ଆବୁଧାବି, ୨।୧୦: ଆଇପିଏଲରେ ଶନିବାର ଚେନ୍ନାଇ ସୁପରକିଙ୍ଗ୍ସର ଋତୁରାଜ ଗାଏକ୍ୱାଡଙ୍କ ଶତକ ଫିକା ପଡ଼ିଛି। ହାଇ ସ୍କୋରିଂ ମ୍ୟାଚରେ ରାଜସ୍ଥାନ ରୟାଲ୍ସ ୭ ଉଇକେଟରେ ଚେନ୍ନାଇକୁ ପରାସ୍ତ କରିଛି। ଚେନ୍ନାଇ ୨୦ ଓଭରରେ ୪ ଉଇକେଟ ହରାଇ ୧୮୯ ରନ କରିଥିଲା। ରାଜସ୍ଥାନ ୧୭.୩ ଓଭରରେ ୩ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଦଳ ପକ୍ଷରୁ ଶିବମ ଦୁବେ ସର୍ବାଧିକ ୬୪(୪୨ ବଲ, ୪ ଚୌକା, ୪ ଛକା) ରନ କରି ଅପରାଜିତ ଥିବାବେଳେ ଯଶସ୍ବୀ ଜୟସ୍ବାଲ ୫୦, ଅଧିନାୟକ ସଞ୍ଜୁ ସାମସନ ୨୮ ଓ ଇଭିନ ଲିଓ୍ବିସ୨୭ ରନ କରି ଦଳକୁ ଜିତାଇଥିଲେ। ଚେନ୍ନାଇର ଶାର୍ଦ୍ଦୁଳ ଠାକୁର ସର୍ବାଧିକ ୨ଟି ଉଇକେଟ ନେଇଥିଲେ।
ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ଚେନ୍ନାଇ ଓପନିଂ ଯୋଡ଼ିରେ ୪୭ ରନ ସଂଗ୍ରହ କରି ଦୃଢ଼ ଭିତ୍ତି ପକାଇଥିଲା। ଦଳୀୟ ଆକ୍ରମଣର ନେତୃତ୍ୱ ନେଇଥିଲେ ଯୁବ ଓପନିଂ ବ୍ୟାଟର ଋତୁରାଜ ଗାଏକ୍ୱାଡ। ଫଳରେ ଫାଫ୍ ଡୁ’ପ୍ଲେସି ୨୫(୧୯ ବଲ, ୨ ଚୌକା, ୧ ଛକା), ସୁରେଶ ରାଇନା (୩), ମୋଇନ ଅଲୀ ୨୧(୧୭ ବଲ, ୧ ଚୌକା, ୧ ଛକା) ଓ ଅମ୍ବାତି ରାୟୁଡ଼ୁ ୨ ରନରେ ଆଉଟ ହୋଇଥିଲେ ହେଁ କିଛି ଫରକ ପଡ଼ି ନ ଥିଲା। ୧୯.୫ ଓଭର ବେଳକୁ ଋତୁରାଜ ୯୫ ରନରେ ଅପରାଜିତ ଥିଲେ। ତେଣୁ ତାଙ୍କ ପ୍ରଥମ ଆଇପିଏଲ ଶତକ ପୂରଣ ହେବ କି ନାହିଁ ତାହା ଦେଖିବାକୁ ଉତ୍କଣ୍ଠା ରହିଥିଲା। ମାତ୍ର ମୁସ୍ତାଫିଜୁର ରହମନଙ୍କ ଶେଷ ବଲ୍କୁ ସେ ଛକାରେ ପରିଣତ କରି ଆଇପିଏଲରେ ପ୍ରଥମ ଶତକ ହାସଲ କରିଥିଲେ। ୬୦ଟି ବଲ୍ର ସମ୍ମୁଖୀନ ହୋଇ ଋତୁରାଜ ୯ ଚୌକା ଓ ୫ ଛକା ସହାୟତାରେ ୧୦୧ ରନକରି ଅପରାଜିତ ରହିଥିଲେ। ରବୀନ୍ଦ୍ର ଜାଡେଜା ମାତ୍ର ୧୫ ବଲ୍ରୁ ୩୨(୪ ଚୌକା, ୧ ଛକା)ରେ ଅପରାଜିତ ଥିଲେ। ରାଜସ୍ଥାନ ପକ୍ଷରୁ ରାହୁଲ ଟଓ୍ବୋଟିଆ ୩ଟି ଓ ଚେତନ ସାକାରିଆ ଗୋଟିଏ ଉଇକେଟ ନେଇଥିଲେ।