ଯୋଧପୁର,୧୦।୧୧: ଭାଜପା ଶାସିତ ରାଜ୍ୟରେ ପେଟ୍ରୋଲ ଓ ଡିଜେଲ ଦର କମିବା ପରେ ରାଜସ୍ଥାନରେ ତୈଳ ଉପରୁ ଭ୍ୟାଟ ହ୍ରାସ କରିବାକୁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଅଶୋକ ଗେହଲଟ। ଗତ ୩ ତାରିଖରେ କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଉପରୁ ଯଥାକ୍ରମେ ୫ ଓ ୧୦ ଟଙ୍କା ଏକ୍ସସାଇଜ ଡ୍ୟୁଟି ଛାଡ଼ କରିଥିଲେ। ଏହାପରେ କଂଗ୍ରେସ ଶାସିତ ପଞ୍ଜାବ ସମେତ ବିଭିନ୍ନ ତୈଳ ଦର ହ୍ରାସ ପାଇବା ପରେ ସରକାରଙ୍କ ଉପରେ ଚାପ ବଢ଼ିଥିଲା। ଦିଲ୍ଲୀ, ହରିୟାଣା ଓ ରାଜସ୍ଥାନଠାରୁ ପଞ୍ଜାବରେ କମ୍ ଦରରେ ତୈଳ ମିଳୁଥିବା ଏକ ବିଜ୍ଞାପନରେ ପଞ୍ଜାବ ସରକାର ଦାବି କରିବା ପରେ ଘନେଇଥିଲା ବିବାଦ।
ଯୋଧପୁର ଗ୍ରାମରେ ଆୟୋଜିତ ଇଭେଣ୍ଟରେ ଯୋଗଦେଇ ଗେହଲଟ କହିଛନ୍ତି, ରାଜ୍ୟବାସୀଙ୍କୁ ଆରାମ ଦେବା ପାଇଁ ଆମେ ମଧ୍ୟ ପେଟ୍ରୋଲ ଓ ଡିଜେଲ ଉପରୁ ଭ୍ୟାଟ ହ୍ରାସ କରିବୁ। ଯଦି ସରକାର ଏକ୍ସସାଇଜ୍ ଡ୍ୟୁଟି ହ୍ରାସ କରୁଛନ୍ତି, ତେବେ ସିଧାସଳକ ରାଜ୍ୟରେ ମଧ୍ୟ ଭ୍ୟାଟ ବାବଦକୁ ପେଟ୍ରୋଲ ଉପରେ ୩.୪୦ ଟଙ୍କା ଓ ପେଟ୍ରୋଲ ଉପରେ ୩.୯୦ ଟଙ୍କା କମିବ। ଫଳରେ ରାଜସ୍ଥାନ ସରକାରଙ୍କୁ ୩,୫୦୦ କୋଟି ଟଙ୍କାର କ୍ଷତି ସହିବାକୁ ପଡ଼ିବ। ତୈଳ ଭଳି ଆବଶ୍ୟକୀୟ ସାମଗ୍ରୀ ଉପରେ ଅତ୍ୟଧିକ ଟ୍ୟାକ୍ସ ଲଗାଇ ସାଧାରଣ ନାଗରିକଙ୍କୁ ଲୁଟିଛନ୍ତି। ଏବେ ସେମାନେ ସାମାନ୍ୟ ଆରାମ ଦେଇଛନ୍ତି।
