ଆବୁଧାବି, ୩୧।୧୦-
ଚଳିତ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ)ରେ କିଙ୍ଗ୍ସ ଇଲେଭେନ ପଞ୍ଜାବର କ୍ରମାଗତ ୬ ବିଜୟରେ ବ୍ରେକ୍ ଲଗାଇଛି ରାଜସ୍ଥାନ ରୟାଲ୍ସ। ଲଗାତାର ୫ ମ୍ୟାଚ ଜିତି ପ୍ଲେ-ଅଫ୍ ଆଶା ଉଜ୍ଜୀବିତ କରିଥିବା ପଞ୍ଜାବକୁ ଶୁକ୍ରବାର ଅନୁଷ୍ଠିତ ମ୍ୟାଚରେ ରାଜସ୍ଥାନ ୭ ଉଇକେଟରେ ପରାସ୍ତ କରିଛି। କ୍ରିସ୍ ଗେଲ୍ଙ୍କ ବିସ୍ଫୋରକ ବ୍ୟାଟିଂ ସହାୟତାରେ ପଞ୍ଜାବ ୨୦ ଓଭରରେ ୪ ଉଇକେଟ ହରାଇ ୧୮୫ ରନ କରିଥିଲା। ଜବାବରେ ରାଜସ୍ଥାନ ୧୭.୩ ଓଭରରେ ୩ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଚଳିତ ଆଇପିଏଲରେ ଦୁଇଦଳ ମଧ୍ୟରେ ଅନୁଷ୍ଠିତ ପ୍ରଥମ ମୁକାବିଲାରେ ରାଜସ୍ଥାନ ୪ ଉଇକେଟରେ ବିଜୟୀ ହୋଇଥିଲା। ଏଠାରେ ବିଜୟୀ ହୋଇ ତାହାକୁ ଡବଲରେ ପରିଣତ କରିଛି ଷ୍ଟିଭ୍ ସ୍ମିଥଙ୍କ ଦଳ। ରାଜସ୍ଥାନ ୧୩ ମ୍ୟାଚରୁ ୬ଷ୍ଠ ବିଜୟ ସହ ୧୨ ପଏଣ୍ଟରେ ପହଞ୍ଚତ୍ଛି। ଅନ୍ୟପକ୍ଷରେ ପଞ୍ଜାବ ମଧ୍ୟ ୧୩ ମ୍ୟାଚରୁ ୧୨ ପଏଣ୍ଟରେ ସ୍ଥିର ରହିଛି।
ଟସ୍ ହାରି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲା ରାଜସ୍ଥାନ। ନିଷ୍ପତ୍ତିକୁ ଉଚିତ ସାବ୍ୟସ୍ତ କରି ଫାଷ୍ଟ ବୋଲର ଜୋଫ୍ରା ଆର୍ଚର ପ୍ରଥମ ଓଭରରେ ମନଦୀପ ସିଂଙ୍କୁ ଆଉଟ କରି ପଞ୍ଜାବ ଦଳର ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟ ଘଟାଇଥିଲେ। ମାତ୍ର ଅଧିନାୟକ ଲୋକେଶ ରାହୁଲ ଓ ଚଳିତ ସିଜନରେ କିଙ୍ଗ୍ସ ଇଲେଭେନ ପାଇଁ ଭାଗ୍ୟବାନ ସାବ୍ୟସ୍ତ ହୋଇଥିବା କ୍ରିସ୍ ଗେଲ୍ ପ୍ରତିପକ୍ଷ ବୋଲରଙ୍କୁ ଧୂଲେଇ କରି ଦ୍ୱିତୀୟ ଉଇକେଟରେ ୮୨ ବଲ୍ରୁ ଦ୍ରୁତ ୧୨୦ ରନର ଭାଗୀଦାରି ଗଢ଼ିବା ସହ ଦଳକୁ ବଡ଼ ସ୍କୋର ଦିଗରେ ଅଗ୍ରସର କରାଇଥିଲେ। ୪୧ଟି