ଜୟପୁର,୧୩ ।୧୨: ରାଜସ୍ଥାନ କଂଗ୍ରେସର ପ୍ରଭାରୀ ସୁଖଜିନ୍ଦର ସିଂ ରାନ୍ଧୱାଙ୍କ ଏକ ବୟାନକୁ ନେଇ ରାଜ୍ୟ ରାଜନୀତି ହୋଇଛି ସରଗରମ । ବିଶେଷ ଭାବେ ରନ୍ଧୱାଙ୍କର ଏହି ବୟାନ କଂଗ୍ରେସ ନେତା ଓ କର୍ମୀଙ୍କୁ ଚମକାଇ ଦେଇଛି । ସେ ସଚ୍ଚିନ ପାଇଲଟଙ୍କ ସମର୍ଥନରେ ଏମିତି ବୟାନ ଦେଇଛନ୍ତି ଯାହାର ଚର୍ଚ୍ଚା ସମ୍ପୂର୍ଣ୍ଣ ରାଜସ୍ଥାନରେ ଚରମରେ ପହଞ୍ଚିଲାଣି । କୁହାଯାଉଛି କି ରନ୍ଧୱାଙ୍କ ଏହି ବୟାନ ରାଜସ୍ଥାନ କଂଗ୍ରେସରେ ଝଡ ସୃଷ୍ଟି କରିପାରେ ।
ସୂଚନାଯୋଗ୍ୟ, ପଞ୍ଜାବର ପୂର୍ବତନ ଡେପୁଟି ସିଏମ ତଥା ବରିଷ୍ଠ କଂଗ୍ରେସ ନେତା ସୁଖଜିନ୍ଦର ସିଂ ରନ୍ଧୱା ସଚ୍ଚିନ ପାଇଲଟଙ୍କ ସମର୍ଥନରେ ବଡ ବୟାନ ଦେଇଛନ୍ତି । ସେ କହିଛନ୍ତି ସଚ୍ଚିନ ପାଇଲଟଙ୍କ ରକ୍ତରେ ଓ ମନରେ କଂଗ୍ରେସ ରହିଛି । ତେବେ ରାଜ୍ୟରେ ମୁଖ୍ୟମନ୍ତ୍ରୀ ଅଶୋକ ଗେହଲଟ ଓ ସଚ୍ଚିନ ପାଇଲଟଙ୍କ ମଧ୍ୟରେ ନେତୃତ୍ୱକୁ ନେଇ ଚାଲିଥିବା ଟଣା ଭିଡା ମଧ୍ୟରେ ରନ୍ଧୱାଙ୍କ ଏହି ବୟାନ ଗୁରୁତ୍ୱ ରଖେ ବୋଲି କୁହାଯାଉଛି ।
