ଭୁବନେଶ୍ୱର,୭।୧୦(ଅନୁରାଧା ମହାରଣା): ୧୯୯୦ ମସିହାରୁ ଗଙ୍ଗନଗର ଯୁବପରିଷଦ ପକ୍ଷରୁ ଦୁର୍ଗାପୂଜା ଆୟୋଜିତ ହୋଇଆସୁଛି। ମା’ଙ୍କ ଆବାହନରୁ ବିସର୍ଜନ ପର୍ଯ୍ୟନ୍ତ ସବୁକିଛି ବିଧି ଓ ପରମ୍ପରା ମୁତାବକ କରାଯାଉଥିବାବେଳେ ସହରର ଅନ୍ୟ ପୂଜା କମିଟି ଭଳି ପୂଜା ଆୟୋଜନକୁ ଆକର୍ଷଣୀୟ କରିବା ପାଇଁ ଯୁବ ପରିଷଦ ଅଣ୍ଟା ଭିଡିଛି। ଚଳିତବର୍ଷ ଗଙ୍ଗନଗର ମୁଖ୍ୟ ରାସ୍ତାରେ ରାଜସ୍ଥାନୀ ଢାଞ୍ଚାରେ ନିର୍ମିତ ରାଜମହଲ ସଦୃଶ ତୋରଣ ଆକର୍ଷଣ ସାଜିବ। ୬୦ଫୁଟ୍ ଉଚ୍ଚ ତଥା ୫୦ ଫୁଟ୍ ପ୍ରସ୍ଥର ତୋରଣ ଭିତରେ ୧୫ ଉଚ୍ଚତା ବିଶିଷ୍ଟ ମା’ ଦୁର୍ଗାଙ୍କ ମୃଣ୍ମୟୀ ମୂର୍ତ୍ତି ପୂଜା ପାଇବ। ସାଥିରେ ପୂଜା ଲକ୍ଷ୍ମୀ, ସରସ୍ବତୀଙ୍କ ସହ ଗଣେଶ ଓ କାର୍ତ୍ତିକ ମଧ୍ୟ ପୂଜା ପାଇବେ। ମା’ ଦୁର୍ଗା, ଲକ୍ଷ୍ମୀ ଓ ସରସ୍ବତୀଙ୍କ ମଥାରେ କମନୀୟ ଚାନ୍ଦି ମୁକୁଟ ରହିବ। ତେବେ ମୂର୍ତ୍ତି ପ୍ରସ୍ତୁତି କାର୍ଯ୍ୟରେ ବଙ୍ଗୀୟ କାରିଗର ଲାଗିପଡ଼ିଛନ୍ତି। ସେହିପରି ତୋରଣ ପ୍ରସ୍ତୁତି ପାଇଁ ବରମୁଣ୍ଡାର ମୁଖ୍ୟ କାରିଗରଙ୍କ ସହ ସ୍ଥାନୀୟ କାରିଗରମାନେ ଦିନରାତି ଏକ କରିଦେଇଛନ୍ତି। ନିର୍ଦ୍ଧାରିତ ସମୟ ମଧ୍ୟରେ ମୂର୍ତ୍ତି ତୋରଣ ପ୍ରସ୍ତୁତି ସାରିବା ପାଇଁ ଚେଷ୍ଟା ଚାଲିଥିବାବେଳେ ସମସ୍ତଙ୍କ ମଧ୍ୟରେ ଏକ ନିଆରା ଉତ୍ସାହ ଦେଖିବାକୁ ମିଳିଛି।