ୍ରତିମୂର୍ତ୍ତି ଉପରେ ଚଢ଼ିବେ ନାହିଁ କି ହାତରୁ ଖଣ୍ଡା କାଢ଼ି ନେଇପାରିବେ ନାହିଁ। ଏହାଛଡ଼ା ଛାତ ନିର୍ମାଣ କରାଯାଉଥିବାରୁ ପୂର୍ବାପେକ୍ଷା ପ୍ରତିମୂର୍ତ୍ତି ସୁରକ୍ଷିତ ରହିବ। ନବୀକରଣ କାର୍ଯ୍ୟ ଯେପରି ଶୀଘ୍ର ଶେଷ କରାଯିବ ସେଥିପାଇଁ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। ରାଜାଙ୍କ ପ୍ରତିମୂର୍ତ୍ତି ଚତୁଃପାର୍ଶ୍ୱରେ ଥିବା ଗ୍ରୀଲ୍ କଢ଼ାଯିବା କାର୍ଯ୍ୟ ଆରମ୍ଭ ହୋଇଛି। ଏହାପରେ ପିଣ୍ଡି ହଟାଯାଇ ଏହାକୁ ସୌନ୍ଦର୍ଯ୍ୟକରଣ କରାଯିବ ବୋଲି ପୌରପାଳିକା ପକ୍ଷରୁ କୁହାଯାଇଛି।