ବଲ୍ ଖେଳି ୩ ଚୌକା ଓ ୨ ଛକା ସହାୟତାରେ ୪୬ ରନ କରି ରାହୁଲ ମ୍ୟାଚର ୧୫ତମ ଓଭରରେ ଆଉଟ ହୋଇଥିଲେ। ରାଜସ୍ଥାନକୁ ପ୍ରତୀକ୍ଷିତ ବ୍ରେକ୍ ଥ୍ରୁ ଦେଇଥିଲେ ବେନ୍ ଷ୍ଟୋକ୍ସ। ଗେଲ୍ଙ୍କ ସହ ନିକୋଲାସ ପୁରନ କ୍ରିଜ୍ରେ ଯୋଗଦେବାପରେ ରନହାର ବୃଦ୍ଧି ପାଇଥିଲା। ପୁରନ ୧୦ ବଲ୍ରୁ ୩ ଛକା ସହ ୨୨ ରନ କରି ଷ୍ଟୋକ୍ସଙ୍କ ଦ୍ୱିତୀୟ ଶିକାର ହୋଇଥିଲେ। ଗେଲ୍ କିନ୍ତୁ ଖେଳିଥିଲେ ଦର୍ଶନୀୟ ଇନିଂସ। ସେ ମାତ୍ର ୧ ରନ ପାଇଁ ଶତକରୁ ବଞ୍ଚତ୍ତ ହୋଇଥିଲେ ହେଁ ବିସ୍ଫୋରକ ବ୍ୟାଟିଂ କରି ଦଳକୁ ଏକ ଚ୍ୟାଲେଞ୍ଜିଂ ସ୍କୋରରେ ପହଞ୍ଚାଇଥିଲେ। ୬୩ ବଲ୍ରୁ ୬ ଚୌକା ଓ ୮ ଛକା ସହାୟତାରେ ୯୯ ରନ କରିଥିବାବେଳେ ଏହି ଓ୍ବେଷ୍ଟଇଣ୍ଡିଜ ଖେଳାଳି ଆର୍ଚରଙ୍କ ଏକ ୟର୍କରରେ କ୍ଲିନ୍ ବୋଲ୍ଡ ହୋଇ ଯାଇଥିଲେ। ୪୧ ବର୍ଷୀୟ ଗେଲ୍ ଆଉଟ ହେବା ସହ ଭାବପ୍ରବଣ ହୋଇ ପଡ଼ିଥିଲେ। ସେ ଗ୍ରାଉଣ୍ଡକୁ ବାଡ଼େଇବାକୁ ଯାଉଥିବାବେଳେ ନିୟନ୍ତ୍ରଣ ହରାଇଥିଲେ ଏବଂ ବ୍ୟାଟ୍ ହାତରୁ ଖସି ମିଡ୍ଉଇକେଟ ଆଡ଼କୁ ଚାଲି ଯାଇଥିଲା। ସେ ବ୍ୟାଟ୍ପ୍ରତି ଧ୍ୟାନ ନ ଦେଇ ସୁନ୍ଦର ବୋଲିଂ କରିଥିବାରୁ ପ୍ରଥମେ ଆର୍ଚରଙ୍କ ସହ ହାତ ମିଳାଇଥିଲେ। ଏହାପରେ ବ୍ୟାଟ୍ ଆଣି ତା’ ହ୍ୟାଣ୍ଡେଲ ଉପରେ ହେଲ୍ମେଟ୍ ଥୋଇ ପ୍ୟାଭିଲିୟନ ଫେରିଥିଲେ। ଆଇପିଏଲ ଇତିହାସରେ ସେ ଏକମାତ୍ର ଖେଳାଳିଭାବେ ୨ ଥର ୯୯ ରନରେ ଆଉଟ ହୋଇଥିଲେ। କେବଳ ସେତିକି ନୁହେଁ ଟି୨୦ କ୍ରିକେଟରେ ସେ ପ୍ରଥମ ଖେଳାଳିଭାବେ ୧୦୦୦ ଛକା ପୂରଣ କରିବାର ରେକର୍ଡ କରିଥିଲେ। ଗେଲ୍ଙ୍କ ଦୃଢ଼ ବ୍ୟାଟିଂ ବଳରେ ପଞ୍ଜାବ ୨୦ ଓଭରରେ ୪ ଉଇକେଟ ହରାଇ ୧୮୫ ରନ କରିଥିଲା। ରାଜସ୍ଥାନ ପକ୍ଷରୁ ଜୋଫ୍ରା ଆର୍ଚର ଓ ବେନ୍ ଷ୍ଟୋକ୍ସ ୨ଟି ଲେଖାଏ ଉଇକେଟ ନେଇଥିଲେ।
