ନୂଆଦିଲ୍ଲୀ,୨୧।୧:ଆଇପିଏଲ୍ର ଆଗାମୀ ୧୪ତମ ସଂସ୍କରଣ ପାଇଁ ନିଲାମ ପୂର୍ବରୁ ରାଜସ୍ଥାନ ରୟାଲ୍ସ ଅଷ୍ଟ୍ରେଲିଆ ପୂର୍ବତନ ଅଧିନାୟକ ଷ୍ଟିଭ୍ ସ୍ମିଥ୍ଙ୍କୁ ଛାଡ଼ିଛି। ତାଙ୍କ ସ୍ଥାନରେ କେରଳର ଯୁବ ବ୍ୟାଟ୍ସମ୍ୟାନ୍ ସଞ୍ଜୁ ସାମସନଙ୍କୁ ନୂଆ ଅଧିନାୟକ ଭାବେ ନିଯୁକ୍ତ କରିଛି। ଏହି ନିଷ୍ପତ୍ତିକୁ ନେଇ ପ୍ରଶଂସକଙ୍କ ମିଶ୍ରିତ ପ୍ରତିକ୍ରିୟା ମିଳୁଥିବା ବେଳେ ଟିମ୍ ମ୍ୟାନେଜ୍ମେଣ୍ଟ ପକ୍ଷରୁ ରୟାଲ୍ ଷ୍ଟାଇଲ୍ରେ ବିଦାୟ ଜଣାଇଛି।
ଆଧିକାରୀକ ଟୁଇଟର ହ୍ୟାଣ୍ଡେଲରେ ରାଜସ୍ଥାନ ରୟାଲ୍ସ ପକ୍ଷରୁ ସ୍ମିଥ୍ଙ୍କ ଫଟୋ ଶେୟାର କରାଯାଇ ‘ଧନ୍ୟବାଦ ସ୍ମଜ୍’ ବୋଲି ଲେଖାଯାଇଛି। ସ୍ମିଥ୍ଙ୍କ ଡାକନାମ ସ୍ମଜ୍ ହୋଇଥିବା ବେଳେ ଫଟୋରେ ତାଙ୍କର ଭିନ୍ନ ଶୈଳୀକୁ ଦେଖିବାକୁ ମିଳିଛି।
ରାଜସ୍ଥାନ ରୟାଲ୍ସ ପକ୍ଷରୁ ଜାରି କରାଯାଇଥିବା ବୟାନରେ ସ୍ମିଥ୍ଙ୍କ ବିଷୟରେ କୁହାଯାଇଛି, ୨୦୧୯ରେ ଆବଶ୍ୟକତା ଥିବା ବେଳେ ତାଙ୍କୁ ଅଧିନାୟକ ଭାବେ ଚୟନ କରାଯାଇଥିଲା। ଏହାପରଠାରୁ ଶେଷ ପର୍ଯ୍ୟନ୍ତ ଦଳର ନେତୃତ୍ୱ ନେଇ ଭଲ ପ୍ରଦର୍ଶନ କରୁଥିଲେ। ତାଙ୍କର ପ୍ରଚେଷ୍ଟା ଏବଂ ଯୋଗଦାନ ପାଇଁ ଧନ୍ୟବାଦ ଦେଉଛୁ। ସେ ସବୁଦିନ ପାଇଁ ରୟାଲ୍ସ ପରିବାରର ସଦସ୍ୟ ରହିବେ ବୋଲି କୁହାଯାଇଥିଲା।
