ଜୟପୁର,୯।୧: ରାଜସ୍ଥାନର ଶ୍ରୀଗଙ୍ଗାନଗର ଅନ୍ତର୍ଗତ କରନପୁର ବିଧାନସଭା କ୍ଷେତ୍ର ପାଇଁ ଡିସେମ୍ବର ୩୦ରେ ହୋଇଥିବା ଉପନିର୍ବାଚନରେ ଭାଜପା ପ୍ରାର୍ଥୀ ତଥା ରାଜ୍ୟ ସରକାରରେ ମନ୍ତ୍ରୀ ଥିବା ସୁରେନ୍ଦ୍ର ପାଲ ସିଂ ଟିଟି ପରାଜିତ ହୋଇଛନ୍ତି। ପରାଜୟ ପରେ ସେ ମନ୍ତ୍ରୀ ପଦରୁ ଇସ୍ତାଫା ଦେଇଛନ୍ତି। ଇସ୍ତାଫା ପତ୍ର ସେ ରାଜ୍ୟପାଳଙ୍କୁ ପଠାଇ ଥିଲେ। ରାଜ୍ୟପାଳ ଇସ୍ତଫାପତ୍ର ଗ୍ରହଣ କରିଥିବା ଜଣାପଡିଛି। ଅନ୍ୟପକ୍ଷେ ଉକ୍ତ ଆସନରୁ କଂଗ୍ରେସ ପ୍ରାର୍ଥୀ ରୂପୀନ୍ଦୀର ସିଂ କୁନେର ୧୧,୨୮୩ ଭୋଟ ବ୍ୟବଧାନରେ ନିର୍ବାଚିତ ହୋଇଛନ୍ତି। ଫଳରେ ରାଜସ୍ଥାନର ଭଜନଲାଲ୍ ଶର୍ମାଙ୍କ ନେତୃତ୍ୱାଧୀନ ସରକାରଙ୍କୁ ଏକ ବଡ଼ ଝଟ୍କା ଲାଗିଛି।
ଗତ ନଭେମ୍ବର ୧୫ରେ କରନପୁର ଆସନର କଂଗ୍ରେସ ପ୍ରାର୍ଥୀ ଗୁର୍ମିତ ସିଂ କୁନେରଙ୍କ ପରଲୋକ ଯୋଗୁ ସେଠାରେ ନିର୍ବାଚନ ସ୍ଥଗିତ ରହିଥିଲା। ଫଳରେ ଡିସେମ୍ବର ୩୦ରେ ଉକ୍ତ ଆସନ ଲାଗି ହୋଇଥିବା ଉପନିର୍ବାଚନରେ ଭାଜପା ମନ୍ତ୍ରୀ ଥିବା ସୁରେନ୍ଦ୍ରଙ୍କୁ ପ୍ରାର୍ଥୀ କରିଥିଲା। ସୁରେନ୍ଦ୍ର ରାଜ୍ୟର କୃଷି ବିପଣନ, ଜଳସେଚନ ଅଞ୍ଚଳ ବିକାଶ ଓ ଜଳ ଉପଯୋଗ ବିଭାଗର ରାଷ୍ଟ୍ରମନ୍ତ୍ରୀ ସ୍ବାଧୀନ ଦାୟିତ୍ୱରେ ଥିଲେ।