୧୮୬ ରନ ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ରାଜସ୍ଥାନ ଦୁଇ ଓପନର ବେନ୍ ଷ୍ଟୋକ୍ସ ଓ ରବିନ ଉଥପ୍ପାଙ୍କ ଜରିଆରେ ପ୍ଲାଟ୍ଫର୍ମ ପ୍ରସ୍ତୁତ କରିଥିଲା। ୩୩ ବଲ୍ରୁ ୬୦ ରନର ପାର୍ଟନରଶିପ୍ ପରେ ଯୋଡ଼ି ଭାଙ୍ଗିଥିଲା। ଷ୍ଟୋକ୍ସ ୨୬ ବଲ୍ରୁ ୬ ଚୌକା ଓ ୩ ଛକା ସହ ୫୦ରନ କରି କ୍ରିସ୍ ଜୋର୍ଡାନଙ୍କ ବଲ୍ରେ ଆଉଟ ହୋଇଥିଲେ। ଉଥପ୍ପାଙ୍କ ସହ ସଞ୍ଜୁ ସାମ୍ସନ ଯୋଗଦେଇ ଦଳକୁ ଲକ୍ଷ୍ୟ ପଥରେ ଆଗେଇ ନେଇଥିଲେ। ଦ୍ୱିତୀୟ ଉଇକେଟରେ ୫୧ ରନର ଭାଗୀଦାରିପରେ ଉଥପ୍ପା ୩୦(୨୩ ବଲ, ୧ ଚୌକା, ୨ ଛକା) ରନକରି ପ୍ୟାଭିଲିୟନ ଫେରିଥିଲେ। ସ୍ବାଭାବିକ ଢଙ୍ଗରେ ବ୍ୟାଟିଂ କରିଥିବା ସାମ୍ସନ ଅର୍ଦ୍ଧଶତକଠାରୁ ୨ ରନ ଦୂରରେ ଥିବାବେଳେ ଦୁର୍ଭାଗ୍ୟଜନକଭାବେ ରନଆଉଟ ହୋଇ ଯାଇଥିଲେ। ୨୫ଟି ବଲ୍ର ସମ୍ମୁଖୀନ ହୋଇଥିବା ସାମ୍ସନ ୪ ଚୌକା ଓ ୩ ଛକା ସହାୟତାରେ ୪୮ ରନ ସ୍କୋର କରିଥିଲେ। ସେତେବେଳକୁ ୧୪.୨ ଓଭରରେ ସ୍କୋର ୧୪୫ରେ ପହଞ୍ଚତ୍ ଯାଇଥିଲା। ଶେଷଭାଗରେ ସ୍ମିଥ ଓ ଜୋସ୍ ବଟଲର ଧୂଆଁଧାର ବ୍ୟାଟିଂ କରି ଅସମାପ୍ତ ୪ର୍ଥ ଉଇକେଟରେ ୪୧ ରନ ଯୋଗ କରିବା ସହ ୧୫ ବଲ୍ ପୂର୍ବରୁ ଦଳକୁ ବିଜୟୀ କରାଇଥିଲେ। ସ୍ମିଥ ୨୦ ବଲ୍ରୁ ୩୧(୫ ଚୌକା) ଓ ବଟଲର ୧୧ ବଲ୍ରୁ ୨୨(୧ ଚୌକା, ୨ ଛକା) ରନରେ ଅପରାଜିତ ରହିଥିଲେ। ପଞ୍ଜାବ ପକ୍ଷରୁ କେବଳ ମୁରୁଗାନ ଅଶ୍ୱିନ, କ୍ରିସ୍ ଜୋର୍ଡାନ ଉଇକେଟ ପାଇଥିଲେ।
ସଂକ୍ଷିପ୍ତ ସ୍କୋର
କିଙ୍ଗ୍ସ ଇଲେଭେନ ପଞ୍ଜାବ ୨୦ ଓଭରରେ ୧୮୫/୪ (ଗେଲ୍-୯୯, ରାହୁଲ-୪୬, ପୁରନ-୨୨, ଆର୍ଚର-୨/୨୬, ଷ୍ଟୋକ୍ସ-୩୨)। ରାଜସ୍ଥାନ ରୟାଲ୍ସ ୧୭.୩ ଓଭରରେ ୧୮୬/୩ (ଷ୍ଟୋକ୍ସ-୫୦, ସାମ୍ସନ-୪୮, ସ୍ମିଥ-୩୧*, ଉଥପ୍ପା-୩୦, ବଟଲର-୨୨*, ମୁରୁଗାନ-୧/୪୩, ଜୋର୍ଡାନ-୧/୪୪)।
