ମିଠା ଦୋକାନୀଙ୍କୁ ଗୋଡାଇ ହାଣିବା ଘଟଣା: ଏନ୍କାଉଣ୍ଟର ଭୟରେ ଆତ୍ମସମର୍ପଣ କଲେ ରାଜା
05 ଭୁବନେଶ୍ୱର,୯ା୧୦(ବ୍ୟୁରୋ):ସାମନ୍ତରାପୁର ଛକରେ ମିଠା ଦୋକାନୀଙ୍କୁ ହତ୍ୟା କରିବା ଘଟଣାରେ ଜଣେ ଷଡ଼ଯନ୍ତ୍ରକାରୀ ଭୁବନେଶ୍ୱର ଏସ୍ଡିଜେଏମ୍ କୋର୍ଟରେ ଆତ୍ମସମର୍ପଣ କରିଛନ୍ତି। ଆତ୍ମସମର୍ପଣ କରିଥିବା ଅଭିଯୁକ୍ତ ହେଲେ ଧଉଳି ଥାନା ବେହେରାସାହି ପ୍ଲଟ ନଂ-୮୫ରେ ରହୁଥିବା ରାଜକିଶୋର ବେହେରା ଓରଫ ରାଜା। ଏହି ହତ୍ୟା ଘଟଣା ଘଟିବା ପରେ ପୋଲିସ ପୁରା ଆକ୍ସନ ମୁଡ଼୍କୁ ଆସିଯାଇଥିଲା। ଏପରିକି ଜୋନ୍ ଏସିପି ବିଷ୍ଣୁ ପାତ୍ରଙ୍କ ନେତୃତ୍ୱରେ ଏକ ଟିମ୍ ପୁରୀ,ପିପିଲି,ଖୋର୍ଦ୍ଧା,ବାଲିହନ୍ତା ଆଦି ସ୍ଥାନରେ ଚଢାଉ କରିଥିଲା। ଏହାସହ ବଳାରାମ ମିଠା ଦୋକାନୀଙ୍କ ପୁଅ ଦିଲ୍ଲୀ ବେହେରାଙ୍କୁ ମଧ୍ୟ ଉଠାଇ ଆଣି ପୋଲିସ ଥାନାରେ ପଚରାଉଚରା କରିଥିଲା। ପୋଲିସ ତାଙ୍କୁ ପଚରାଉଚରା ପରେ ଏହି ହତ୍ୟାପଛରେ ଷଡଯନ୍ତ୍ରକାରୀ ହେଉଛନ୍ତି ଦିଲ୍ଲୁଙ୍କୁ ପୁଅ ରାଜା। ତେଣୁ ପୋଲିସ ତାଙ୍କୁ ଧରିବା ପାଇଁ ଶିଶୁପାଳଗଡ଼,ଧଉଳିରେ ଚଢାଉ କରିଥିଲା। ତାଙ୍କ ଘରେ ପୋଲିସ ଚଢାଉ କରିବା ସମୟରେ ରାଜା ଥରେ ଖସିଯାଇଥିଲା। ତେଣୁ ପୋଲିସ ବିକାଶ ଦୁବେ ଭଳି ଏନ୍କାଉଣ୍ଟର କରିବ ବୋଲି ଏକ ମିଥ୍ୟ ପ୍ରଚାର କରିଥିଲା। ଏହି ଖବର ରାଜ ନିକଟରେ ପହଞ୍ଚିଥିଲା। ସେ ଜୀବନ ବଞ୍ଚାଇବା ପାଇଁ ବାଟ ଖୋଲିଥିଲା। ଏପରିକି ତାଙ୍କ ଓକିଲ ଲିଙ୍ଗରାଜ ଦାଶ ଏବଂ ଭକ୍ତଭୂଷଣ ବାରିଙ୍କ ସହଯୋଗାଯୋଗ କରିଥିଲା। ଓକିଲଙ୍କ କହିବା ଅନୁସରରେ ଗୁରୁବାର ଦିନ ୧୨ ସମୟରେ ଓକିଲ ଗାଡିରେ ବସି କୋର୍ଟକୁ ଯାଇଥିଲା ରାଜା। ଏହା ପୋଲିସ ଜାଣିପାରି ତାଙ୍କ ପିଛା କରିଥିଲେ। ହେଲେ କୋର୍ଟ ଭିତରକୁ ଅଭିଯୁକ୍ତ ରାଜା ଦୌଡି ପଶିଯିବା ପରେ ପୋଲିସ ତାଙ୍କୁ ଧରିବାରେ ବିଫଳ ହୋଇଥିଲା। ଶେଷରେ ତାଙ୍କୁ କୋର୍ଟ ଭିତରେ ଥିବା ପୋଲିସ ହାଜତରେ ରଖାଯାଇଥିଲା। ସବୁଠୁ ବଡ଼ କଥା ହେଲା ରାଜାଙ୍କ ମନରେ ଏନ୍କାଉଣ୍ଟରର ଭୟ ଏତେ ପଶିଯାଇଥିଲା ଯେ, ସେ ହାଜତ ଭିତରେ ବସିବା ସମୟରେ ଥରୁଥିବାର ଦେଖିବାକୁ ମିଳିଥିଲା। ଏସ୍ଡିଜେଏମ୍ କୋର୍ଟରେ ହାଜର ହେବା ପରେ ତାଙ୍କୁ ଝାରପଡା ଜେଲକୁ ପଠାଇ ଦିଆଯାଇଛି। ଶୁକ୍ରବାର ପୋଲିସ ତାଙ୍କୁ ରିମାଣ୍ଡରେ ନେବା ପାଇଁ କୋର୍ଟରେ ଆବେଦନ କରିବେ। ତାଙ୍କୁ ପୋଲିସ ରିମାଣ୍ଡରେ ନେଇ ପଚରାଉଚରା ପରେ ସେ କାହାକୁ ସୁପାରି କିଲର ଦେଇଥିଲେ। ସେମାନେ କିଏ। କେତେ ଟଙ୍କା ନେଇ ସେମାନଙ୍କୁ ଅଣାଯାଇଥିଲା ତାହା ସ୍ପଷ୍ଟ ହେବ। ଏହି ଷଡ଼ଯନ୍ତ୍ରରେ ରାଜା ଏକାକୀ ସପୃକ୍ତ ଅଛନ୍ତି ନା ତାଙ୍କ ବାପା ଦିଲ୍ଲୀ ସଂପୃକ୍ତ ଅଛନ୍ତି ତାହା ପଚରାଉଚରା ପରେ ସ୍ପଷ୍ଟ ହେବ ବୋଲି ଏସିପି ବିଷ୍ଣୁ ପାତ୍ର କହିଛନ୍ତି।
ପ୍ରାଥମିକ ତଦନ୍ତରୁ ଜଣାପଡିଛି,ବଳରାମ ମିଠା ଦୋକାନୀରେ ପ୍ରଭାକର ବେହେରା ମୁଖ୍ୟମିସ୍ତ୍ରୀ ଭାବେ କାର୍ଯ୍ୟ କରୁଥିଲେ। ବଳଦାମ ଦୋକାନ ବନ୍ଦ ହେବା ପରେ ପ୍ରଭାକର ଉକ୍ତ ଛକରେ ପାଲ ଟାଣି ଏକ ଉଠା ମିଠା ଦୋକାନ କରିଥିଲେ। ଏହାଦ୍ୱାରା ପରମୁହୂର୍ତ୍ତରେ ବଳାଦାମ ମିଠା ଦୋକାନ ବ୍ୟବସାୟ ମାନ୍ଦା ହୋଇଥିଲା। ଦିଲୁ ଏବଂ ତାଙ୍କ ପୁଅ ରାଜା ମୃତ ପ୍ରଭାକର ବେହେରା ଓରଫ ଜମ୍ବୁଙ୍କୁ ସାମନ୍ତରା ପୁର ଛକ ଛାଡି ଅନ୍ୟତ୍ର ଯାଇ ବେପାର କରିବାକୁ ଧମକ ଦେଇଥିଲେ। ସେ ନଯିବାରୁ ପୂର୍ବରୁ ଦୋକାନରେ ଭଙ୍ଗାରୁଜା କରିଥିଲେ। ଥାନାରେ ମାମଲା ହେବା ପରେ ଆପୋଷ ସମାଧାନ ହୋଇଥିଲା। ଶେଷରେ ଗତ ୪ ତାରିଖରେ ରାଜା ତାର ଦୁଇ ସହଯୋଗୀଙ୍କୁ ସୁପାରି କିଲର ଦେଇ ପ୍ରଭାକରଙ୍କୁ ହତ୍ୟା କରିଥିଲେ। ଫେରାର ଥିବା ଦୁଇ ସୁପାରି କିଲରଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ପୋଲିସ ଚଢାଉ କରୁଛି।