କୋଟା,୨୨ ।୩: ରାଜସ୍ଥାନର କୋଟାରେ ‘ଦ କଶ୍ମୀର ଫାଇଲ୍ସ’କୁ ନେଇ ବିବାଦ ମୁଣ୍ଡ ଟେକିଛି । ଯାହା ଫଳରେ କୋଟା ସହରରେ ୨୨ ମାର୍ଚ୍ଚରୁ ୨୧ ଏପ୍ରିଲ ପର୍ଯ୍ୟନ୍ତ ଧାରା ୧୪୪ ଜାରି କରାଯାଇଛି । ଆଇନ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣରେ ରଖିବାକୁ ଏଭଳି କରାଯାଇଛି । ଆଗକୁ ବିଭିନ୍ନ ପ୍ରକାର ସାଂପ୍ରଦାୟିକ ପର୍ବ ଆସୁଥିବାରୁ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ବଜାୟ ରଖିବାକୁ କୋଟାରେ ୧୪୪ ଧାରା ଜାରି କରାଯାଇଥିବା କୁହାଯାଇଛି । ଆଗକୁ ଚେଟିଚଣ୍ଡ, ମହାବୀର ଜୟନ୍ତି, ଗୁଡ ଫ୍ରାଇଡେ, ଜୁମାତୁଲ ୱିଦା, ବୈଶାଖୀ ଆଦି ପର୍ବ ଥିବାରୁ ଏଭଳି ନିଷ୍ପତ୍ତି ନିଆଯାଇଛି ।
‘ଦ କଶ୍ମୀର ଫାଇଲ୍ସ’ର ସ୍କ୍ରିନିଂ ସହ ଆଇନ ଶୃଙ୍ଖଳା ପରିସ୍ଥିତି ବଜାୟ ରଖିବାକୁ କୋଟା ଜିଲାପାଳ ଓ ମାଜିଷ୍ଟ୍ରେଟଙ୍କ ପକ୍ଷରୁ ଏହି ନିର୍ଦ୍ଦେଶ ଦିଆଯାଇଛି । ୧୪୪ ଧାରାକୁ ନେଇ ଫିଲ୍ମର ନିର୍ଦ୍ଦେଶକ ବିବେକ ରଞ୍ଜନ ଅଗ୍ନିହୋତ୍ରୀ କଡା ବିରୋଧ କରିବା ସହ ଏହାକୁ ନେଇ ସେ ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ଓ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କୁ ଚିଠି ଲେଖିଛନ୍ତି । ନିର୍ଦ୍ଦେଶକ କହିଛନ୍ତି ଆତଙ୍କବାଦୀଙ୍କର ଗୋଟିଏ କାମ ସେ ଭୟଭୀତ କରିବେ ଓ ଆମେ ଡରିଯିବୁ । ଯଦି ରାଜ୍ୟରେ ଫିଲ୍ମକୁ ନେଇ ଏତେ କଟକଣା ତେବେ ଆମେ କି ନ୍ୟାୟ ଆଶା କରିବୁ ।