ନୂଆଦିଲ୍ଲୀ : କେନ୍ଦ୍ର ସରକାରଙ୍କ ଆତ୍ମନିର୍ଭର ଭାରତ ଯୋଜନାକୁ ନେଇ ରିଜର୍ଭ ବ୍ୟାଙ୍କର ପୂର୍ବତନ ଗଭର୍ନର ରଘୁରାମ ରାଜନ ପ୍ରଶ୍ନ ଉଠାଇଛନ୍ତି। ଆତ୍ମନିର୍ଭର ଭାରତ କାର୍ଯ୍ୟକ୍ରମ ଅନ୍ତର୍ଗତ ଆମଦାନୀ ଉପରେ ଯେଉଁ କଟକଣା ଲାଗୁଛି ତାକୁ ନେଇ ରାଜନ ସରକାରଙ୍କୁ ସତର୍କ କରାଇଛନ୍ତି। ଭାରତ ପୂର୍ବରୁ ଏଭଳି ପନ୍ଥା ଆପଣାଇଥିବା ବେଳେ ସଫଳ ହୋଇନାହିଁ ବୋଲି ଏକ କାର୍ଯ୍ୟକ୍ରମକୁ ସମ୍ବୋଧିତ କରି ସେ ଏହି ମତ ରଖିଛନ୍ତି।
ଟାରିଫ ବଢାଇ ଆମଦାନୀକୁ କମ୍ କରିବାକୁ ଯଦି ଆତ୍ମନିର୍ଭର ଭାରତ କୁହାଯାଏ କିମ୍ବା ଏହା ଉପରେ ଯଦି ଫୋକସ କରାଯାଉଥାଏ ତାହା ଠିକ୍ ନୁହେଁ। ଗତ କିଛି ବର୍ଷ ପୂର୍ବରୁ ଏଭଳି ପଦକ୍ଷେପ ଭାରତ ନେଇଛି। ଏପରି କାମ ଭାରତ ପୂର୍ବରୁ କରିଥିବା ବେଳେ ପୁଣି ଥରେ ସମାନ କାମ କରିବା ଭଳି ହେଉଛି; ଯାହା ସଫଳ ହୋଇନାହିଁ। ଏଣୁ ଏ ଦିଗରେ ଧ୍ୟାନ କେନ୍ଦ୍ରିତ କରା ନ ଯାଉ ବୋଲି ରାଜନ ସତର୍କ କରାଇଛନ୍ତି।
ରପ୍ତାନି ଉପରେ ମତ ରଖି ସେ କହିଛନ୍ତି ଯେ, ବିଦେଶରୁ ସାମଗ୍ରୀ ଆମଦାନୀ କରି ସାମଗ୍ରୀ ପ୍ରସ୍ତୁତ କରିବା ସହ ଏଗୁଡିକ କିଭଳି ସୁଲଭ ହେବ ତାକୁ ଧ୍ୟାନଦେବାକୁ ହେବ। ଏହା ହେଲେ ପ୍ରଡକ୍ଟ ପ୍ରତିଦ୍ୱଦ୍ୱୀ ହୋଇପାରିବ। ସାମଗ୍ରୀ ଆସେମ୍ବଲ ଦ୍ୱାରା ଚାଇନା ରପ୍ତାନିରେ ଏକ ସୁପରପାଓ୍ବାର ହୋଇପାରିଛି। ଚାଇନା ନିଜ ଦେଶର ଶିଳ୍ପର ସ୍ବାର୍ଥ ଲାଗି ଆମଦାନୀ ଉପରେ କଟକଣା ଲଗାଇନାହିଁ। ବିଦେଶ ସାମଗ୍ରୀ ଆମଦାନୀ ଏବଂ ନିଜ ଦେଶର ସାମଗ୍ରୀ ଉଭୟକୁ ବ୍ୟବହାର କରି ଚାଇନା ଭଲ ସ୍ଥିତି ସୃଷ୍ଟି କରିପାରିଛି। ରପ୍ତାନି କରିବାକୁ ହେଲେ ଭାରତକୁ ଆମଦାନୀ କରିବାକୁ ହେବ। ଆମଦାନୀରେ ଅତ୍ୟଧିକ ଟିକସ ଲଗାଇ ଭାରତରେ ଉତ୍ପାଦକୁ ଏକ ଭଲ ସ୍ଥିତିରେ ପହଞ୍ଚାଇବାକୁ ଫୋକସ୍ ନ କରାଯାଉ । ସରକାର ଦେଶରୁ ରପ୍ତାନି ବଢାଇବା ଲାଗି ଦୀର୍ଘ ମିଆଦୀ ପୁଞ୍ଜି ବିନିଯୋଗ କରିବା ସହ ସବୁ କିଛିକୁ ଧ୍ୟାନରେ ରଖିବା ଆବଶ୍ୟକତା ରହିଛି ବୋଲି ସେ ପରାମର୍ଶ ଦେଇଛନ୍ତି।