ଜୟପୁର,୨୭।୪: ଜୟପୁରର ସାଓ୍ବାଇ ମାନ୍ସିଂ ଷ୍ଟାଡିୟମରେ ଗୁରୁବାର ଖେଳାଯାଇଥିବା ଆଇପିଏଲ୍ର ୩୭ ତମ ହାଇସ୍କୋରିଂ ମ୍ୟାଚ୍ରେ ଅଧିନାୟକ ସଞ୍ଜୁ ସାମ୍ସନଙ୍କ ନେତୃତ୍ୱାଧୀନ ରାଜସ୍ଥାନ ୩୨ ରନ୍ରେ ବିଜୟୀ ହୋଇଛି। ଏହି ବିଜୟ ସହ ରାଜସ୍ଥାନ ୧୦ ପଏଣ୍ଟ ପାଇ ଟେବୁଲର ଶୀର୍ଷରେ ପହଞ୍ଚିଛି। ରାଜସ୍ଥାନ ଟସ୍ ଜିତି ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୫ ଉଇକେଟ ହରାଇ ୨୦୨ ରନ୍ କରିଥିଲା। ଫଳରେ ଚେନ୍ନାଇ ସୁପର କିଙ୍ଗ୍ସ ଆଗରେ ୨୦୩ ରନ୍ର ବିଶାଳ ଟର୍ଗେଟ୍ ରଖିଥିଲା ରାଜସ୍ଥାନ। ହେଲେ ଚେନ୍ନାଇ ୨୦ ଓଭରରେ ୬ ଉଇକେଟ ହରାଇ ୧୭୦ ରନ୍ କରିବାରେ ସକ୍ଷମ ହୋଇଥିଲା।
୨୦୩ ରନ୍ ଜବାବରେ ଚେନ୍ନାଇର ବ୍ୟାଟିଂ ଧୀମା ରହିଥିଲା। ପାଓ୍ବାର ପ୍ଲେରେ ଡେଭନ୍ କନ୍ଓ୍ବେ(୮)ଙ୍କ ଉଇକେଟ ହରାଇ ଦଳ ମାତ୍ର ୪୨ ରନ୍ କରିଥିଲା। ଅଜିଙ୍କ୍ୟ ରାହାନେ(୧୫) ରନ୍ କରିବାରେ ସକ୍ଷମ ହୋଇଥିଲେ। ଋତୁରାଜ ଗାଏକ୍ୱାଡ ୪୭ ରନ୍ କରିଥିଲେ ହେଁ ଏହା ଦଳ ପାଇଁ ଯଥେଷ୍ଟ ହୋଇ ନ ଥିଲା। ରବିଚନ୍ଦ୍ରନ ଅଶ୍ୱିନ ଗୋଟିଏ ଓଭରରେ ରାହାନେ ଓ ଅମ୍ବାତି ରାୟୁଡୁଙ୍କୁ ଆଉଟ୍ କରି ଚେନ୍ନାଇକୁ ବ୍ୟାକଫୁଟକୁ ଠେଲି ଦେଇଥିଲେ। ଶିବମ୍ ଦୁବେ ୫୨ ରନ୍ କରି ଶେଷ ବଲରେ ଆଉଟ ହୋଇଥିଲେ। ଅନ୍ୟମାନଙ୍କ ମଧ୍ୟରେ ମୋଇନ୍ ଅଲୀ ଓ ରବୀନ୍ଦ୍ର ଜାଡେଜା ୨୩ ରନ୍ ଲେଖାଏ ସ୍କୋର କରିଥିଲେ। ରାଜସ୍ଥାନ ପକ୍ଷରୁ ଆଡାମ ଜାମ୍ପା ୩ ଉଇକେଟ ନେଇଥିବା ବେଳେ ରବିଚନ୍ଦ୍ରନ ଅଶ୍ୱିନ ୨ ଏବଂ କୁଲଦୀପ ଯାଦବ ଗୋଟିଏ ଉଇକେଟ ନେବାରେ ସକ୍ଷମ ହୋଇଥିଲେ।