ଜୟପୁର,୨୨।୭: ରାଜସ୍ଥାନ ବିଧାନସଭା ନିର୍ବାଚନ ପୂର୍ବରୁ ପୁଣିଥରେ ସରଗରମ ହୋଇଛି ରାଜ୍ୟ ରାଜନୀତି। ବିଧାନସଭାରେ ନିଜ ସରକାରଙ୍କୁ ଟାର୍ଗେଟ କରିଥିବା କଂଗ୍ରେସ ନେତା ରାଜେନ୍ଦ୍ର ଗୁଧାଙ୍କୁ ମୁଖ୍ୟମନ୍ତ୍ରୀ ଅଶୋକ ଗେହଲଟ ମନ୍ତ୍ରୀ ପଦରୁ ବହିଷ୍କାର କରିଛନ୍ତି। ତେବେ ମନ୍ତ୍ରୀ ପଦ ଯିବା ପରେ ରାଜେନ୍ଦ୍ର ନିଜ ବିବୃତିରେ ଅଟଳ ଅଛନ୍ତି। ସତ କହିବା ଯଦି ଅପରାଧ ତେବେ ସେ ଏଭଳି ଅପରାଧ କରିବେ ବୋଲି ସେ କହିଛନ୍ତି। ଏହି ବୟାନକୁ ନେଇ ଏବେ ରାଜନୈତିକ ମହଲରେ ଆଲୋଚନା ତୀବ୍ର ହୋଇଛି।
ଏକ ଗଣମାଧ୍ୟମକୁ ପ୍ରତିକ୍ରିୟା ଦେଇ ରାଜେନ୍ଦ୍ର କହିଛନ୍ତି, ଯଦି ସତ କହିବା ଅପରାଧ ତେବେ ମୁଁ ଆଗକୁ ମଧ୍ୟ ଏଭଳି ଅପରାଧ କରିବି। ରାଜସ୍ଥାନରେ ମହିଳାଙ୍କ ପ୍ରତି ଅପରାଧ ବଢ଼ୁଥିବା ସମସ୍ତେ ଜାଣନ୍ତି। ମହିଳା ଅପରାଧରେ ରାଜସ୍ଥାନ ଶୀର୍ଷରେ ଅଛି। ଯାହା ସତ ଥିଲା ମୁଁ ତାହା ହିଁ କହିଥିଲି, ଏଥିରେ ମୁଖ୍ୟମନ୍ତ୍ରୀ ଖପ୍ପା ହୋଇଗଲେ। ହେଲେ ମୋତେ ଏହାର ଫରକ ପଡେନାହିଁ। ମୁଁ ସତ କହିବି ବୋଲି ସେ କହିଛନ୍ତି।
ପ୍ରକାଶ ଯେ, ବିଧାନସଭା ସମୟରେ ରାଜେନ୍ଦ୍ର ମଣିପୁରର ଉଦାହରଣ ଦେଇ ନିଜ ସରକାରଙ୍କ ଉପରେ ପ୍ରଶ୍ନ ଉଠାଇଥିଲେ। ଆମେ ମହିଳାଙ୍କୁ ସୁରକ୍ଷା ଦେବାରେ ଅସଫଳ ହୋଇଛୁ। ରାଜସ୍ଥାନରେ ଯେଉଁଭଳି ଭାବେ ମହିଳାଙ୍କ ଉପରେ ଅତ୍ୟାଚାର ବୃଦ୍ଧି ପାଉଛି, ମଣିପୁର ପରିବର୍ତ୍ତେ ଆମକୁ ନିଜକୁ ଦେଖିବା ଉଚିତ ବୋଲି କହିଥିଲେ। ଏହି ବିବୃତ୍ତି ପରେ ଏକ ବଡ ନିଷ୍ପତ୍ତି ସ୍ବରୂପ ରାଜସ୍ଥାନ ମୁଖ୍ୟମନ୍ତ୍ରୀ ଗେହଲଟ୍ ତାଙ୍କୁ ମନ୍ତ୍ରୀ ପଦରୁ ବହିଷ୍କାର କରିଥିଲେ।