କଲମ୍ବୋ,୧୩।୧: କ୍ରିକେଟର ସମସ୍ତ ଫର୍ମାଟରୁ ସନ୍ନ୍ୟାସ ଘୋଷଣା କରିବାର ଦିନ କେଇଟାରେ ନିଷ୍ପତ୍ତିରୁ ୟୁଟର୍ନ ନେଇଛନ୍ତି ଶ୍ରୀଲଙ୍କା ଖେଳାଳି ଭାନୁକା ରାଜପାକ୍ଷେ। ଏ ନେଇ ଶ୍ରୀଲଙ୍କା ବୋର୍ଡ ଗୁରୁବାର ଘୋଷଣା କରିଛି।
ଗତ ୩ ତାରିଖରେ ଅନ୍ତର୍ଜାତୀୟ କ୍ରିକେଟରୁ ରାଜପାକ୍ଷେ ଅବସର ନେଉଥିବା ବୋର୍ଡକୁ ଜଣାଇଥିଲେ। ପାରିବାରିକ ଦାୟିତ୍ୱ ଯୋଗୁ ସେ ଏଭଳି ନିଷ୍ପତ୍ତି ନେଉଥିବା ଦର୍ଶାଇଥିଲେ ଇସ୍ତଫା ପତ୍ରରେ। ସନ୍ନ୍ୟାସ ପତ୍ରରେ ସେ ଲେଖିଥିଲେ, “ଜଣେ ଖେଳାଳି ଓ ସ୍ବାମୀ ଭାବେ ନିଜ ସ୍ଥିତିକୁ ବିଚାର କରିବା ପରେ ଆଗକୁ ଆସୁଥିବା ପିତୃତ୍ୱ ଦାୟିତ୍ୱ ଲାଗି ମୁଁ କ୍ରିକେଟରୁ ଦୂରେଇବାକୁ ନିଷ୍ପତ୍ତି ନେଇଛି”।
କିନ୍ତୁ ଗୁରୁବାର ଶ୍ରୀଲଙ୍କା ବୋର୍ଡ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତିରେ କୁହାଯାଇଛି, ଖେଳ ଓ ଯୁବ ବ୍ୟାପାର ମନ୍ତ୍ରୀ ନମଲ ରାଜପାକ୍ଷେ ଏବଂ ଜାତୀୟ ଚୟନକର୍ତ୍ତାଙ୍କ ପରାମର୍ଶ କ୍ରମେ ଭାନୁକା ନିଜ ଇସ୍ତଫା ପତ୍ରକୁ ଫେରାଇ ନେବାକୁ ନିଷ୍ପତ୍ତି ନେଇଛନ୍ତି। ୨୦୨୦ରେ ଅନ୍ତର୍ଜାତୀୟ ସ୍ତରରେ ପଦାର୍ପଣ କରିଥିବା ଭାନୁକା ଏପର୍ଯ୍ୟନ୍ତ ଦେଶ ଲାଗି ୫ ଦିନିକିଆ ଓ ୧୮ ଟି୨୦ ଖେଳିଛନ୍ତି।
